Gedagtes vir elke dag
Of lees almal by Gedagtes vir elke dag
Gestel u staan op hierdie oomblik voor die wit troon, sal u bang wees? As u bang sal wees, het u dringend ‘n saak met God uit te maak.
WARE VRYHEID
Ds Andrè vd Berg
"Alleenlik die vryheid van Jesus sal die ellendevaart aan die suidpunt van Afrika omkeer en hierdie bitter siek land genees. Dit sal die einde aan die bose bedeling bring wat gelowiges al vir baie jare teister. So ook die stompsinnige politieke oorwinning wat jaarliks met ʼn openbare vakansiedag en opruiende toesprake as ʼn Vryheidsdag gevier word."
“.... en waar die Gees van die Here is, daar is vryheid” (2 Kor.3:17).
Afrika is versot op vryheid. Die ontworsteling aan sy eertydse koloniale gesag is juis met die slagspreuk Uhuru(vryheid) gevoer. In 1955 het kommuniste ʼn Vryheidsmanifes (Freedom Charter) uitgereik wat later die grondslag van die NG Kerk se omstrede Kerk en Samelewing publikasie geword het, waarmee sy die knie voor die volksvyand gebuig het. Ja, Afrika is versot op vryheid sonder om te weet wat dit in werklikheid is. Mense met vryheid op die lippe maar geen vrede in hul harte, leer nooit ware vryheid ken nie.
Almanakke dui 27 April as Vryheidsdag aan. Niks kan verder van die waarheid af wees as dit nie. Dis nie vryheid nie, maar ʼn karikatuur daarvan wat Jesus Christus, wat ware vryheid gee, buite rekening laat.
Hoe lyk ware vryheid? Paulus antwoord: “... en waar die Gees van die Here is, daar is vryheid”. Die teenoorgestelde gebeur in Suid-Afrika waar bose geeste onder die dekmantel van kultuur en voorvadergeeste vereer word. “Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug” (Efes.6:12).
Jesus en Satansagente kan nie gelyktydig gedien word nie. ʼn Land is òf met Jesus òf minus Jesus. Sonder Hom vergaan ʼn land onder opstand, geweld, stakings, ontwrigting ens. Want waar die Gees van God nie heers nie, kan daar nooit vryheid wees nie; slegs ʼn gebondenheid aan Satan en anargie. Hiervan getuig die misdaadsyfers gereeld. In die eerste vyf jaar van sg. demokratiese vryheid het misdaad met 717% gestyg! Dit wat deur geweld tot stand gekom het, kan slegs deur geweld in stand gehou word.
Valse vryheid is erger as oorlog. ʼn Vryheid wat eerder na oorlog lyk, sê net een ding – die vryheid van Jesus ontbreek! Ek wonder of 5% van die landsburgers weet wat vryheid is? Dit word nie met politieke oorwinnings verwerfnie. Dit kom uit die hand van Godwat aan landsburgers die reg gee om wettige dinge na hartelus te doen.
In die tyd van Jesus was Israel aan die Romeine onderhorig. Die Jode het so na politieke vryheid gestreef, dat dit hul godsdiens so gedikteer het, dat hulle die Messias nie herken het nie. Hulle het geglo dat Hy sou kom, maar nie as ʼn dienskneg nie, maar ʼn politieke bevryder wat die Romeinse bewind omver sou werp. Vir hulle het vryheid net een ding beteken – politieke mag.
Die Jode het geglo dat hulle ʼn reg op vryheid gehad het - menseregte. Nee, geen mens het regte nie; slegs voorregte en dit kom alles uit die hand van God. Vryheid is een daarvan; ʼn kosbare geskenk van die Allerhoogste.
God kan ʼn volk vryheid gee of dit wegneem soos wat die Bondsvolk met die twee ballingskappe gesien het. Vryheid en geloof is stalperde. As die Christendom afgetakel word, byt vryheid in die stof. Suid-Afrika is ʼn sprekende voorbeeld hiervan. Let op ons geskiedenis. Hoe het God gelowiges nie gebruik om ons Boerevolk se vryheid te beskerm nie!
Die Bybel was die Magna Carta van ons volk. Toe dit eerbiedig is, het dit met die land goed gegaan. Nadat die land aan booswigte oorhandig is wat die Christelike grondwet geskrap ten einde Jesus op gelyke voet met afgode en voorvadergeeste te plaas, het die regverdige God ons vryheid opgeskort en het ons die paaiemente van ons eie ondergang begin betaal. En ons betaal steeds!
ʼn Land wat Jesus nie as die enigste Verlosser vereer nie, ken geen vryheid nie, maar daaglikse vrees. Ons volk leef gedurig in vrees vir eiendom- en lewensverlies omdat die Gees van God ontbreek. “...en waar die Gees van die Here nie is nie, is daar nie vryheid nie”(Aanpassing)
As die Gees van God ontbreek, versaak mense en kerke die waarheid. Hulle sê en glo dinge wat nie met die Bybel strook nie. Slegs mense wat deur die waarheid vrygemaak word, is waarlik vry: “As die Seun julle dan vrygemaak het, sal julle waarlik vry wees” (Joh.8:36). Wie die Jesus-vryheid ontvang, gaan vreesloos deur die lewe. Hulle sal selfs soos Daniël se vriende vir hul geloof deur vuur gaan of soos Daniël tussen die leeus beland, en nie vrees nie!
ʼn Mens is of vry of gebonde. Die vryheid waarvan Paulus in die teksvers praat, is ʼn geestelike vryheid. Sonder geestelike vryheid hang staatkundige vryheid aan ʼn baie dun draadjie. En as geestelike vryheid nie ons volk se hoogste strewe is nie, trap ons in dieselfde strik as die Jode van ouds.
Net ʼn gelowige kan die wonder van geestelike vryheid ervaar omdat daar ʼn tyd in sy lewe was toe hy ʼn slaaf van die Satan was en hy uit vrye wil booshede verrig het. In Jesus word sondaars bevry. Wie gered is, is vry al is hy ook in ysterboeie. Wie verlore is, is ʼn slaaf van die Satan al is hy ook ‘n koning!
Laat ons nooit vergeet waarvan Jesus ons bevry het nie - van die las van sonde. Dis die swaarste las denkbaar! Kyk gerus na mense wat onder ʼn sondelas gebuk gaan. Daar is geen glimlag op hul gesig of glinstering in hul oë nie, slegs sugte, trane, wanhoop en nagmerries.
Sondelas mergel ʼn mens uit. Dawid getuig hiervan: “Welgeluksalig is hy wie se oortreding vergewe, wie se sonde bedek is. Toe ek geswyg het, het my gebeente uitgeteer in my gebrul die hele dag; want u hand was dag en nag swaar op my.... “ (Ps.32:2-4). Daarom sê Jesus: “Kom na My toe almal wat vermoeid en belas is en Ek sal julle rus gee” (Mt.11:28). Wat vra Hy? Verruil die slawemeester vir die hemelse Meester.
Christus bevry ons van ʼn ewige dood (hel). Daar is niks saliger as dit nie. In plaas van die dood ontvangdie oortreder die lewe. Dink hieraan: As ʼn koning ʼn moordenaar begenadig en vrylaat, kan hy nie meer gestraf word nie want die straf is opgeskort. Dit beteken nie dat hy nie aan die oortreding skuldig is nie. Hy is nog net so skuldigdaaraan. Die wet kan egter niks meer aan hom doen nie. So werk dit ook met God – wie hom tot Jesus bekeer, word deur die Koning van alle konings van die straf vrygespreek.
Die vrede van Godloop hand aan hand met vryheid. Niemand vrede kan hê sonder om ook geestelik vry te wees nie. Wie vrede in sy hart het, leef ook in vrede met sy medemens. Ware vryheid is nie duur nie. Die namaaksels is egter peperduur soos wat ons elke dag aan ons sak voel!
Alleenlik die vryheid van Jesus sal die ellendevaart aan die suidpunt van Afrika omkeer en hierdie bitter siek land genees. Dit sal die einde aan die bose bedeling bring wat gelowiges al vir baie jare teister. So ook die stompsinnige politieke oorwinning wat jaarliks met ʼn openbare vakansiedag en opruiende toesprake as ʼn Vryheidsdag gevier word.
Kom ons vra dan ten slotte: Wat is vryheid? ʼn Volgehoue godvresende leefwyse wat van die inwonende Gees van God getuig soos die teksvers sê: “.... en waar die Gees van die Here is, daar is vryheid”
Daarom beteken vryheid vir gelowiges iets anders as vir heidene wat glo dat dit hul reg is om te steel en te plunder. Nee, vryheid is om te doen wat jy in God se oë behoort te doen. En dis net moontlik as jy Jesus in jou lewe het. Mag ons geen ander vryheid begeer as daardie vryheid wat ons in ons gebondenheid aan God vind nie!