Daar was deur baie jare reeds talle sogenaamde sieners in die verlede wat geroem het oor hulle visioene. Maar min van hulle was Christene en maar min van hulle het so in die kol soos Siener van Rensburg en Johanna Brandt voorspel wat met Suid-Afrika baie jare later as hulle eie leeftyd, sou gebeur. Daar is genoeg rede om te glo dit is omdat die Here daardie vooruitskouinge aan hulle gewys het – as kinders van die Here kon hulle daardie beelde nie gefabriseer het nie.

So was daar nog ‘n persoon in die vorige eeu waarvan min mense bewus is maar wie baie interessante voorspellings oor wêreldtoestande in toekomstige tyd gemaak het,veral oor die uitbreek en verloop van die Derde Wêreldoorlog. En meer spesifiek moet ons hier Siener van Rensburg se voorspelling uitlig waar hyself in 'n visioen Engeland onder die water sien verdwyn het, “want", het Siener gesê, "God gaan Engeland op hierdie manier straf vir al die verskriklike dinge wat hulle aan talle lande, en ook aan die Afrikanervolk gedoen het.”

Alois Irlmaier was 'n eenvoudige Duitser, amper so eenvoudig wat Siener van Rensburg was. Irlmaier wat in 1959 oorlede is het in sy leeftyd talle visioene gehad. Probleme met die Midde-Ooste is onder andere ingelui met ‘n moord op ‘n vooraanstaande persoon, waarvan Irlmaier gesê het:

"Ek sien' n grote wat val, 'n bloedige dolk lê langs hom— dan is slag op slag ... Die twee moordenaars is deur ander betaal om dit te doen. 'n Derde persoon sterf, en dis oorlog. Die een moordenaar is 'n kleingeboude swart man, die ander 'n bietjie groter met helderkleurige hare. Ek dink dit vind plaas in die Balkan, maar is nie seker nie..."

Soos wat Adriaan Snyman dit verwoord het is die verloop van gebeure dat die oorlog met ‘n dagbreek begin en vinnig eskaleer. Die boere sal nog in die kroeg sit en kaartspeel, dan kyk die soldate van 'n ander land by die vensters en deure in. So ver as Regensburg is daar geen brûe oor die Donaurivier nie.

Massas eenhede marsjeer van die ooste af na Belgrade. Drie gepantserde magte kom teen 'n hoë spoed en sonder vooraf waarskuwing van die Donaurivier af oor Wes-Duitsland na die Rynrivier. Die bevolking slaan paniekbevange op die vlug na die weste. Baie motors blokkeer die paaie. Alles wat 'n hindernis in die pad van die oprukkende tenks is, word platgery — motors inkluis. Irlmaier sien geen brûe verder as Regensburg nie en byna niks bly van Frankfurt oor nie. Die Rynvallei word vernietig, hoofsaaklik deur lugaanvalle.

Rusland val Europa met drie speerpunte binne. Die eerste deur die woude al langs die Donau deur Praag, tot by die Bavariese woude en die noordweste. Die tweede speerpunt gaan van oos na wes oor Sakse, en die derde kom van die noordooste na die suidweste. Vliegtuie vlieg soos 'n swerm wit duiwe op. Die Russe stop nêrens nie. Dag en nag storm hulle in gelid om die Ruhrvallei te bereik waar daar baie oonde en vuurmaakplekke is.

Die geel draak, Sjina, val Alaska en Kanada binne, maar kom nie ver nie. Die vliegtuie laat bomme val in 'n lyn wat 'n geel stof uitsprei. Hulle gooi ook die geel stof af tussen die Swart- en Noordsee. So word 'n doodsgebied geskep so wyd as die helfte van Bavaria. In hierdie gebied kan niks oorleef nie en die Russe se voorrade word afgesny.

Dit sal 'n helder nag wees wanneer hulle dit begin gooi. Die tenks rol voort, maar die soldate in die tenks word heeltemal swart wanneer hulle die stofgebied inry. Waar die stof val, gaan alles dood —geen bome, geen bosse , geen vee, geen gras —alles ver lep en word swart. Die huise bly staan. Enigeen wat oor die stofstreep gaan, sterf. Dan begin alles by die speerpunte verbrokkel.  Hulle moet almal na die noorde gaan. Wat hulle by hulle het, gooi hulle weg. Niemand sal weer terugkom nie.

Eskaders vliegtuie styg op. Twee gaan na die gevegsfront tussen wes en suidwes. Die eskaders draai na die noorde en sny die pad van die Derde Leër af. Uit die ooste kom ruspertenks, maar almal daarin is dood. Die voertuie hou net aan met loop tot waar hulle vanself gaan staan. Hier gooi die vlieëniers ook klein, swart houers af. Dit ontplof voordat dit die grond raak en versprei 'n geel of groen stof wat lyk soos rook. Wie ookal in kontak met die rook kom, sterf. Die gif is so erg dat die mense swart word en die vlees van hulle beendere afval. Vir 'n jaar daarna groei geen organisme daar nie. By die Ryn is die aanval uiteindelik afgeweer.  Uit die speerpunte sal niemand huis toe gaan nie. 'n Natuurlike katastrofe of iets soortgelyks sal veroorsaak dat die Russiese leërmag na die noorde uitwyk. Die laaste veldslag sal rondom Cologne plaasvind. Hulle vlieg na die noorde. In die middel is daar 'n gebied waar niks leef nie. Dan vlieg hulle na die verre noorde waar die derde speerpunt ingekom en alles afgesny het. Hulle sterf almal, geeneen van hierdie leërs sal huistoe gaan nie.

Hy sien 'n enkele vliegtuig van die ooste of aangevlieg kom wat iets in die water laat val en dan gebeur iets vreemds. Die water styg hoër as 'n toring, val dan terug en alles word oorstroom. Daar is ‘n aardskudding en die helfte van Engeland gly in die water. Drie groot stede van Engeland word ook vernietig. Die een deur water, by die tweede styg die see so hoog dat jy net die kerktoring sien, en die derde stad val in die water.

Die lande aan die kusgebied word oorstroom. Die see is baie onstuimig, die golwe styg so hoog soos huise en skuim asof dit ondergronds kook. Eilande verdwyn, die klimaat verander. Januarie sal so warm wees dat die muskiete dans, sê Irlmaier.

Daar kom 'n groot donkerheid wat 72 uur sal duur. Dan val hael, gepaard met weerlig en donderslae, en 'n aardskudding laat die aarde vibreer. Moenie na buite gaan nie. Daar sal net kerslig wees. Mense wat die rook inasem, krimp ineen en sterf. Moenie die vensters oopmaak nie, maak dit dig met swart papier. Alle oopstaande water sal giftig word, en ook alle voedsel wat nie in houers toegemaak is nie. Moet ook nie voedsel in glas bewaar nie, want dit sal nie heeltemal toegemaak kan word nie. Buite gaan die dood deur die rook voort en baie mense sterf.

Na 72 uur is alles verby. Maar hou die kerse aan die brand. En bid ernstig. Oornag sal daar meer mense sterf as in die twee vorige wêreldoorloë. Moenie 'n venster vir 72 uur oopmaak nie.

Die riviere sal so min water hê dat 'n mans daardeur kan loop. Die vee sal vrek, die gras word geel en droog, die dooie mense sal geel en swart word. Die wolke van die dood dryf na die ooste.

In die stad met die ystertoring (Parys) breek daar rewolusie uit. Die inwoners steek die stad aan die brand en dit word met die grond gelykgemaak. In Italië heers ook chaos. Duisende mense word vermoor, en die pous slaan op die vlug. Baie kerklikes sal ook doodgemaak word en baie kerke stort in duie. Die eilande (dele van Engeland) aan die kusgebiede sink as gevolg van die woeste see en getygolwe. Daar is ook groot openinge in die see wat weer vol raak wanneer die enorme golwe terugtrek. Daar breek  ‘n revolusie in Rusland uit, asook'n burgeroorlog. Die lyke is so baie dat hulle nie meer van die paaie verwyder kan word nie. Die Russe glo weer opnuut in God. Die grotes onder die partyleiers pleeg selfmoord. Hy sien 'n rooi massa, gemeng met geel gesigte, dit is opstande en verskriklike moorde.

Hy sien drie neges as 'n tydsaanduiding, maar weet nie hoe dit bereken moet word nie. Die derde nege bring vrede. Na alles verby is, het 'n baie groot deel van die volke gesterf en die mens vrees God opnuut. Aborsies word weer verbied, en daar is vrede en 'n goeie tyd breek aan. "Na hierdie gebeure breek 'n lang en vredevolle tyd aan, en die wat dit ervaar sal baie voorspoedig  wees en kan hulleself gelukkig ag. Maar die mense sal weer van vooraf moet begin, daar waar hulle voorouers begin het."