Gedagtes vir elke dag
Of lees almal by Gedagtes vir elke dag
As ek vandag by die Here kla,
Sal ek sê: "Ek is so jammer om te pla!
Maar die las word te swaar om te dra."
Dan sê die liewe Heer: "Jy mag maar kla.
Jy mag maar aanhou om vir my te vra!
Ek sal jou wel die krag gee om jou kruis te dra."
OPENBARING – BOEK VAN DIE HEDE (17)
Ds Andrè van den Berg
Lees reeks by Openbaring - Boek van die hede
Die Lam is waardig
Openb.5
1. Die hemelse erediens gaan voort
Die hemelse erediens wat in hoofstuk 4 begin is, word in hoofstuk vyf voortgesit en op die Lam oorgedra. Hoofstuk vier jubel oor die Skepper en hoofstuk vyf oor die Verlosser. Eers word God geprys waarna dit na die Lam oorgaan met die klimaks wanneer beide aanbid word (5:13; Joh.10:30). Jesus word as die Leeu uit die stam van Juda voorgestel en verskyn as Oorwinnaarslam wat geslag is (5:6). Hy neem stelling voor die troon in om die boekrol by God te neem (5:7,8). Hulle deel saam mee aan die oordeelsvoltrekking oor die goddeloses.
Die hoofstuk word grootliks aan ʼn vraag gewy: Wie is waardig om die seëls van die boekrol in God se hand oop te maak en die dramatiese fokus op die antwoord – die Leeu uit Juda. Dan volg die verassingselement wanneer nie ʼn leeu nie, maar ʼn lam verskyn.
2. Die boekrol
(i) Johannes sien ʼn boekrol in God se regterhand (ii) Is daar iemand waardig om dit oop te maak? (iii) Die Lam is waardig!
Die boekrol in God se regterhand is simbolies van krag en gesag. Dit herinner ook aan Eseg.2:9,10. Die boekrolle van destyds was lang opgerolde stroke papirus. Dis met seëls aan mekaar gesit wat gebreek moes word om ʼn groter deel van die boekrol te kon lees. Die boekrol het God se plan van verlossing en oordeel bevat – God se toekomsplan met die geskiedenis. Dis net soos in die geval van ʼn kontrak voor en agter volgeskryf.
Die vraag word gevra of daar iemand waardig is om die boekrol oop te maak? Slegs Christus wie se waardigheid aan sy oorwinning as die Lam gekoppel word. Johannes vertel van ʼn dramatiese opbou na die oomblik van oopmaak – ʼn sterk engel tree na vore en roep met ʼn harde stem (5:2). Hierdie engel tree drie maal in Openbaring op, elke keer by ʼn beslissende oomblik. Met die engel se harde roep val die klem op twee sake – die oopmaak van die seëls en die vereiste dat dit iemand waardig moet wees.
Johannes huil as niemand gevind kan word om die sewe seëls te open nie. Dit fokus die lesers se aandag dramaties op die inhoud van die boekrol. Alles kom tot stilstand as niemand gevind word nie. Een van die 24 ouderlinge vra Johannes om op te hou huil want daar is Iemand – die Leeu uit die stam van Juda! Hy is die afstammeling van Dawid. Hierdie twee treffende beskrywings van Christus kom uit Gen.49:9 en Jes.11:1. Beide beskryf die Messiaanse figuur wat die vyand verslaan. In vers 6 tree ʼn geslagte Lam na vore om die boekrol te neem. Die oomblik het aangebreek: Die Lam staan in die sentrum van die troonkamer. Die fokuspunt van die mensegeskiedenis is sy oorwinning oor Satan deur die kruis en die opstanding. Hier word die Lam die Heerser en Leier! Die sewe horings simboliseer sy volgehoue mag.
Volgens Openbaring is die Lam die Verlosser, Hy word aanbid, is Heerser, Regter, Herder en Bruidegom. Johannes die Doper spreek Christus ook as die Lam aan (Joh.1:29). Sy sewe oë beskryf alwetendheid en alomteenwoordigheid in hierdie wêreld.
3. Die drie lofliedere
Die boekrol wat deur die waardige Lam oopgemaak word, word deur die reaksie van die 24 ouderlinge, die menigte engele en hele skepping met drie aangrypende liedere opgevolg. Die eerste lied word deur die 24 ouderlinge gesing (:8-10), die tweede lied deur die engelekoor (:11-12) en die derde deur die hele skepping (:13-14).
Die eerste lied: Die vier lewende wesens en 24 ouderlinge het die oomblik toe die Lam die boekrol neem, voor Hom neergeval; ʼn tipiese Joodse aanbiddingsvorm waarmee ootmoed en eerbetoon bewys is. Al 28 het siters en reukwerk in hul hande. Die soet reuk van wierook het simbolies aangedui dat God die offers aanvaar het. In hierdie geval is dit die gebede van gelowiges wat na God se troon opgestyg het. Saam sing hulle ʼn nuwe lied wat God se oppermag besing. Dit bestaan uit drie dele (i) die waardigheid van die Lam met oorstelpte vreugde (ii) die verlossingswerk van die Lam omdat Hy mense met sy bloed losgekoop het. Hulle was soos slawe wat uitgekoop is. (iii) die effek van die Lam se kruisdood in gelowiges se lewens. Hulle deel in God se alleenheerskappy en is soos priesters en koningskinders.
Die tweede lied deur die engelekoor: Dit moes ʼn geweldige groot engeleskaar gewees het; engele net waar jy kon sien! Hulle besing die Lam wat geslag is. Sy kruisdood is voldoende motivering dat Hy die boekrol kan oopmaak. Die derde lied deur die hele skepping: Dit was die klimaks toe elke geskape wese in die hemel en op die aarde hierdie lied in beurtsang saam gesing het. Dit het die toneel vir die oopmaak van die seëls vervolmaak.
4. Die fokus van die boodskap
Openb.4 en 5 neem ʼn sleutelposisie in die boek Openbaring in. Dit raak die sentrale tema vir gelowiges se lewe aan. Hoofstuk 5 laat die hemelhof op die aarde grondvat en laat gelowiges in die oorwinning deel. Ons aanbid ook die Lam wat verlossing gebring het al lyk die lewe ook hoe deurmekaar!
Vervolg...