Gedagtes vir elke dag
Of lees almal by Gedagtes vir elke dag
Geld is kosbaar, 'n huis ook goed, maar die allerbeste is 'n goeie vriend, in donker dae gee hy jou moed. Groete aan al ons vriende in die geloof!
DIE CHARISMATIESE GEVAAR (1)
Ds AE van den Berg
Lees reeks by Die Charismatiese Gevaar
“Baie sal in daardie dag vir My sê: Here, Here, het ons nie in u Naam geprofeteer en in u Naam duiwels uitgedrywe en in u Naam baie kragte gedoen nie? En dan sal Ek aan hulle sê: Ek het julle nooit geken nie. Gaan weg van My, julle wat die ongeregtigheid werk!” (Mt.7:22,23).
INLEIDING
Satan haat die kerk van die Here Jesus en doen alles in sy vermoë om dit te skaad. Hy doen dit op twee maniere. Eerstens val hy die kerk van buite af aan soos tydens die Joods-Romeinse vervolging aan die begin van die Christelike era en eeue later tydens die kommunistiese bewind in Oos-Europese lande.
Tweedens val hy ook die kerk met dwaallering van binne af aan. Dit skep verwarring omdat die leuen met die waarheid vermeng word om die Woord van God kragteloos te probeer maak. Satan weet dat die Bybel die lewenskompas is wat God aan mense gee om hul lewenspad mee reguit te hou. Net soos wat ‘n foutiewe kompas mense nie by hul bestemming gaan uitbring nie, so ook nie ‘n verdraaiing van die Bybel nie. Vir die Satan gaan dit uiteraard om een ding – mense moenie by die hemel uitkom nie!
Dwaallering is skadelik omdat die waarheid vir die leuen verruil word sodat mense dwaallig vir sterre aansien. Maar waarom dwaal mense? Jesus antwoord diè vraag in Mt.22:29 as Hy vir die Sadduseërs sê :”......Julle dwaal omdat julle die Skrifte nie ken nie...” MENSE KEN NIE DIE SKRIF NIE!
Mense doen nie moeite om dit te bestudeer nie en aanvaar wat ander vir hul sê. Ongelukkig leef ons in ‘n era waar mense met tweedehandse inligting tevrede is. Hulle stel nie vas of dit wat gesê en verkondig word, die waarheid is nie. Hulle het lui geword. Daarom neem dwaling toe, veral op godsdiensgebied. En dis baie gevaarlik. Jou siel is op die spel en kan jou die ewige lewe kos!
Ek wil by een van die grootste dwalings van ons tyd stilstaan; - die charismatiese gevaar. Dit maai veral onder ons jeug en rig skade aan mense se geesteslewe aan. Gelowige is geroepe om die waarheid teenoor die leuen te verdedig. Johannes Calvyn het gesê dat ‘n hond minstens blaf as sy eienaar aangeval word. Ons kan nie niks wil doen as ons hemelse Eienaar aangeval word nie!
Om die leuen maar sy gang te laat gaan uit vrees vir konfrontasie, is om aan God ongehoorsaam te wees. Gelowiges moet dwaalleraars summier die stryd aansê. “Die hele Skrif is deur God ingegee en is nuttig tot lering, tot weerlegging, tot teregwysing, tot onderwysing in die geregtigheid” (2 Tim.3:16).
Baie gelowiges besef dat charismate dwaal, maar swyg omdat hulle nie die kennis het om hulle dwalings teen te staan nie. Ek wil u help deur vir u die nodige inligting te gee om dwaalgeeste tereg te wys soos God van ons verwag. Die waarheid moet t.w.v. eerbied vir Christus en ‘n liefde vir die waarheid altyd oor die leuen seëvier!
Die Woord van God eis van ons om vredemakers te wees. “Jaag die vrede na met almal...” (Heb.12:14). Nogtans moet ons nooit t.w.v. oppervlakkige vrede terugdeins en dwalings duld nie. Ons moet iets daaraan doen. Verdraagsaamheid teenoor dwaalleer, neem deesdae epidemiese afmetinge in baie Protestantse kerke aan.
In Hand.17 word iets prysenswaardig van die gelowiges in Berea (Griekeland) gesê: “En hierdie mense was edelmoediger as diè in Thessalonika; hulle het die woord met alle welwillendheid ontvang en elke dag die Skrifte ondersoek of hierdie dinge so was” (:11). Dis nie verkeerd om kerke se leerstellings in die lig van die Bybel te ontleed en dwaallering aan die lig te bring nie. Ons moet dit as ‘n verpligting ag en nie terugdeins om leuens uit te wys nie. Paulus het mense dikwels baie sterk aangespreek. Hy skryf aan Timoteus van twee dwaalgeeste wat hy selfs aan die Satan oorgegee het (1 Tim.1:20)!
Elkeen wat God liefhet, het die waarheid lief. Wie die leuen liefhet, het God nie lief nie. ‘n Liefde los van die waarheid is huigelagtige oorgevoeligheid wat dwaalleer in gemeentes laat ontstaan. Die Bybel leer ons egter om die waarheid altyd liefdevol te verkondig. “maar, terwyl ons in liefde die waarheid betrag, in alles sou opgroei in Hom wat die Hoof is, naamlik Christus” (Efes.4:5).
Ek wil met hier die lig van God se Woord op die charismatiese dwaal- beweging laat val wat baie van ons jongmense van hul geestelike ankers losgemaak het. My raad aan jongmense is die raad van Paulus aan die jong Timoteus: “Maar bly jy in wat jy geleer het en waarvan jy verseker is, omdat jy weet van wie jy dit geleer het” (2 Tim.3:14).
Die charismatiese beweging wemel van onskriftuurlikhede. Die gevaarlikste is die oorbeklemtoning van ervaring. Alles in die charismatiese kerke draai om die as van geestelike ervarings. Baie van dit wat hulle leer, is subjektief en nie bewysbaar nie. En kritiseer jy hulle, is die gort gaar! Hulle haal graag 1 Kron.16:22 aan: “Raak my gesalfdes nie aan en doen my profete geen kwaad nie” Hoe kan leuendienaars gesalfdes of profete wees? Nie almal wat daarop aanspraak maak dat hulle gesalfdes van God is, is deur Hom geroep nie. Let op die teksverse.
Charismate getuig van bo-natuurlike ervarings met die Heilige Gees, genesings en boodskappe wat hulle persoonlik van God ontvang het sonder om Skrif enigsins reg te verkondig nie. Subjektiewe ervarings verdring die boodskap van God!
Vir baie charismate is ‘n Evangelie sonder tekens en wonders onaanvaarbaar. Hulle toets die Bybel aan hulle ervarings i.p.v. hul ervarings aan die Bybel te toets! Dis mos nie wat jou ervaring van die Bybel sê nie, maar wat die Bybel van jou ervaring sê, wat tel! As charismate dit maar net wou doen, sal hulle tot hulle skok agterkom dat hulle dinge leer wat nie met die Bybel strook nie. Wie sulke dinge verkondig, is ‘n kragtige instrument in die hand van die Satan!
Charismate glo dat mense eers tekens en wonders moet sien alvorens hulle sal glo. Dit het aan die begin van die 1980’s ‘n nuwe rigting in hul midde laat ontstaan wat as die Teken- en Wonderbeweging bekend staan. Nee, ervaring kan nooit die toets vir Bybelse waarheid wees nie! Alles wat as Christelik opgedis word, is nie noodwendig van God nie. Kyk weer na die twee teksverse. Daar is net een toets – die waarheid soos in die Bybel opgeteken is.
Die charismatiese beweging is geen eenheid nie, maar ‘n horde van versplinterings. Gevolglik is dit baie moeilik om hierdie beweging dogmaties te omskrywe. Daar is egter sekere leerstellings wat by almal voorkom – die opvallendste is die leer van die doop met die Heilige Gees wat glo ná die bekering plaasvind. Charismate sien dit as ‘n tweede seën (second blessing) waarna bewustelik gestreef moet word. Daarsonder is jy as’t ware ‘n tweedeklas gelowige! Dis ‘n skerp verdelende faktor; diegene wat die doop met die Heilige Gees het en diè wat dit nie het nie. Laasgenoemdes word as geestelike agtergeblewenes beskou.
Diegene wat die sg. doop met die Heilige Gees ontvang, is dikwels gespanne omdat hulle altyd meer geestelik as die ander moet voorkom, al ervaar hulle ook geestelike laagtepunte. Hulle is dan met die Heilige Gees gedoop! Daar is baie toneelspel!
Gelowiges moet leerstellings in die in die lig van die Skrif ondersoek en soos die gelowiges van Berea wees wat in die Skrif gaan kyk het of alles wat aan hulle verkondig is, waar was. Mense kan so maklik dink dat hulle met die dinge van die Here besig is en dan is dit nie so nie. Paulus het wyse raad: “Beproef alle dinge; behou die goeie” (1 Thess.5:21).