Gedagtes vir elke dag
Of lees almal by Gedagtes vir elke dag
Geduld is om 'n moeilike situasie van God te aanvaar sonder om Hom 'n einddatum daarvoor te gee.
DIE GEVAAR VAN GROEPSDENKE
Lelani Gouws
Mens kan beswaarlik vandag meer 'n mening lewer sonder om onmiddelik deur die aanhoorders in 'n spesifieke kamp geplaas te word.
Min mense besef dat ons selde ons gesonde verstand gebruik, maar almal toenemend onsself in "tonnels" bevind, deur te dink en te praat soos van ons verwag word. Gedagtestrominge wat beheer word deur wat ons gevoer word oor die Internet en van platforms op sosiale media waar almal deesdae 'n opinie het om te lug op alles, van die mees onbenullige sakies tot die belangrikste kernpunte van die samelewing. Hulle beheer hoe ons dink oor die wêreld en ons samelewing. Almal het deesdae 'n mening, en omdat almal 'n mening het, het niemand meer 'n standpunt nie, want jou standpunt, al is dit die waarheid is maar net...wel, jou mening. Al spreek jy ook in alle nugterheid die waarheid, gebruik jy jou gesonde verstand op die mees logiese manier, dit bly maar net jou mening en word as sulks gesien deur die "groep".
Om in 'n groep te gesels vandag dra twee baie merkwaardige kenmerke: as jy populêr wil wees, moet jy praat soos die groep oorwegend wil hê. Dan kry jy "likes". Sodra jy buite die bekende verband tree, sink jy in populariteit en jou stem raak stil. Die probleem egter, wanneer mens praat soos almal wil hê of wil hoor jy moet praat ten einde jou stem te behou, is dat jy dan nie meer praat met jou gesonde verstand nie, maar net wat die groep wil hoor. Beide maniere verswelg jou stem. Jy kan dus nie meer krities kyk na 'n saak nie, omdat die oomblik wat jy krities kyk, jy onmiddelik in die kamp van die vyand geplaas word en jy sink in populariteit of val heeltemal daar uit. Jy sê nie meer jou sê nie, en niemand kry 'n kans om na 'n broodnodige kritiese aspek van 'n saak te kyk nie. Sê dit egter, en jy raak onpopulêr. Op beide maniere verloor jy jou stem. Die meeste mense sê wat hulle weet die groep wil hoor, want dan bly hulle darem in die groep en raak gewild. Dit is hoe groep-denke en uiteindelik groepdruk, ontstaan.
Die gevaar hiervan lê in die feit dat niemand meer krities na 'n saak kan kyk nie en belangrike sake kan tans nie meer bespreek word nie, want die oomblik wat jy dit doen, val jy in die "kamp" van die vyand en word onmiddellik gesien as "verkeerd" of "dwars" of selfs nog erger "soos die vyand".
Dit is een van die redes waarom ons tans al om en om die bos praat. Min van ons is bereid om die waarheid te praat, of uit die hart te praat, omdat almal weet die oomblik wat jy dit doen, jy in kampe gejaag word sonder dat jou mening nugter oorweeg gaan word of stilgeskree gaan word deur negatiewe kommentaar. Te veel stemme met 'n mening op alles, beteken geen stem is hoorbaar nie, selfs nie eens dié van die mees nugter denker in 'n groep nie. Dit is 'n ernstige probleem, want so word die stem van die waarheid dikwels verswelg op die straat onder die lawaai van die geskree by die mark.
Dit is die vernaamste wapen van propaganda. Dit is ook die vinnigste manier om vals nuus te saai, mense geen idee te gee van wat werklik aan die gang is nie en elkeen maar net sy eie mening te laat uitspreek, in plaas van die broodnodige waarheid. Dit is ook die maklikste manier om mense te beheer.
Om mense 'n kans te gee om in openheid krities na jou saak te kyk, beteken nie jy gee hulle kans om jou te besoedel met "nuwe" en "gevaarlike" idees nie. Dit beteken jy is verseker van jou saak, want as jy weet jy het die waarheid beet, waarom sal jy enige kritiek vrees? Dit skep dan juis die geleentheid vir gesprek.