Gedagtes vir elke dag
Of lees almal by Gedagtes vir elke dag
God het ons in hierdie moeilike lewe geplaas, en daarom gee Hy ons 'n godsdiens wat sterk genoeg is hiervoor. Dit behels dat ons by hom 'n skuilplek kry teen die ergste koue en die diepste donker, maar veral by Hom skuil in die tye van sonskyn en vreugde.
KERK VERVOLG DIE KERK
Ds A.E. van den Berg
“Want die tyd is daar dat die oordeel moet begin by die huis van God. En as dit eers by ons begin, wat sal die einde wees van die wat aan die evangelie van God ongehoorsaam is? (1 Pet.4:17)
Aan die einde van die NT is daar ʼn paar Sendbriewe wat aan gelowiges gerig is wat weens geloofsvervolging moes vlug. Hierdie tydperk is die verstrooiing genoem. Om hierdie gelowiges te bemoedig, het van die dissipels skrywes ter bemoediging aan hulle gestuur om gesirkuleer te word en is met die ontstaan van die Bybel daarin opgeneem.
Een van die hooftemas van die skrywes is geloofsvervolging wat niks vreemd vir gelowiges moet wees nie. Jesus sê vir sy dissipels: Paulus skryf aan Timoteus wat ook vervolging in die gesig gestaar het: “En almal wat ook godvrugtig wil lewe in Christus Jesus, sal vervolg word” (2 Tim.3:12).
Die punt is: Gelowiges moet vervolging verwag. Dis eie aan geloofslewe. Sulke vervolging word nie net van buite die kerk geloods nie, maar ook van binne. Die Roomse Kerk het bv. miljoene mense wat nie met haar afgodiese leer saamgestem het nie, laat vermoor.
Die Bybel waarsku dat geloofsvervolging kort voor die wederkoms van Jesus aansienlik gaan toeneem. Paulus noem dit in 2 Tim.3:9 swaar tye wat veral aan die optrede van valse kerklui gekenmerk sal word. Die vroeë kerk het alreeds met misleiding in haar boesem kennis gemaak: “...mense wat ʼn gedaante van godsaligheid het, maar die krag daarvan verloën het” (2 Tim.3:5). Die valse kerk gaan egter net voor die wederkoms in al sy felheid op gelowiges afkom.
Hierdie kerk gaan nie uit die bloute ontstaan nie. Dis al eeue lank aan die werk en met ontsporing te doen. Talle kerke wat die Bybel eens suiwer verkondig het, hetdie spoor byster geraak en afgedwaal. Nadat Suid-Afrika in 1996 haar Christengrondwet geskrap en ʼn wêreldse een aangeneem het, het kerke begin dwaal. Talle ontnugterde lidmate het besef dat hul kerk nie meer die kerk van vroeër was nie en hul kerkbesoek gestaak, Sondae tuis gebly of na ander kerkverbande oorgaan. Al wat in die dwaalkerke oorgebly het, is blind-lojale lidmate; mense wat hul eertydse liefde vir die waarheid versaak en in die dryfsand van hul gebrekkige Bybelkennis versink het.
Petrus skryf in sy Sendbrief dat die laaste kerk met dwaalleer besmet sal wees. Jesus waarsku: “Want daar sal valse christusse en valse profete wees, en hulle sal groot tekens en wonders doen om, as dit moontlik is, ook die uitverkorenes te mislei. Kyk, Ek het dit vir julle vooruit gesê” (Mt.24:24,25). Dis die kerk van die Antichris waarvan die Bybel in geen onduidelike taal nie, melding maak.
Paulus skryf oor die Antichris: “...hy wie se koms is volgens die werking van die Satan met allerhande kragtige dade en tekens en wonders van die leuen en met allerhande verleiding” en sê van sy volgelinge: “...omdat hulle die liefde tot die waarheid nie aangeneem het om gered te word nie” (2 Thess.2:9.10).
Die pad na die ewige verderf is met die skedels van duisende dwaalleraars geplavei; kerklui wat die Skrif verdraai om by leuens en gruwels aan te pas. Gelowiges moet duidelik onderskei. Jesus sê: “Aan hulle vrugte sal julle hulle ken. 'n Mens pluk tog nie druiwe van dorings of vye van distels nie! So dra elke goeie boom goeie vrugte; maar 'n slegte boom dra slegte vrugte” (Mt.7:16,17).
Paulus sê dat sulke Satansagente nie almal sal mislei nie: “Hulle sal nie verder voortgaan nie, want hulle dwaasheid sal vir almal duidelik wees...” (2 Tim.3:9). God bewaar ʼn gelowige oorblyfsel wat tot die doodtoe getrou aan die waarheid sal bly.
Die valse kerk sal aan die einde aan ʼn toename in skynheilige mense gekenmerk word; mense wat vir die skyn kerktoe gaan, geestelike liedere sing en aan godsdienstige verrigtinge deelneem. Dit gaan lyk asof hulle na aan God leef, maar in werklikheid ver van Hom af en verlore is.
In 2 Tim.3 noem Paulus enkele eienskappe waaraan dié mense herken sal word. Hulle sal liefhebbers van hulself wees. Alles sal om die as van die eie ek draai. Hulle gedagtes, gesprekke en optredes sal onheilig wees. Skandelike hartstogte en bose genot sal in hul lewens seëvier. Kortom: Mense wie se optrede van ʼn lewe sonder Jesus getuig. Gelowiges moet hulle van sulke mense afskei om dwaalleerbesmetting te voorkom. Paulus skryf: “Moenie dwaal nie; slegte gesprekke bederf goeie sedes” (1 Kor.15:33). Hy beveel Timoteus: “ Keer jou ook van hierdie mense af” (2 Tim.3:5).
Daar is vandag in baie kerke ʼn geheel ander gees as ooit tevore. Mense soek geestelike vervulling buite die kerk – op soek na water in die geestelike woestyn. Talle hunker na egte geloofsbelewenisse en trek soms by die duisende in oop ruimtes saam om na seepkispredikers te luister. Sien u wat gebeur? Kerk word buite die kerk gehou.
Om die uittog uit kerke te probeer keer, word preke meer verbruikersvriendelik aangebied. Hoe dunner die Skrifbasis van preke, hoe dikker word dit in die glanspapier van vernuwing toegedraai. Verhoogkunstenaars in ampsgewade vermaak lidmate met kwinkslae en verhoogtoertjies en verdun selfs die liturgie tot maklik verteerbare oppervlakkige sêgoed.
Dis alles tevergeefs. ’n Geestelike ontwaking wat mense nie tot ’n nuwe liefde vir Jesus en die waarheid laat ontwaak nie, maak mense tevergeefs wakker. Ons volk het geen behoefte aan sulke oppervlakkige vermaak nie, maar eerder aan grondige geestelike leiding.
Wat sal die einde wees? Alles loop op ʼn bitter onaangename einde af soos wat Petrus skryf: “Want die tyd is daar dat die oordeel moet begin by die huis van God. En as dit eers by ons begin, wat sal die einde wees van die wat aan die evangelie van God ongehoorsaam is?”
Een ding moet elke kerkmisleier weet – nie een van hulle gaan aan God se laaste oordeel ontsnap nie: “ Oor hulle is die oordeel van lankal af nie werkeloos nie, en hulle verderf sluimer nie”” (1 Pet. 2:2:3).
Waarheen is ons eens trotse kerke op pad? Onteenseglik na die eenwêreldkerk van die Antichris. ʼn Tipe van universele bedwelming het ons mense beetgepak. Geen wonder dat al hoe meer mense kerkloos word nie.
Alles spoed einde se kant toe. Gelowiges moet baie sterk in die Here staan. Dis ʼn geloofswedstryd. Kom ons speel hierdie wedstryd totdat die eindfluitjie blaas en moenie ophou om vir Jesus te skyn omdat ongelowiges jou lig nie waardeer nie. Staan vas in Jesus. “ ... Wees getrou tot die dood toe, en Ek sal jou die kroon van die lewe gee” (Openb.2:10).