Gedagtes vir elke dag
Of lees almal by Gedagtes vir elke dag
Gewone mense dink net hoe hulle hulle tyd kan deurbring; verstandige mense probeer dit gebruik
DIE WAT PLANNE VIR HOM VERBERG
Hannes Ollewagen
Jes. 29:1-24
“Wee hulle wat planne diep verberg vir die Here, wie se werk in duisternis plaasvind; en hulle sê: Wie sien ons en wie ken ons?”(:15).
Hierdie dwaasheid waarvan ons in Jesaja 29:15 lees, is so oud as die mensheid self. Onthou maar hoedat die eerste mense, Adam en Eva, ook probeer het om hul oortreding en ongehoorsaamheid teenoor God te verberg deur vir Hom te probeer wegkruip. En nadat God hulle opgesoek en hulle besef het dat dit onmoontlik is om vir Hom weg te kruip, het hulle hul sonde agter hul verskonings en die verskuiwing van aanspreeklikheid probeer wegsteek. Maar einde laaste het Adam en Eva ontdek dat daar niks is wat voor God se oë verborge is nie.
Dit word ook vir ons so mooi in Hebreërs 4:13 uitgedruk. “En daar is geen skepsel onsigbaar voor Hom nie, maar alles is oop en bloot voor die oë van Hom met wie ons te doen het.”Luister verder na die getuienis van koning Dawid in Ps. 69:6. “o God, Ú weet van my dwaasheid, en my skuldige dade is vir U nie verborge nie.” En in Jeremia 16:17 lees ons ook waar God dit duidelik stel dat die ongeregtighede van Israel nie vir Hom verborge is nie. “Want my oë is op al hulle weë, dit is nie voor my aangesig bedek nie, en hulle ongeregtigheid is nie voor my oë verborge nie.”
Ons lees in Johannes 3:19-21 waar Christus dit vir ons prontuit stel waarom ’n mens hierdie dwaasheid begaan om hul verkeerde handelinge vir Hom te probeer verberg. “En dit is die oordeel: dat die lig in die wêreld gekom het, en die mense het die duisternis liewer gehad as die lig; want hulle werke was boos.Want elkeen wat kwaad doen, haat die lig en kom nie na die lig nie, dat sy werke nie bestraf mag word nie. Maar hy wat die waarheid doen, kom na die lig, sodat sy werke openbaar kan word, dat hulle in God gedoen is.” Die mens wat sy handelinge vir God probeer verberg, het die duisternis liewer as die lig. Hierdie mens is geheg aan sy verkeerde en sondige handelinge en wil nie daarvan afstand doen nie – daarom dat hy nie wil hoor dat dit verkeerd is nie. Hy wil nie hieroor bestraf of vermaan word nie, want hy wil hom in hierdie dinge verlustig. Die feit dat ’n mens dit probeer verberg getuig wel van die verkeerdheid daarvan. ’n Mens steek tog nie iets weg waarop jy trots is nie? Daarbenewens is dit net ’n dwaas wat ontken dat daar wel ’n God is wat alles sien wat op aarde gebeur. “...Die dwaas sê in sy hart: Daar is geen God nie. Sleg, afskuwelik maak hulle hul dade; daar is niemand wat goed doen nie.” (Ps. 14:1).
Die gelowige kind van God behoort die teenoorgestelde te wees as dit waarna ons tot op hierdie punt verwys het. Die kind van God behoort nie enigiets vir Hom te probeer verberg nie, maar eerder om sy hele lewe voor Hom te stel in die wete dat Hy ons beter ken as wat ons onsself ken. En hierdie gedagte behoort vir ons gerusstellend eerder as ontstellend te wees. “...Here, U deurgrond en ken my. U ken my sit en my opstaan; U verstaan van ver my gedagte.U deurvors my gaan en my lê, en U is met al my weë goed bekend.Want daar is nog geen woord op my tong nie — of U, Here, U ken dit geheel en al.U sluit my in van agter en van voor, en U lê u hand op my.Om dit te begryp, is te wonderbaar vir my, te hoog: ek kan daar nie by nie.” (Ps. 139:1-6).
Ware kennis van God sal ons ook bring na die punt waar ons besef dat die grense wat Hy in sy Woord vir ons gee tot ons heil is. En daarom wil die opregte kind van God gedurigdeur seker maak dat hy binne hierdie grense leef eerder as om op verborge wyse te probeer om hierdie grense te oortree. Die gelowige kind van God moet met vrymoedigheid die wil en leiding van ons liefdevolle Vader in ons lewens soek. “So sê die Here , jou Verlosser, die Heilige van Israel: Ek is die Here jou God, wat jou leer wat heilsaam is, wat jou lei op die weg wat jy moet gaan.” (Jes. 48:17).
Die gelowige kind van God behoort daarna te streef om God in alles in sy lewe, eerder as homself, te behaag. Waarom sou ons eerder ons eie planne probeer beraam en dit vir Hom probeer verberg? Sou ons dink dat ons Hom in wysheid of verstand oortref? Sou ons Hom wantrou in sy getrouheid in liefde? Of sou ons dalk bang wees dat ons planne nie sy goedkeuring sal wegdra nie? In laasgenoemde geval behoort ons dan mos as geliefde kinders van God van hierdie planne af te sien eerder as om in die verborgenheid daarmee voort te gaan.
Wanneer ons na die samelewing rondom ons kyk, sien ons ’n ellendige prentjie. Ons sien mense wat leef soos dwase – mense wat leef asof daar geen God is nie of asof God nie alles sien wat hier op aarde gebeur nie. Ons sien ook onder ons eie volk hoedat mense verkies om eerder hul tyd op allerhande vermaak en nietigheid te verkwis as om hul lewens onder die Lig van die Woord te bring omdat hulle nie daardeur tot die besef van die verkeerde in hul lewens gebring wil word nie. Ons sien dat mense verkies om hul tyd in inkopiesentrums of dergelike plekke op die Sabbat deur te bring eerder as om op hierdie dag vir God tyd in te ruim en hulle in Hom te verlustig. En ons sien ook dat baie mense wat wel sou besluit om ’n kerkdiens by te woon verkies om na ’n plek te gaan waar hulle kan sit en luister na die voorspoed en seën wat vir hulle wag eerder as daar waar hulle lewe onder die Lig van die Woord ondersoek en daardie verborge sondes uitgewys sal word. Ons sien ’n wêreld waarin die mens se liefde vir homself so groot geword het dat daar nie meer plek vir ’n liefde vir God oorgebly het nie.
Mag hierdie boodskap vir my en u ook opnuut oor ons lewens laat besin. Leef ons asof daar werklik ’n God is – ’n God wat ALLES sien wat hier op aarde gebeur, selfs die gedagtes van ons hart ken. Ja, mag ons só lewe soos mense wat die Lig van die lewe nie net gesien het nie, maar elke dag in hierdie Lig lewe – ’n lewe in Hom en waarin niks vir Hom verberg word nie.
“Elkeen wat in Hom bly, sondig nie. Elkeen wat sondig, het Hom nie gesien en Hom nie geken nie.” (1 Joh. 3:6).