Gedagtes vir elke dag
Of lees almal by Gedagtes vir elke dag
Ons leef elke dag in die leuen. Die leuen sit by mense blykbaar in die bloed, van die grootste meneer tot die kleinste kindjie, wat met 'n leuentjie tuiskom. Die leuen het blykbaar burgerreg verkry. Waarom? Om die Waarheid te ken en uit te leef beteken om Jesus Christus as persoonlike Verlosser en Saligmaker te ken. Hy is immers die weg, die waarheid en die lewe. En die wêreld het Hom nie geag nie...
D A N I Ë L (2)
Die Profeet van die Here wat die heidense konings onderrig het
Dr JP Botha
Lees reeks by D A N I Ë L
Die Here het toe die oplossing van die droom se geheim in die nag aan my gegee. Die volgende môre het ek die Koning van die hemel geloof en gesê:
Loof die Naam van God
vir altyd, ja, altyd;
Aan Hom behoort wysheid
en krag;
Hy bepaal tye en geleenthede;
Hy sit konings af
en stel konings aan;
Hy gee wysheid
vir dié wat wys is
en kennis vir dié wat insig het;
Hy maak dinge oop
wat diep en weggesteek is;
Hy weet wat in die donker gebeur
en by Hom is daar lig;
Ek loof en prys U,
God van my voorouers;
U het my wysheid en krag gegee;
U het my ingelig
oor wat ons van U gevra het;
U het my ingelig oor die droom van die koning."
Die volgende môre is ek toe na Arjok toe, wat opdrag gehad het om die raadgewers in Babel dood te maak. Ek het aan die arme onskuldige mense gedink en aan Arjok gesê: “Moet tog nie die raadgewers van Babel doodmaak nie. Bring my voor die koning dat ek sy droom vir hom kan uitlê.”
Arjok se gesig het gestraal van blydskap toe hy my haastig na die koning toe neem, want sy eie lewe het ook maar aan ‘n draadjie gehang as hy weens jammerhartigheid nie al die towenaars en besweerders bykom en doodmaak nie.
Toe ek by Nebukadnesar kom, spreek hy my op my ander naam aan en vra: “Beltsasar, kan jy regtig sê wat ek gedroom het en wat dit beteken?”
Ek antwoord toe met groot klem en erns: “Daar is geen raadgewer, besweerder, towenaar of sterrekyker wat die geheim vir die koning kan verklaar nie. Maar die God van die hemel weet alles en kan geheime verklaar. Hy het in die droom vir koning Nebukadnesar bekend gemaak wat aan die einde van die dae sal gebeur. U het daar op u bed gelê en dink aan die toekoms. Toe het God u in u droom wat gevolg het, laat sien wat in die toekoms gaan gebeur. Hy het die geheim ook vir my verklaar, nie omdat ek slimmer is as iemand anders nie, maar omdat Hy wil hê dat die koning moet verstaan waaroor u gedink het.
“O koning, u het daar ‘n groot beeld voor u gesien staan. Dit was ‘n baie groot en blink en vreesaanjaende ding. Sy kop was van fyn goud gemaak, sy lyf en arms van silwer, sy onderlyf en heupe van brons, sy bene van yster en sy voete deels uit yster en deels uit klei.
“Onderwyl u so daarna gestaan en kyk het, het daar ‘n groot klip iewers losgeraak en die beeld se voete van yster en klei getref en dit verpletter. Toe het die hele beeld inmekaar gestort. Dit het heeltemal verbrokkel en verpoeier en is soos kaf in die wind totaal weggewaai. Die rots wat die beeld verpletter het, het ‘n groot berg geword wat die hele aarde bedek het.
“Dit is wat u gedroom het, o koning. Ek gaan nou vir u sê wat dit beteken: Die God van die hemel het u die koning van die konings gemaak. U is daardie kop van goud. Die God van die hemel het vir u ‘n magtige koninkryk en mag en aansien gegee. Hy laat u regeer oor die hele mensdom, die diere in die veld en die voëls in die lug. U is die kop van goud.
“Na u kom daar ‘n kleiner koninkryk en na hom kom ‘n derde koninkryk van brons om oor die wêreld te regeer. Daarna sal ‘n vierde koninkryk so sterk soos yster wees. Dit sal al die ander koninkryke vernietig. Dit sal opgevolg word deur ‘n koninkryk wat deels sterk soos yster en deels broos soos klei sal wees.
“Dan sal God ‘n koninkryk oprig wat nooit tot niet sal gaan nie. Dit sal soos ‘n rots losbreek en al die ander vernietig. Dit staan vas dat God dit aan die einde van die dae sal laat gebeur. Hy het dit alles met u droom aan u bekend gemaak.”
Die verklaring van die koning se droom het groot eer aan my besorg. Nebukadnesar het diep voor my gebuig en opdrag gegee dat daar offers aan my gebring en wierook vir my gebrand moes word.
Die groot Nebukadnesar het vir my gesê: “Sowaar, jou God is die God van alle gode en die Heer van alle konings. Hy los raaisels op, want jy kon die geheim vir my verklaar.”
Die koning het my bevorder en my baie geskenke gegee. Hy het my aangestel as regeerder oor die provinsie van Babel en as leier van al sy raadgewers. Toe stel hy op my versoek vir Sadrag, Mesag en Abednego aan as die drie regeerders`van die provinsie Babel.
DIE DRIE MANS IN DIE BRANDENDE OOND... vervolg