Gedagtes vir elke dag
Of lees almal by Gedagtes vir elke dag
Die lewe is soos ‘n eenrigtingstraat. Dit maak nie saak hoeveel ompaaie jy neem nie, nie een van hulle lei terug nie. Ons beweeg altyd vorentoe. Van een ding kan ons baie seker wees en dit is dat ons lewe ‘n einde gaan kry.
DIE CHARISMATIESE GEVAAR (11)
Ds AE van den Berg
Lees reeks by Die Charismatiese Gevaar
DIE DOEL VAN GEESTELIKE GAWES
" Mense sal nie wasgoedpennetjies, geskenkpapier of spykers namaak nie. Geld, juwele en skilderye wel. Net dit wat waarlik waardevol is. Dis wat die Satan in Korinthe gedoen het. Hy het waardevolle dinge vervals. Hy doen dit vandag nog. Die charismatiese kerke wemel daarvan! "
“So moet julle ook, terwyl julle streef na geestelike gawes, probeer om uit te munt tot stigting van die gemeente” ( 1 Kor.4:12).
Die Bybel waarsku dat diegene wat tekens en wonders doen, dit nie altyd met God se krag doen nie. Talle charismatiese leiers maak van hipnotiese tegnieke en suggestie gebruik. Sommige maak selfs van bose magte gebruik. Sataniese nabootsing van die gawes van die Gees neem skokkende afmetings in charismatiese kringe aan! Nêrens word van enige apostel of kerkleier melding gemaak wat mense bv. deur die Gees laat omslaan het nie. Charismate noem dit "slain in the Spirit." Dit wat hulle doen, stem vir seker nie met die Bybelse gawes van die Heilige Gees ooreen nie!
Van vroegs af het die versugting na opwindender geestesgawes die charismatiese beweging geestelik gekelder. Geen verhaal of ervaring skyn vandag te vergesog te wees om geglo te word nie! Daarom glo die meeste charismate dat God uitsluitlik bonatuurlik werk. Derhalwe huldig hulle die leuen dat dit wat eg geestelik is, nie met die verstand begryp kan word nie. Daarvoor moet mense in ‘n beswyming gaan!
Daarom is die charismatiese beweging deurspek van beswymings, waansin, histerie en selfs geestesversteurdheid. Desondanks beskou hulle dit as gawes van God. Hoe mense dit enigsins as gawes van God kan sien, gaan ‘n mens se verstand te bowe! Dis sonder twyfel demonies!
Dit wat in charismatiese kringe gebeur, is egter niks nuut nie. Dieselfde ding het eeue gelede in die gemeente van Korinthe gebeur. “As die hele gemeente dan saam vergader het en hulle sou almal in tale spreek en daar kom onkundiges of ongelowiges binne, sal hulle nie sê dat julle kranksinnig is nie? ...want God is nie ‘n God van wanorde nie... Laat alles welvoeglik en ordelik toegaan” (1 Kor.14:23,33, 40)
Toe die Korintiërs toegelaat het dat die misterieuse hul verstand benewel, het dit amok in die gemeente veroorsaak. Daarom skryf Paulus iets baie belangrik oor die gawes van die Gees – dit moet gelowiges verstandig laat optree. “So moet julle ook, terwyl julle streef na geestelike gawes, probeer om uit te munt tot stigting van die gemeente” Vers 19 sluit hierby aan: “maar in die gemeente wil ek liewer vyf woorde met my verstand spreek om ook ander te onderrig, as tienduisend woorde in ‘n taal”
Johannes waarsku die vroeë Christene: “Geliefdes, glo nie elke gees nie, maar stel die geeste op die proef of hulle uit God is, want baie valse profete het in die wêreld uitgegaan” (1 Joh.4:1). Charismatiese kerke lê besaai met geestelike ongevalle omdat hulle mense ontmoedig om die Skrif en hul gesonde verstand te gebruik. Gevolglik kan hulle nie die waarheid van die leuen onderskei nie. Charismate hou op om te dink. Hulle minag die verstand en luister eerder na hulle gevoelens. Dis die teelaarde vir mistisisme en is arseen vir die godsdiens!
Geestesgawes is nie veronderstel om die kerk van ons Here Jesus af te breek nie, maar om dit eerder op te bou: “.....sodat die gemeente stigting kan ontvang....laat alles tot stigting geskied” (1 Kor.14:4,26). Valse gawes breek ‘n gemeente soos in Korinthe gebeur het. In 1 Kor.14 maak Paulus sy misnoë oor die toedrag van sake in hierdie gemeente baie duidelik nadat hy vir 18 maande daar gewerk het. Na sy vertrek het ander leraars gekom. Sommige was gewild en ander berug sodat die gemeente amper geskeur het. Die situasie was so benard, dat Paulus se eerste brief aan hulle uitsluitlik daaroor gehandel het. Partyskappe, klieke, persoonlikheidsgevegte, sedelike verval en ander lelike dinge het die kerk baie seergemaak. Een faksie het selfs opstand teen apostoliese gesag gestook.
Dis mos hoe die Satan werk; as hy die kerk nie van buite af skaad nie, doen hy dit van binne. Hoeveel van ons eie kerk se gemeentes het nie al oor soortgelyke dinge tot niet gegaan nie! Dit gebeur as die vlees seëvier!
Korinte was een groot, korrupte gemeente. Gemeentelede het daarin geslaag om ‘n klomp booshede, eie aan hulle eertydse heidenlewe, in die kerk te vestig. Dit het hulle nie aan geestelike gawes ontbreek nie, hulle kon net nie tussen die gawes van die Heilige Gees en die nabootsings van die Satan onderskei nie, veral nie die spreek in tale nie. Hulle het, soos die charismate vandag, lelike wanopvattings oor die Heilig Gees gehad en geestesvervulling met onwillekeurige, uitbundige, misterieuse handelinge verwar. Hoe vreemder mense opgetree het, hoe voller is hulle geag.
Die behoefte om deur ander raakgesien en as geestelik hoogstaande beskou te word, was een van die vernaamste redes waarom die spreek in tale in Korinte so misbruik is. Toe Paulus daar begin werk het, het die Heilige Gees wonderlike dinge in hul midde laat gebeur. Maar toe hy daar weg is, het die gemeente die werk van die Gees met hul eertydse heiden-gebruike verwar.
Benewens Jode wat tot bekering gekom en in Korinte by die gemeente aangeluit het, het die meeste ander uit die heidendom gekom. Heidene het graag oor verskillende filosowe geargumenteer. Dis waar die partyskappe en klieke vandaan gekom het. Die invloed van die heidense misterie-godsdiens die Christendom bedreig en verskeie vorms aangeneem wat almal in Babel ontstaan het. Elke valse godsdienssisteem se oorsprong kan na Babel se misterie-godsdiens teruggespeur word en word altyd aan ekstatiese belewenis gekenmerk.
Aanhangers van misterie-godsdienste beywer hulle vir ‘n bonatuurlike gemeenskap met die onsienlike en smag daarna om in ‘n half bewustelose, hipnotiese, waansinnige toestand te beland. Hulle glo dat dit hulle met God in aanraking bring. Charismate het identiese ervarings! Uit 1 Kor.14 is dit duidelik dat heidense gebruike en rituele die gemeente ingesypel en eredienste in waansinnige, onsamehangende chaotiese optredes laat ontaard het.
Dieselfde probleem kasty die charismatiese beweging vandag. Hulle weet nie of hul belewenis uit God is of nie omdat hulle hul nie aan die waarheid van die Skrif steur nie. Neem die spreek in tale as ‘n voorbeeld. Die egte gawe van die spreek in tale was die vermoë om in ‘n bestaande vreemde taal te kon praat soos die apostels op Pinksterdag. Niks in die NT dui daarop dat hierdie gawe ekstaties van aard was nie!
Heidene praat tydens beswymings brabbeltaal. Waarom sou God iets soortgelyks doen? Korinte was vol priesters, towenaars en waarsêers wat brabbeltaal in beswymings gebesig het. Dit het onder gemeentelede bygeval gevind toe valse leraars gemeentelede aangespoor het om die Heilige Gees op bonatuurlike wyse te soek en die vervulling met die Gees met heidense ekstase verwar!
Paulus wou seker maak dat die gelowiges nie onkundig oor die gawes van die Gees is nie omdat ‘n gemeente daarsonder nie heilig en volwasse kan wees nie. Daarom probeer die Satan dit, waar moontlik, na te maak. Hy verwek wanvoorstellings en verwar mense oor die gawes.
Dit wat in Korinte gebeur het, gebeur vandag weer. Mense raak in soortgelyke vervoering. “Julle weet dat julle heidene was, weggevoer na die stomme afgode net soos julle ook al gelei is” (1 Kor.12:2). Die Korintiërs kon nie tussen die waarheid en die leuen onderskei nie en het die slagoffers van ‘n valse godsdienssisteem geword. Die Griekse woord vir wegvoer is apago en beteken om soos ‘n gevangene onder dwang weggeneem te word. So is die Korintiërs deur valse gawes weggevoer.
Paulus sê vir hulle dat toe hulle heidene was, demone hulle in ‘n verrukking van sinne meegevoer het. Nou laat hulle dieselfde ding in die kerk toe! Die resultaat is ‘n onheilige chaos! As heidene was hulle daaraan gewoond om weggevoer te word. Dit pas egter nie by gelowiges nie. ‘n Onbeheerste persoon is nie met dinge van die Gees besig nie. Diegene wat glo dat hulle deur die Gees omslaan, mag wel deur ‘n gees omgeslaan word, maar dis nie die Heilige Gees nie! Nêrens in die Skrif sien ons dat die gawes van die Gees mense onbeheers laat optree of bonatuurlike stuiptrekkings ervaar nie. Die teendeel is waar. Gal.5:22 sê dat selfbeheersing een van die vrugte van die Heilige Gees is.
Paulus maak ‘n interessante stelling: “Daarom maak ek julle bekend dat niemand wat deur die Gees van God spreek, Jesus ‘n vervloeking noem nie....” (1 Kor.1:13). Skynbaar het van die gemeentelede in Korinte tydens eredienste in vreemde tale gepraat en sommige mense laat glo dat dit ‘n gawe was. Dit was nie. Demone het deur daardie mense Jesus gevloek! Hulle godsdienspeil was op so ‘n laagtepunt dat hulle nie meer kon onderskei wat uit God en wat uit die Satan was nie.
Egte gawes is kosbaar vir ‘n gemeente. Dis waarom Satan dit vervals. Niemand vervals ‘n ding wat waardevol is nie. Mense sal bv. nie wasgoedpennetjies, geskenkpapier of spykers namaak nie. Geld, juwele en skilderye wel. Net dit wat waarlik waardevol is. Dis wat die Satan in Korinthe gedoen het. Hy het waardevolle dinge vervals. Hy doen dit vandag nog. Die charismatiese kerke wemel daarvan! Baie charismate is werklik ernstig met hul godsdiens en het die Here Jesus waarlik lief. Ongelukkig is hulle deel van ‘n sisteem wat in beginsel presies dieselfde foute as die vroeë kerk in Korinthe maak!