Gedagtes vir elke dag
Of lees almal by Gedagtes vir elke dag
Wie weet wat reg is, maar dit nie doen nie, moet nooit God se seën verwag nie, maar eerder sy straf.
NUWEJAAR- VOORNEMENS
Aan die begin van elke nuwe jaar neem baie mense hulle mooi dinge voor. Ongelukkig word sulke nuwejaarsvoornemens gou verbreek omdat dit nie lewendig gehou word nie. Dis soos ’n kind wat gebore word, maar nie gevoed word nie. As ’n goeie voorneme nie gevoed word nie, sterf dit. So ook geestelike voornemens. Een van die mooiste voornemens in die Bybel staan in Jos.24:15: “….maar ek en my huis, ons sal die Here dien”.
Geestelike voornemens is voortrefliker omdat ander voornemens in die mens se eie krag onderneem word. Met geestelike voornemens vra ons God om hulp en slaag derhalwe makliker daarin.
Een van die beste voornemens is om van alle psigiese en emosionele rommel in ons lewe ontslae te raak en vir onsself te sê: “Ek sleep dit nie verder saam met my nie”. Dis nie maklik om daarvan ontslae te raak nie, maar wel die moeite werd. Ons het uiteraard net een lewe op aarde en sal eendag daarvan rekenskap moet gee.
Wat is psigiese rommel? Onvervulde drome, gebroke verhoudings of een of ander verslawing waarvan ons nie ontslae kan raak nie. Dit beroof ons van ‘n gehalte-lewe. Baie mense gee moed op en sê: “Ek sal dit nooit oorwin nie” . Dis presies wat die Satan wil hê – Hy wil ons gedagtewêreld voorskryf. Dis die begraafplaas van goeie voornemens! God wil hê dat ons anders moet dink want dan alleen sal ons voornemens seëvier.
God sien in elke kind van Hom wonderlike moontlikhede raak. Nie mislukkings en rommel nie, maar eerbare, voltooide produkte. Sonde maak van lewens puinhope. Net God kan ons help om ons stukkende lewens te herbou. Hy weet wat die struktuur kort om dit sterk te maak omdat Hy die menslike herbou-proses baie goed ken.
God hou nie van stukkende dinge nie. Sy werke getuig van voltooiing. Let op die skepping; alles wat Hy begin het, het Hy voltooi. Daar is niks half voltooi of stukkend nie. Sonde het die wêreld stukkend gemaak en mense is gefrustreerd daarmee. Ook met ons eie stukkendwees. Satan sê vir ons: “Los maar jou mooi voorneme en aanvaar dat jy nooit sal verander nie”. En ons luister soos ’n Eva van ouds na hom; die einde van nog ’n goeie voorneme!
God het ’n plan met ons ook in hierdie nuwe jaar wat wag. Hy wil ons help om ons geestelike mure te herbou sodat ons vir die finale aanslag van Satan sterk kan wees. Jesus se wederkoms is naby!
Hoe lyk ons geestelike mure? Kan ons die vyand trotseer of moet dit herbou word? Wees gewaarsku dat die herbou daarvan met hewige teenstand gepaard gaan! Satan los gelowiges nie uit nie en gebruik mense om ons te ontmoedig; selfs vanuit bekende oorde.
Nehemia was ‘n gelowige wat ’n geestelike voorneme gehad het wat verwerklik het. Na die val van die Babiloniese ryk, is die ballinge toegelaat om onder sy leiding na Jerusalem terug te keer. Sy geloof in God en liefde vir sy volk het van hom ’n besondere volksleier gemaak.
Toe die ballinge terugkeer, was hulle ontsteld om Jerusalem se mure in puin te vind. God het egter in Nehemia ’n begeerte laat ontvlam om die mure te herbou, iets wat tot ’n nasionale bewussyn onder die vrygeworde Jode sou lei en hulle sou saamsnoer. Die Samaritane, ’n basternasie wat in die omgewing gewoon het, wou dit verhoed omdat dit hulle as volk sou uitsluit. Gevolglik het hulle die Jode die stryd aangesê, maar ten spyte van al die teenstand is die mure in 52 dae herbou.
Wat was Nehemia se geheim en/of wenresep? Om dit te weet sal ons help om ons goeie voornemens uit te voer. Een van die kernbestanddele van Nehemia se wenresep was dat hy hom nie deur die vyand van stryk laat bring het nie. Hoe meer hulle hom beledig en probeer ontmoedig het, hoe sterker het sy voorneme geword.
Die Samaritaanse leier en sy bondgenote het gespot toe die muur begin vorm aanneem: “.Wat maak die magtelose Jode? Sal ’n mens hulle laat begaan? Sal hulle die klippe uit die grondhope lewendig maak, al is dit deur brand verniel? En Tobia, die Ammoniet, het langs hom gestaan en gesê: Wat hulle ook al bou – as ’n jakkals daarteen opspring, sal hy die klipmuur omgooi” (Neh.4:2,3).
Satan bespot ons geloof en werke sodat ons moet ophou. Hy haat heel mense. Almal moet stukkend wees soos hy! As Nehemia destyds na Satan geluister het, was dit neusie verby met sy voorneme. Ja, sodra ons na Satan begin luister, sneuwel ons voorneme!
Gelowiges is in ’n daaglikse stryd gewikkel: “Ly dan verdrukking soos ’n goeie krygsman van Jesus Christus. Niemand wat ’n krygsman is, wikkel hom in die werksaamhede van die lewensonderhoud nie, sodat hy die een kan behaag wat hom vir diens gewerf het” (2 Tim.2:2,3).
Met die werksaamhede van die lewensonderhoud bedoel Paulus die sorge van die lewe. Ons mag nie toelaat dat dit ons geestelike spoed breek nie. Gelowiges laat dit aan God oor. Wie daarin verstrengel raak, sien nooit die lig nie.
Kommer oor die lewe is een van die groot redes waarom gelowiges se voornemens misluk. God wil hê dat ons sterk en moedig in sy diens moet staan. Hy het menigmaal vir Josua gesê om sterk en moedig te wees. Josua het die vyand die stryd aangesê en oorwin omdat vrees hom oorweldig het nie, selfs nie toe die verspieders terugkom en sê dat die Kaänaniete te sterk is nie. En God het Josua die beloofde land gegee.
God verwag van ons om soos soldate slaggereed te wees en die res aan Hom oor te laat. Selfs al spot die vyand met ons, moet ons doen wat Nehemia gedoen het – ons moet bid. “Hoor, onse God, dat ons ’n veragting geword het; en bring hulle smaad op hulle hoof” (Neh.4:4). Nehemia het nie toegelaat dat die vyande sy geestelike spoed breek nie, maar God om hulp gevra. Dis wat ons ook moet doen. As die vyand ons voornemens bespot, bid God om met hulle af te reken!
As ons in ons hart oortuig is dat ons die regte ding doen, moet ons nooit ophou nie. Nehemia het geweet dat hy die regte ding in God se oë doen en nie gestop nie. Ten spyte van al die teenstand is die mure herbou. Sy geloof en geesdrif was aansteeklik “...en die volk was met hulle hart in die werk” (Neh.4:6)
Ons laat miskien die vyand te maklik toe om ons tot stilstand te bring. En as ons eers gaan staan, sneuwel ons voorneme. Wees eerder bly as die vyand jou aanval, want dan beteken jy iets vir God. As die vyand ons nie aanval nie, beteken dit dat ons nie ’n bedreiging vir hom is nie en skort daar moontlik iets met ons geloofslewe. Gevolglik moet ons nooit ophou om goed te doen en ons geestelike voornemens te verwerklik nie. Dit bedreig die koninkryk van die bose!
Die vrygeworde Jode se voorneme het van God gekom. Om dit te verwerklik, het hulle selfs ’n gewapende mag op die been gebring om hulle dag en nag teen vyandige aanvalle te beskerm. Toe die Samaritane hoor dat die Jode vordering met die muur maak, het hulle so gedreig, dat sommige Jode uit vrees vir hul lewe die bouwerk gestaak het.
Satan wil gelowiges ontmoedig. Daarom moet ons oë op Jesus ons Leidsman en Voleinder gevestig bly. Nehemia het hom nie laat ontmoedig nie en sy volk gedurig bemoedig. As God vir hulle was, wie kon teen hulle wees? God is baie groter as die vyand. Let op die geseënde wisselwerking – God het Nehemia bemoedig en Nehemia die volk. Wat ’n leier!
“En toe ons vyande hoor dat dit aan ons bekend geword het en God hulle plan verydel het, het ons almal teruggegaan na die muur, elkeen na sy werk. En van dié dag af was die helfte van my mense besig met die werk en die ander helfte het die spiese en skilde en die boë en die pantsers gehou, terwyl die owerstes agter die hele huis van Juda gestaan het. Van die bouers aan die muur het die lasdraers hulle werk so gedoen, dat hulle met die een hand die werk verrig het, terwyl die ander hand die werpspies vashou” (Neh.4:15-17).
Ons leer baie van geestelike oorlogvoering uit hierdie verhaal. Satan hou nooit op om gelowiges aan te val nie. Hy wil dat ons ophou om aan God se koninkryk te bou en ons goddelike roeping en voornemens versaak. Daarom moet ons die Woord van God soos ’n wapen in ons hart dra as die vyand aanval. Onthou, ons veg nie alleen nie, God veg vir ons. “… onse God sal vir ons stry” (Neh.4:20).
Dit maak nie saak wat mense sê nie. As hulle nie met ons werk vir die koninkryk van God saamstem nie, is dit hulle saak. Dit mag nooit ons goddelike voorneme of roeping laat sneuwel nie. Ons moet eerder die geselskap van mense opsoek wat ons geestelik stig; mense wat ons ondersteun en bid. Daar is baie Sanballats en Tobiase in die wêreld wat daarop uit is om gelowiges te breek. Gelukkig hang die uitslag van die stryd nie van onsself nie maar van God af. Hy sal ons nooit in die steek laat nie, maar eerder vir ons veg. Gelowiges is altyd aan die regte kant.
Laat ons egter eers die rommel in ons eie lewens opruim. Moenie tussen rommel bou nie. Ons het skoon grond nodig. Moenie die ou rommel verder saamsleep nie!