Gedagtes vir elke dag
Of lees almal by Gedagtes vir elke dag
Die laaste vreugdes van die lewe is nie net stiller nie maar ook voller en dieper as dié van die jeug. Die aand van die lewe voorsien sy eie lamp; nie ‘n skerp elektriese lig nie, maar die sagte, warm kerslig van Godsvertroue en dankbaarheid.
DIE CHARISMATIESE GEVAAR (10)
Ds AE van den Berg
Lees reeks by Die Charismatiese Gevaar
DIE AANSLAG TEEN DIE WAARHEID
"‘n Geesvervulde se lewe getuig van ‘n behoorlike kennis van God se Woord, ‘n diep gebedslewe, ‘n kalm, beheersde persoonlikheid en gesaghebbende getuienis. Streef daarna! "
“Maar al sou ons of ‘n engel uit die hemel julle ‘n evangelie verkondig in stryd met die wat ons julle verkondig het. Laat hom ‘n vervloeking wees!” (Gal.1:8).
Die charismatiese beweging is besig om Protestantse kerke soos ‘n getygolf te tref en chaos en verwarring op sy vernietigende spoor na te laat. Duisende mense word op ‘n dwaalspoor weggevoer omdat hulle die Woord van God nie ken nie. Daar is ‘n verskil tussen die Bybel te lees en dit te ken. By geleentheid sê Jesus vir die Skrifgeleerdes van sy tyd: “...Julle dwaal omdat julle die Skrifte nie ken nie..." (Mt.22:29).
Charismate se beheptheid met bonatuurlike ervarings soos die spreek in tale, gesigte, genesings en profetiese openbarings is die sentrale as waarom hulle godsdiens draai. In hul soeke na verruklike ondervindings, geheimsinnige verskynsels, wonderkragte en bonatuurlike wonders, versaak hulle die Bybelse voorskrifte vir geestelike groei soos gebed, Bybelstudie, volhardende gehoorsaamheid en die ware gemeenskap van die gelowiges. Daarom val hulle die Bose so maklik ten prooi!
Dis in Amerika geen ongewone gesig om tydens groot charismatiese byeenkoms mense in ‘n beswyming en met stuiptrekkings op die vloer te sien lê nie. Ander dans, spring of skreeu weer soos besetenes. Dit rym glad nie met 1 Kor.14:40 nie: “Laat alles ordelik en welvoeglik toegaan” Desondanks sluit duisende mense jaarliks by hierdie bewegings aan; mense met ‘n vreemde behoefte aan gevoelsgodsdienste soos wat deur inboorlinge in Afrika en Asië eeue lank beoefen word.
Charismate glo dat wondertekens, soos in die tyd van Jesus en die apostels verrig is, ongelowiges tot bekering sal bring. Hulle misgis hulle! Daar is ‘n hemelsbreë verskil tussen die wonderwerke in Jesus en die apostels se tyd en diè van die charismate. Jesus se wonderwerke was nie psigosomaties of outosuggesties nie, maar Bybels. Dit was sigbaar en eg - werklike tekens, werklike wonders.
Charismate leer beslis nie uit Jesus se bediening nie. Dis nie wonders wat mense tot bekering laat kom nie, maar die Woord van God! “Die geloof is dus uit die gehoor, en die gehoor is deur die woord van God” (Rom.10:17). Ten spyte van Jesus se wonder werke het Israel nog steeds nie geglo nie en Hom gekruisig. Uit Hand.1:15 blyk dat Jesus maar 120 aanhangers aan die aan die einde van sy aardse bediening gehad het.
‘n Magdom van mense het Jesus se wonderwerke aanskou, maar nog steeds nie geglo nie. Selfs nie eens na die opwekking van Lasarus uit die dood nie! Joh.12:37 som dit op: “En alhoewel Hy so baie tekens voor hulle gedoen het, het hulle nie in Hom geglo nie” . Dieselfde ding het in die vroeë kerk gebeur. Wonders en tekens het geen verskil gemaak nie. Die Joodse Raad het Petrus en Johannes selfs tot swye probeer dwing: “En hulle het hul geroep en hulle bevel gegee om in die geheel nie in die Naam van Jesus te spreek of te leer nie” (Hand.4:18).
Ook in die OT het tekens en wonders as sulks nie bekerings meegebring het nie. Die Farao se hart het verhard gebly. En Israel self? Ten spyte van al die wondertekens van goddelike versorging het ‘n hele geslag weens ongeloof in die woestyn gesterf. Ook toe die profete wondertekens gedoen het, het die Bondsvolk nie geglo nie en het hulle as straf in ballingskap gegaan.
Gevolglik slaan die charismate die bal mis as hulle reken dat tekens en wonders ongelowiges tot geloof sal bring. Hulle mis die hele doel van getuienislewering. God roep gelowiges nie op om die Satan met bonatuurlike magsvertoon teen te staan nie, maar om leuens met die Goddelike waarheid te konfronteer. Terug na die Skrif!
Charismate stomp in der waarheid die verlossingsboodskap af. Baie van hulle het op grond van ‘n wonder wat hulle aanskou het “gelowig” geword sonder dat die verlossingsboodskap ooit aan hulle gebring is. Laasgenoemde skyn in charismatiese kringe oorbodig te wees. Vir hulle gaan dit in werklikheid nie om die Evangelie soos wat Jesus dit verwag nie, maar om belewenis. Luister maar net na hul prediking; die verlossing in Christus staan nie juis sentraal nie, maar eerder die doop met die Heilige Gees, die spreek in tale en genesings. En daarmee vat die Satan die aandag van die Skrif af weg en word diè mense instrumenteel in die bose aanslag op die waarheid.
Charismate glo dat evangelisasie nie deur blote Woordverkondiging bevorder word nie. Daar moet ook wonderwerke wees. Die gevaar is dat indien wonderwerke die basis vir evangelisasie word, Jesus se verlossingsboodskap ‘n bysaak word. Want dan word die Bybelse Jesus vir ‘n misterieuse een opsy geskuif en die geloofsfokuspunt verskuif; weg van die Verlosser na tekens en wonders. Dis gruwelik on-Bybels!
Maar dis presies wat die charismate doen – hulle godsdiens is gruwelik on-Bybels!
Wie sy vertroue in tekens en wonders stel, kan nie deur die geloof gered word nie ongeag hoe ernstig hulle ook al die naam van die Here Jesus aanroep. Egte reddende geloof is deur Jesus alleen en nie deur wonderwerke nie!
Paulus het hom ten doel gestel om alleenlik die gekruisigde (verlossende) Jesus te verkondig (1 Kor.1:23). ‘n Boodskap wat dit nie bevat nie, is nie ‘n evangelie-boodskap nie! Die Evangelie is nie tekens en wonders nie, maar die reddende krag van God deur Christus. Jesus het dikwels diegene wat om tekens gevra het, berispe.
Die charismate se benadering tot kerk-wees, is heeltemal verkeerd. Hulle bou mure sonder ‘n fondament! Die charismatiese beweging is die tragiese verhaal van ‘n skip wat in ‘n hawe ingevaar, maar geen Bybelse ankerplek gevind het nie!
Daar is groot onderlinge verwarring in die charismatiese beweging omdat baie van hulle nie weet wat hulle presies glo nie. Daarom is daar soveel verdeeldheid en versplintering aan die orde van die dag. Dit gebeur wanneer jy die genoegsaamheid van die Bybel ontken. Verwarring word jou voorland!
Gelowiges het geen nuwe openbaring uit die hemel nodig nie. Judas, die broer van Jakobus skryf dat hy geroepe is “om kragtig te stry vir die geloof wat eenmaal aan die heiliges oorgelewer is” (Judas :3). Die Griekse woord eenmaal beteken eenmalig. Wie hierdie waarheid ontken, deur nog openbaring by te voeg, rand die waarheid aan!
Wees versigtig vir ervarings! Gelowiges moet hul ervarings altyd aan die Skrif toets. Moet nooit, maar nooit, soos die charismate, die Skrif aan jou ervarings toets nie! Die charismate beweeg bitter ver van die Bybelse leer af weg.
Charismate sê dat as die krag van die Heilige Gees in ‘n mens kom, verskeie fisiese gebeure plaasvind. Sommige begin onbedaarlik te bewe, ander val om, sommige begin onophoudelik te spring terwyl ander se hande so saamtrek dat dit soos kloue lyk. Sommige mense se gesigte vervorm, ander knip die oë onbeheers. Sommige begin swaar asem te haal, hittegloede te beleef en abnormaal te sweet. Klink dit na die vrug van die Gees waarvan Gal.5 praat? Nee, allermins nie! Dit klink eerder na demoniese openbarings!
Om jou teologie op sulke dinge te bou, is dodelik! Dit gebeur wanneer mense meer waarde aan ervarings as aan die Skrif heg. Want dan maak jy jou lewensboot los van die stewige anker van die Skrif om dit op die see van misterieuse geheimsinnigheid te laat ronddobber en alles wat jy dan sien, as komende van God te aanvaar. Dis niks anders as selfbedrog nie. Dis soos om ‘n huis op sand te bou!
Charismate kritiseer graag Protestante omdat hulle hul geloofslewe en teologie slegs op die Bybel grond. Daarmee blus Protestante kwansuis die Gees! God wil kragtig deur hulle werk, maar hulle weier om sy krag in wonders en sensasionele, geheimsinnige ervarings te soek. Die Heilige Gees werk nie op die normale vlak van die lewe nie, slegs bonatuurlik. As jy dit nie daar gaan soek nie, sal jy dit nooit vind nie!
Benewens hulle verregaande onkunde, kan die gevaar wat hierdie siening inhou, nie genoeg beklemtoon word nie. Dit kan mense die ewige lewe kos! Jesus het ons baie duidelik gewaarsku: “Want daar sal valse christusse en valse profete opstaan, en hulle sal groot tekens en wonders doen om, as dit moontlik was, ook die uitverkorenes te mislei. Kyk, Ek het dit vir julle vooruit gesê” (Mt.24:24,25).
Paulus skryf ook hieroor aan die Tessalonisense: “Laat niemand julle op enige manier mislei nie, want eers moet die afval kom....” (2:2:3). Dis een van die tekens van die naderende wederkoms van Jesus – daar kom ‘n reuse kerklike verval. “en dan sal die ongeregtige geopenbaar word...hy wie se koms is volgens die werkinge van die Satan met allerhande kragtige dade en tekens en wonders van die leuen” (:8,9).
Hierdie verval waai alreeds baie sterk in talle kerklike kringe. Dit gaan kort voor lank orkaansterkte bereik. Moenie daardeur weggewaai word nie! Volg die goeie raad van ons teksvers “Maar al sou ons of ‘n engel uit die hemel julle ‘n evangelie verkondig in stryd met die wat ons julle verkondig het. Laat hom ‘n vervloeking wees!” (Gal.1:8).
Hoe sal ons aan die einde van die tyd weet of dit wat ‘n persoon of ‘n kerk sê van God kom? Daar is net een onfeilbare toets - nie dat hy tekens en wonders kan doen nie, maar stem dit wat hy leer met God se Woord ooreen? Hoe lyk ‘n geesvervulde lewe?
Iemand wat met geheime tekens en bonatuurlike gawes omgaan? Nee, dis towenaars! ‘n Geesvervulde se lewe getuig van ‘n behoorlike kennis van God se Woord, ‘n diep gebedslewe, ‘n kalm, beheersde persoonlikheid en gesaghebbende getuienis. Streef daarna!