Gedagtes vir elke dag
Of lees almal by Gedagtes vir elke dag
Op U Almag vas vertrouend het ons vadere gebou.
Skenk ook ons die krag, o Here, om te handhaaf en te bou,
dat die erwe van ons vaders vir ons kinders erwe bly –
knegte van die Allerhoogste teen die hele wêreld vry!
Soos ons vadere vertrou het, leer ook ons vertrou o Heer!
Met ons land en met ons nasie sal dit wel wees: God regeer!
2011 SNEL NADER
Marten du Preez
Die jaar 2010 snel ten einde en die nuwe jaar 2011 wink agter die horison. Dit is dan dat ons met dankbare harte deur die genade van God afskeid kan neem van die ou jaar en as dit sy Wil is, ons die nuwe jaar mag betree.
Voordat die nuwe jaar aanbreek is daar vir ons Christen-Afrikaners twee wonderlike gebeurtenisse wat tot ons spreek. Op 16 Desember herdenk ons die slag van Bloedrivier toe God in sy Almag ingegryp het en die klein klompie Voortrekkers gered het van algehele uitwissing deur die barbaarse Zoeloes. God het die gebede van hulle wat in benoudheid verkeer het, gehoor en redding bewerk. “Aan my is gegee alle mag in die hemel en op aarde.” Mat 28:18.
Mag ons dan op 16 Desember ons Gelofte aan God nakom en dit soos ‘n Sabbatdag deurbring. Dr Malan het op 16 Desember 1949 tydens die inwyding van die Voortrekkermonument ‘n oproep tot Christen-Afrikaners gemaak met die woorde: “Glo in God, Glo in jou Volk en Glo in jouself.”
Op 25 Desember vier ons die geboorte van Christus soos dit ons as Christene betaam. Dit is ‘n dag van vreugde en groot dankbaarheid want God het in die gestalte van ‘n mens na die aarde gekom tot ons verlossing en die ewige lewe.Joh 3:16: “Want so lief het God die wêreld gehad, dat Hy sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê.”
Op hierdie dag het ons as Christuskinders die grootste geskenk ontvang waaraan mens kan dink.
Op 31 Desember is dit die afskeid van die ou jaar en het ons die geleentheid om op ons knieë te gaan en God te dank vir al sy liefde en genade in die afgelope jaar. Kom ons hou ‘n oomblik van stilte en dink in dankbaarheid aan al die seëninge wat ons so mildelik uit sy Hand ontvang het.
“Ure, dae maande jare vlieg soos skadudrome heen.” Ges. 161: 1
Ons betree 2011 met die vaste vertroue dat God vir ons ‘n roeping het om te vervul. Daarom moet ons daardie opdrag met geloofsoortuiging uitvoer naamlik om in diens van God te staan en ook om ons volk aan te moedig om ons vryheidstryd onverpoosd en in geloof voort te sit. Ons is alleen daartoe in staat as God ons werke in aansien neem. “Laat jou werke aan die HERE oor, dan sal jou planne uitgevoer word.” Spreuke 16 : 3.
Die vryheidstryd van ons volk is van uiterste belang, daarom moet ons God in al ons handelinge ken en gehoorsaam wees aan sy opdragte, want in eie krag sal ons geen sukses behaal nie. So het Dawid God geloof en geprys in die uur van sy oorwinning en uitgeroep:
“En U het my met krag omgord vir die stryd, U het my teëstanders onder my laat buk.” 2 Samuel 22 : 40:
Met die genade van God word nog ‘n nuwe jaar aan ons lewe toegevoeg net soos die baie jare van die verlede. Wat gaan ons egter in die nuwe jaar doen? Wat is ons verwagtinge vir 2011? Die antwoord op hierdie vrae is nie binne ons vermoë nie, maar met God aan ons sy en met sy leiding kan ons trag om uitvoering aan ons voornemings te gee.
God eis egter van ons as sy kinders om gehoorsaam te wees en om ons Christenskap in die nuwe jaar na te streef. Daarin is opgesluit die handhawing van ons Afrikaner-nasionalisme op alle terreine.
Die familieband is hier van uiterste belang en moet ons gesinslewe op hegte Christenskap gevestig wees. Die Here moet ten alle tye Een en die Hoof van ons gesin wees.
Ons is geroepe om in die nuwe jaar ons mede-Afrikaners aan te spoor om ons gevestigde Afrikanerkultuur en -tradisies te handhaaf en uit te bou. Ons volk is deur God aan hierdie suidpunt van Afrika gevestig om die land te bewerk en om voorspoedig hier te lewe. Ons eis daardie reg vir ons op by herhaling in 2011.