Gedagtes vir elke dag
Of lees almal by Gedagtes vir elke dag
Ons moet onsself aanvaar soos ons is want dit is hoe God ons geskep het. Aanvaarding beteken dat jy waardevol is net soos jy is. Dit laat jou toe om die ware jy te wees. Jy word nie ingedwing in iemand anders se idee van wie jy werklik is nie. Dit beteken jou idees word ernstig opgeneem omdat dit jouself weerspieël. Jy kan praat oor hoe jy binnekant voel – en iemand gee werklik om. Ware selfaanvaarding word nie in die krag van prositiewe denke, kopspeletjies of sielkunde gevind nie; dit is 'n geloofsdaad wat deur die genade van God plaasvind.
DIE ANTICHRIS (3/3)
Ds A.E. van den Berg
WÊRELDHEERSKAPPY
“En die tien horings wat jy gesien het, is tien konings wat nog geen koningskap ontvang het nie, maar hulle ontvang mag soos konings...saam met die dier” (Open.17:12).
Die god-vyandige strewe na wêreld-eenheid wat met die bou van die toring van Babel begin is, bereik met die koms van die Antichris die hoogtepunt. “En die tien horings wat jy gesien het, is tien konings wat nog geen koningskap ontvang het nie, maar hulle ontvang mag soos konings...saam met die dier” (Open.17:12).
Tien nasies uit die gebied van die ou Romeinse ryk gaan die ganse mensdom aan hul gesag onderwerp en kom waarskynlik uit die geledere van die Europese Unie (EU). In Maart 2010 het die EU Observer berig dat 10 van die lidlande besig is om reëls vir 'n versnelde samewerking op te stel.
Die RK gaan godsdiens met godsdiens vernietig en is reeds daarmee besig. Sy gebruik ekumene daarvoor - die strewe na strukturele kerke-eenheid. Dis 'n bose misleiding wat as 'n interkerklike broederskap verbloem word. Daarmee slaag die RK om kerke in die hok van 'n georkestreerde gesamentlike eenheid in te jaag.
Na die 16de eeuse Hervorming het die RK gesweer dat alle Protestantse kerke eendag na haar sal terugkruip. En dit gebeur vandag sienderoë! Dis kommerwekkend dat Protestantse kerke met ’n instansie soos die RK, wie se bose doelstellings ’n ope boek is, toenemend gemene sake voer!
Dit waarmee die RK vandag besig is, het Romeinse keisers eeue gelede al gebruik om mense met godsdiens te beheer. Die RK wil alle afsonderlike gemeenskap-strukture met gesamentlike strukture uit die weg ruim. Om die samewerking van Protestantse kerke te verkry, het sy die ideaal van strukturele kerk-eenheid by hulle aangewakker. Dit het chaos in sommige Protestantse kringe veroorsaak. Die teologiese verwarring is die tragiese gevolge van Protestantse kerke se gemene sake met RK.
Die laaste paar pouse het ekumeniese betrekkinge so hoog aangeslaan, dat hulle, in hul strewe na een wêreld-godsdiens, selfs Moslems en Jode ingetrek het. Niks is vir die Christendom so gevaarlik as heidense verbroedering nie! Om heidene te betrek, moes daar van die verlossingsleer van Jesus as die enigste Verlosser afgesien word. Daar gaan tans al hoe meer stemme daarvoor op dat Jesus nie die enigste weg na die ewige heerlikheid is nie. Wat sê die Bybel? “Want daar is een God en een Middelaar tussen God en die mense, die mens Christus Jesus” (1 Tim.2:5).
Die RK doen haar met ekumeniese gesprekvoering as 'n Christenkerk voor wat graag met ander kerke wil saamwerk. Dis 'n leuen! Al wat sy wil doen, is om Protestantse kerke aan haar bose leiband vas te knoop; 'n leiband wat met die verskyning van die Antichris 'n wurg-ketting word!
Die RK het net een doel voor oë – om die wêreld onder beheer van die Antichris te verenig. Daarvoor is godsdiens 'n onmisbare werktuig. Die RK se sg. universele liefdes-evangelie van versoening en vergifnis is 'n slenter wat baie Protestantse kerke in 'n horisontale versoeningsmanie laat tol.
Protestante glo anders as die RK oor geloofsake soos die wedergeboorte, gesag van die Skrif, sakramente, ampsdraers en die versoening met Christus. Om verskille ter wille van interkerklike samewerking opsy te skuif, skreeu ten hemel. So word die RK se vingerafdrukke bv. al hoe duideliker op die NG Kerk se vreemde inkleding van eredienste gesien. Haar Rooms georkestreerde Bybelvertaling, kindernagmaal en die gebruik van kerse verraai die sleeptou waarmee sy gesleep word – Made in Rome.
As kerke in die drukgang van die ekumene beland, is dogmatiese kastrasie en geestelike blindheid onvermydelik. Ongelukkig sien Protestantse kerke die RK se planmatige vernietiging van hul Hervorming-erfenis nie raak nie! Hierdie gebrek aan profetiese visie laat die ekumeniese net al hoe stywer om Protestantse kerke trek.
Roomse Katolisisme is die grootste klug en pouse die grootste bedrieërs van alle tye. Al lyk die RK vir leke na Christendom, is dit is in werklikheid niks anders as 'n vermenging van oud Babiloniese en Roomse afgodery nie. Rome het soveel heidense gebruike in haar midde dat dit inspanning kos om iets eg Christelik by haar te vind. Sy is soos 'n lugspieëling in die woestyn; sonder enige lewegewende geestelike water.
Die RK erken dat baie van haar leer vreemd aan die Bybel is. Meer as 82% van haar leer stem bv. glad nie met die Bybel ooreen nie. Sy ontken bv. die genoegsaamheid van die Bybel. Gevolglik sal geeneen van haar lidmate die ewige lewe beërwe nie. In die gelykenis van die Saaier sê Jesus: “... maar sodra hulle dit gehoor het, kom die Satan dadelik en neem die woord weg wat in hulle harte gesaai is” (Mark.4:15).
Die Bybel was vir die RK vir eeue lank 'n dooie boek wat slegs aan die hand van priesters gehoor is. Dis in 1229 selfs op die lys van verbode boeke geplaas waarna daar gedreig is om huise te deursoek, Bybels te vernietig en die skuldiges te vervolg. In Desember 1866 het pous Pius IX Bybel-genootskappe as peste beskryf!
Die RK haat in werklikheid die Bybel omdat dit haar ontmasker. “Want die woord van God is lewend en kragtig en skerper as enige tweesnydende swaard, en dring deur tot skeiding van siel en gees en van gewrigte en murg, en is ʼn beoordelaar van die oorlegginge en gedagtes van die hart” (Hebr.4:12).
Die Heilige Gees open gelowiges se verstand om die Bybel te verstaan. Die valse profeet lok mense van die Bybelse waarhede en sodoende van 'n ewige heerlikheid af weg. “Want baie verleiers het in die wêreld ingekom: die wat nie bely dat Jesus Christus in die vlees gekom het nie. Dit is die verleier en die Antichris” (2 Joh.7).
Geheime Sataniese rituele word gereeld in die Vatikaan beoefen. In kardinaal Malachai Martin se roman A Windswept House (1996) skryf hy dat 95% van sy skok-verhaal op werklike gebeure in die Vatikaan gegrond is.
Talle Roomse gebruike stem selfs met dié van die Kerk van Satan ooreen. Beide het priesters, 'n kerklike hiërargie en geheimsinnige sang-digting (Engels:chanting). Daarbenewens kom die gebroke kruis wat prominent in die Kerk van die Satan is, ook op elke pous se ampstaf voor. Dis in oud-Egipte 'n ankh genoem en is op 'n Farao se ampstaf en priesterlike ampsgewaad aangebring. Die kruise simboliseer die Satan se gewaande oorwinning oor Jesus. Dis 'n spottery met Hom en 'n herhaling van die Romeine se spot op Golgotha as die “Koning van die Jode” (Mat.27:37).
Roomse Katolisisme is 'n herlewing van die ou Babiloniese godsdiens. In Open.17:5 skryf Johannes: “.... Verborgenheid, die groot Babilon, die moeder van die hoere en van die gruwels van die aarde”. Omdat baie land-hoofde gemene sake met haar het, word sy as 'n bordeelhoudster met kliënte uitgebeeld wat geestelike prostitusie beoefen. Vandaar God se oproep: “.... Gaan uit haar uit, my volk, sodat julle nie gemeenskap met haar sondes mag hê en van haar plae ontvang nie” (Open.18:5).
Die wêreld spoed na sy einde en laat gelowiges met net een bede: “En die Gees en die bruid sê: Kom! En laat hom wat hoor, sê: Kom! En laat hom wat dors het, kom; en laat hom wat wil, die water van die lewe neem, verniet. Hy wat dit getuig, sê: Ja, Ek kom gou. Amen, ja kom, Here Jesus! “ (Open.22:17,20).