Gedagtes vir elke dag
Of lees almal by Gedagtes vir elke dag
Enigiemand wat meer oor die lewe te wete wil kom kan maar net die Bybel bestudeer; dit is 'n Boek oor die lewe: oor konings, boere, huisvroue, siekes, soldate, diensknegte, elke mens is in die Bybel; ook jou en my lewe word direk daarin weerspieël. Maar as jy nooit jou Bybel bestudeer nie kan jy nie verwag om lewenskennis te hê nie.
KOMPAS NA DIE HEMEL
Ds A.E. van den Berg
“U woord is ’n lamp vir my voet en ’n lig vir my pad”(Ps.119:105).
Ps.119 is baie anders as enige ander psalm. Dis baie langer, selfs langer as twee van die langste psalms as dit saamgevoeg sou word. Alhoewel die digter nie vermeld word nie, lyk dit asof dit Dawid kon wees wat by geleentheid al sy kort geestelike gedagtes wat hy neergeskryf het as ʼn geheel saamgevoeg het. Ps.119 is egter nie ʼn ketting met ʼn klomp saamgevoegde goue skakels nie, maar eerder ʼn skatkis met goud wat op elke toegewyde leser wag om ontdek te word.
In vers 19 skryf die psalmdigter: “Ek is ’n vreemdeling op die aarde; verberg u gebooie nie vir my nie”.
Dis so waar, ons is reisigers op die aarde en word soms genoodsaak om in die donkerte van die lewe ons lewensreis voort te sit. Om dit sonder die liggewende Woord van God aan te pak, is rampspoedig. Daarom het God vir ons die Bybel as ʼn lig vir ons lewenspad gegee en aan die hand daarvan ons ewige bestemming te bereik nl. die Nuwe Jerusalem. Wie dié lig gebruik, verdwaal nie. Wie dit nie gebruik nie, verdwaal en beland op die ou einde soos die ryk man in Luk.16 in die ewige duisternis met geween en gekners van tande.
Ps.119 sê dat die Woord van God soos ʼn brandende fakkel ons lewenspad verlig. Dit maak die Bybel so prakties soos ʼn moderne GPS wat die regte pad aandui. ʼn Lamp in die nag en ʼn lig bedags gee sin aan die lewe.
Dawid het sy lewenswandel op die heilige Skrif ingestel. Hy was dikwels in lewensgevaar soos bv. toe hy tydens ʼn burgeroorlog uit Jerusalem moes vlug en sy toevlug na God se Woord geneem het en nie moed verloor nie.
Kennis van die Bybel is kennis van God. Hierdie kennis lei tot die regte besluitnemings en gee gemoedsrus. Die Bybel is ook lewensondersteunend en die krag wat gelowiges in baie moeilike omstandighede staande hou.
“Al gaan ek ook in ʼn dal van doodskaduwee, ek sal geen onheil vrees nie; want U is met my: u stok en u staf dié vertroos my.(Ps.23:4).
Kennis van die Bybel is gelowiges se geestelike suurstoftenk asook hul geestelike voedingsbuis en hul hoop op ʼn ewige heerlikheid saam met Jesus.
Een van die grootste waardes van die Bybel is dat dit ons help om leuens van die waarheid te onderskei. En dis baie belangrik in ʼn wêreld waar leuens en dwaalleer oorhand toeneem. Mense weet nie meer wat reg of verkeerd is nie. Hulle word toenemend vanaf kansels mislei om die waarheid te verwerp en die leuen te glo. Paulus waarsku dat dit net voor die wederkoms gaan toeneem:
“...want daar sal ’n tyd wees wanneer hulle die gesonde leer nie sal verdra nie, maar, omdat hulle in hul gehoor gestreel wil wees, vir hulle ’n menigte leraars sal versamel volgens hulle eie begeerlikhede en die oor sal afkeer van die waarheid en hulle sal wend tot fabels” (2 Tim.4:3,4).
Daarom moet mense vandag des te meer kennis van die Bybel hê en mense help om krom paaie reguit te maak: Paulus skryf:
“...sodat julle onberispelik en opreg kan wees, kinders van God sonder gebrek te midde van ’n krom en verdraaide geslag onder wie julle skyn soos ligte in die wêreld (Fil.2:15).
Daarom is kennis van die Bybel onontbeerlik vir die geloofslewe. Die Bybel is God se handleiding wat ons leer om vir God afgesonder in ʼn sondige wêreld te leef. Maar nie net dit nie; die Bybel het ook vir gelowiges raad met hul eie swakhede. Dis ʼn vaste fondament as dit voel dit asof alles om ons ineenstort.
Dawid sê: “Want die golwe van die dood het my omring, strome van onheil het my oorval. Bande van die doderyk het my omring, strikke van die dood het my teëgekom. Toe ek benoud was, het ek die HERE aangeroep... en uit sy paleis het Hy my stem gehoor....” (2 Sam.22:5-7).
Die Bybel leer ons om reg te leef sodat ons ook reg kan sterf. Niemand leef verkeerd, maar sterf reg nie. Om reg te sterf, moet jy reg leef. En hoe sal jy sonder kennis van God se Woord weet hoe om reg te leef? Jy sal nie!
Daarom is kennis van die Bybel meer werd as ’n universiteit vol geleerdheid. Maar hoe verkry mense kennis van die Bybel? Deur saans so ʼn stukkie te lees en jouself te troos dat jy darem Bybel lees? Allermins! Om maar net ʼn stukkie te lees, troos hoogstens die gewete.
Om kennis van die Bybel te verkry, moet ʼn studie van die Bybel gemaak word. Daarvoor moet tyd ingeruim word. Baie sê dat hulle nie tyd het nie. Dis ʼn leuen! Wie so sê, het dinge in hul lewe wat belangriker as die saak van die Here. Elkeen maak tyd vir die dinge waarvoor jy lief is – prioriteite!
Geen mensekennis vergelyk met kennis van God nie. Jy sien jou gesig in ʼn spieël, maar jou siel in die Bybel. Die Wet van God toon vir ons die siekte van ons siel aan en die Evangelie die geneesmiddel. Daarom lê die antwoord vir die mens se probleme binne die twee buiteblaaie van die Bybel opgesluit. Mense moet net oopmaak en lees!
Sonde laat mense enigiets met die Bybel doen behalwe om hul te leer hoe om daarvolgens te leef. Sommige mense sê dat God niks vir hulle sê nie. Hoe kan Hy vir hulle iets sê as hulle Bybels dan toe bly?! Ander kla weer dat die Bybel hulle aanstoot gee. Dit kan gebeur. As die Bybel op mense se tone trap, is dit besmoontlik omdat hul voete in die verkeerde rigting loop!
Vir gelowiges beteken die Bybel alles. Luister wat sê Ps.119 van die Bybel:
Dis ons lewenskompas: “Waarmee sal die jongeling sy pad suiwer hou? Deur dit te hou na u woord” (:9)
Dis ons gids: “Ek wil u bevele oordink en op u paaie let” (:15).
Dis ons vreugde: “Ek sal my verlustig in u insettinge, u woord sal ek nie vergeet nie” (:16).
Dis ons helper: “Ja, u getuienisse is my verlustiging, my raadsmanne” (:24).
Die Bybel verseker ons van God se ewige beloftes:
“Vervul aan u kneg u belofte wat pas by u vrees” (:38).
Die lig van die Bybel verhoed dat ons in die slagysters van die vyand trap:
“Vermeteles het vir my kuile gegrawe, hulle wat nie lewe na u wet nie” (:85).
Niemand bereik ʼn bestemming in die donker as hy die pad nie kan sien nie. Dis waar die Bybel van onskatbare waarde is – dit verlig die pad en help ons om gevare te vermy, waarvan om in die hel te beland die heel grootste is. Luister na die ontslape ryk man in Luk.16 se versoek aan vader Abraham:
“En hy sê: Ek bid u dan, vader, om hom na my vader se huis te stuur —want ek het vyf broers — om hulle dringend te waarsku, sodat hulle nie ook in hierdie plek van pyniging kom nie”.
Luister wat antwoord Abraham hom:
“Toe sê Abraham vir hom: Hulle het Moses en die Profete; laat hulle na dié luister” (Luk.16:27-29).
Wat sê Abraham? Hulle het die Bybel, laat hulle dit lees!
Om reg te leef, moet ons in ooreenstemming met die lig van God se Woord leef en ʼn baie duidelike keuse vir Jesus in ons lewens maak. As ons dit doen, sal ons vir seker ons reis voltooi en by die Nuwe Jerusalem aankom. Wat kan wonderliker as dit wees? Aardse reisigers wat by hul hemelse bestemming aankom!