Gedagtes vir elke dag
Of lees almal by Gedagtes vir elke dag
Is teënspoed en smart ’n voorwaarde vir geestelike groei? Moet ’n mens swaarkry om vir God iets te beteken? Nee, dis nie ’n absolute voorwaarde nie. Nogtans praat die Here dikwels duideliker met ’n mens in tye van teënspoed. As dit net goed met jou gaan, kan ’n mens later dink dat jy God nie meer nodig het nie.
DIE SKAAPWAGTERS
BYBELVERHALE VIR JONG KINDERS (3)
Lees almal Bybelverhale vir jong kinders
Jacqueline Sibley
Eenmaal was daar 'n skaapwagter. Hoe sy naam was weet ons nie, maar ons noem hom sommer Benjamin. Benjamin en sy maats het saam skape opgepas.
Een nag is hulle op 'n heuwel net buite die dorpie Betlehem. Dit is baie koud en Benjamin trek sy mantel aan om hom warm te hou. Hulle maak 'n groot vuur. Die leeus en bere wat so graag die lammertjies opvreet, is bang vir die vuur. Die vuur hou ook die skaapwagters warm. Benjamin gaan lê naby die vuur om te slaap. Hy kan die sterretjies in die lug sien skitter. Hy hoor ook hoe die skape saggies blêr.
Van die ander skaapwagters lê ook naby die vuur en slaap. 'n Paar van hulle moet wakker bly want dit is hulle beurt om na die skape te kyk. Hulle moet kyk dat die skape nie van die trop af wegloop en verdwaal nie. Hulle moet ook sorg dat die bere en die leeus nie naby die skape kom nie.
Skielik sien Benjamin 'n lig. Die lig is baie helder. Dis helderder as die vlamme van die vuur en die flikkerende sterre. Hy weet nie wat dit is nie. Hy spring op en kyk rond. Toe sien hy 'n engel.
Hy het nog nooit vantevore 'n engel gesien nie en hy is bang. Hy kyk na sy vriende. Hulle het ook die engel gesien. Hulle kniel op die grond en verberg hulle gesigte. Hulle waag dit nie om na die engtel te kyk nie. Hulle is te bang.
Die engel weet dat hulle bang is. Hy sê vir hulle: "Moenie bang wees nie, want kyk, ek bring vir julle goeie nuus. Vandag is die Seun van God in Betlehem gebore. Julle sal weet dat dit Hy is as julle 'n Kindjie vind wat in doeke toegedraai is en in 'n krip lê.
Skielik sien Benjamin 'n klomp engele. Hulle sing 'n pragtige lied om God te prys. Benjamin luister na hulle lied. Hy het nog nooit iets gehoor wat so mooi is nie. Hy wonder of hy net droom. Toe hou die lied op en die engele gaan weg.
'n Paar van die skaapwagters vryf hulle oë. Party staan op. 'n Ruk lank is almal doodstil. Toe sê een van die ouer mans: "Waarom staan ons dan nog hier? Ons moet dadelik na Betlehem gaan. Ons moet hierdie Baba gaan soek waarvan die engel vertel het."
"Natuurlik moet ons gaan," sê 'n ander skaapwagter.
"Ja! Ja!", sê Benjamin en al die ander.
Die skaapwagters los hulle skape net daar op die heuwel. So vinnig as hulle kan, gaan hulle na Betlehem. Benjamin is opgewonde. Hy kan nie wag om daar te kom nie.
Sommer gou is hulle in Betlehem en hulle kry die stal waar Maria en Josef bly. Saggies gaan die een skaapwagter die stal binne. "Mag ek en my vriende asseblief na julle Baba kyk?" vra hy vir Maria.
"Natuurlik mag julle," antwoord Maria.
Al die skaapwagters kom toe binne om na die Baba Jesus te kyk. Hulle is baie stil want hulle wil nie die Baba skrikmaak nie. Hulle het goeie persentjies vir Hom gebring en sit dit saggies langs Hom neer.
Benjamin kyk ook na die Baba. Hy is toegedraai in doeke en lê in 'n krip net soos die engel gesê het. Hy is baie, baie klein. Toe al die skaapwagters hom gesien het, vra Josef vir hulle: "Hoe het julle geweet dat 'n Baba gebore is?"
Die skaapwagters vertel toe vir Maria en Josef wat op die heuwel gebeur het. Benjamin kyk na Maria. Sy luister aandagtig na wat die skaapwagters vertel.
Maar eindelik moet hulle weer gaan. Een skaapwagter sê:" Dankie dat ons na die Baba kon kyk. Nou moet ons weer teruggaan na ons skape wat ons daar op die heuwel gelos het."
Toe gaan hulle almal terug na hulle skape. Hulle is baie bly dat hulle die Baba Jesus gesien het. Elkeen sê vir God dankie dat Hy die engele gestuur het om vir hulle die wonderlike nuus te bring. Benjamin sê ook vir God baie dankie. hy weet dat hy hierdie wonderlike nag nooit sal vergeet nie.
GEBED
Dierbare God, ek is bly dat die engel vir die skaapwagters van die Baba Jesus vertel het. Dankie ook vir al die mense wat my van Hom vertel.
AMEN
Om dankie te sê... vervolg