Gedagtes vir elke dag
Of lees almal by Gedagtes vir elke dag
Die liefde is vriendelik...
KERSDAG 2022
Ds A.E. van den Berg
“Die Gees van die Here HERE is op My, omdat die Here My gesalf het om ’n blye boodskap te bring aan die ootmoediges; Hy het My gestuur om te verbind die gebrokenes van hart; om vir die gevangenes ’n vrylating uit te roep en vir die geboeides opening van die gevangenis” (Jes.61:1)
Dis vandag Kersfees, ʼn anderse dag as ander Christelike feesdae omdat dit uitsluitlik van vreugde spreek. Tydens Lydenstyd raak ons bedroef as ons aan Jesus se lyding dink, maar Kersfees is vreugde. ’n Mens sou graag van die Kersfees-gees in flesse wou opvang, bewaar en maandeliks een oopmaak.
Dis goed om tydens Kersfees opgewonde soos ’n kind te wees, want ons Verlosser het immers as kind na die aarde gekom. Kersfees moet egter in ’n mens se hart wees. Wie dit nie in sy hart het nie, soek tevergeefs daarna in geskenkpapier toegedraai. Kersfees is ’n hartsaak.
Kersfees is ’n tyd van die jaar wat ’n mens nie alleen wil deurbring nie. Hoe vreeslik om ʼn kaggelvuur in jou hart te hê, maar niemand om langs jou te sit nie! Die hartseerste is wanneer mense slegs die opwinding van ’n Kersfees wil beleef, maar geen begeerte het om die Vredevors, die Een waaroor Kersfees gaan, as Verlosser en Saligmaker wil aanvaar nie!
Daar is geen Persoon na wie se koms so uitgesien as Jesus s’n nie. Die Jode het eeue lank die koms van die Messias verwag omdat dit deur profete voorspel is. Hierdie verwagte koms van die Messias was ’n ernstige geloofsaak omdat dit alles met hul ewige eindbestemming te doen gehad het.
Gestel jy moet by ’n sekere bestemming uitkom, maar die pad daarheen is so moeilik dat min by die eindbestemming uitkom. Dan hoor jy van ’n ander pad wat gemaak is; nuut, korter en makliker en almal wat dit volg, bereik hul eindbestemming. Sal jy nie van koers verander nie? Beslis en dankbaar!
Dis wat Jesus vir die Jode en daarna vir alle gelowiges kom doen het. “En as julle aan Christus behoort, dan is julle die nageslag van Abraham en volgens die belofte erfgename” (Gal.3:29). Jesus het ’n nuwe pad hemel-toe gemaak.
Die Jode het moeilik in die hemel gekom. Hulle moes twee dinge doen; die Wet onderhou en glo dat die Messias sou kom. Die onderhouding van die Wet was feitlik onmoontlik, sodat min die hemel beërwe het. Die vooruit gesiene geloof in die koms van die Messias was so ’n werklikheid dat hulle tydens elke Joodse fees ’n ekstra plek aan die feestafel gedek het, ingeval die Messias by hul opdaag. Die oop stoel en gedekte plek aan die tafel het van ’n lewende verwagting getuig: Die Messias kom voorwaar!
Toe Jesus die nag gebore is, het God gesorg dat mense dit weet. Hy het op ’n plek begin waar dit die minste verwag is – by ’n weiveld en herders. As ons aan herders dink, het ons altyd ’n positiewe beeld. “Die Here is my herder, niks sal my ontbreek nie” (Ps.23) “Ek is die goeie herder. Die goeie herder lê sy lewe af vir die skape” (Joh.10).Beide spreek van liefde vir skape (sondaars).
In Jesus se tyd het herders nie ʼn goeie naam gehad nie. Sommige was skurke wat nêrens anders werk kon kry nie. Van hulle het selfs van hul werkgewers se skape verkoop, die geld in hul sak gesteek en die eienaars vertel dat roofdiere die skape gevang het. So is Jode bv. verbied om vleis, wol of melk by herders te koop. Daarbenewens het hulle so ’n reputasie gehad dat hul getuienis nie in die Joodse Raad aanvaar is nie. Hulle was die uitvaagsels van die samelewing met wie jy jou nie opgehou het nie.
Gevolglik het God ’n vreemde ding gedoen toe Hy engele na herders gestuur het om die koms van die Messias aan te kondig. Hy kon die engele na ʼn meer verdienstelike groep gestuur het. Desondanks stuur Hy hulle na ’n groep mense wat nie eens as waardige getuies geag is nie.
God kon sy engele na die heilige tempel-sale gestuur het. Dit sou meer gepas wees en die boodskap van die koms van die Messias duideliker verstaan en vinniger versprei word. God doen dit egter nie. Hy stuur sy engele na die landbousektor waar veragte mense werksaam was om die Kersboodskap te benadruk – Jesus vereenselwig Hom met sondaars.
In Luk.19:10 word die doel van die koms van die Messias duidelik uitgespel: Hy het gekom, gesoek en gered. Jesus sê by geleentheid dat gesonde mense die dokter nie nodig het nie, maar siekes; presies wat Hy in Jesus kom doen het; sondaars van hul sonde bevry. Ek wonder hoeveel mense besef dit? Kersfees word tog so maklik in ydelheid deurgebring sonder dat mense weet waaroor dit gaan. Jesus het op Kersdag die lint gesny wat die nuwe pad na die hemel open!
In ons gelese gedeelte is Jesus 750 jaar voor sy geboorte aan die woord: “Die Gees van die Here HERE is op My, omdat die Here My gesalf het om ’n blye boodskap te bring aan die ootmoediges; Hy het My gestuur om te verbind die gebrokenes van hart; om vir die gevangenes ’n vrylating uit te roep en vir die geboeides opening van die gevangenis” Dis die kersboodskap in die OT!
Jesus praat hier van ootmoediges - mense sonder aansien; die onderlaag van die samelewing - die vaal mannetjies en vroutjies van die lewe. Hierdie onderlaag was dikwels die vloermat van die bolaag en op getrap. Hulle kon nie op mense-hulp staatmaak nie; slegs God kon vir hulle uitkoms bring.
Dis hoe dit met die skaapwagters met Jesus se geboorte was. Daarom was dit vir ootmoediges wonderlik toe Jesus tydens sy aardse bediening by tollenaars en sondaars (kerklos mense) geëet het. Hy is deur die kerklui van sy tyd as ’n besondere Rabbi geag. Daarom het hulle niks daarvan gehou dat Hy hom met die onderlaag van die samelewing ophou nie.
Wanneer die engel aan die herders verskyn, praat hy spesifiek met hulle en nie met die kerklui of enige ander Joodse groep nie. “Moenie vrees nie, ek bring vir julle ’n goeie tyding “. God het iets vir veragte mense te sê: “...dat vir julle vandag in die stad van Dawid gebore is die Saligmaker, wat Christus die Here is”. Daar het redding vir die vodde van die huis van Dawid gekom!
God is lief vir eenvoudige gelowiges. Die Bybel vertel aangrypende verhale van ’n onderlaag wat geestelik uitgestyg en in die kerk leiding geneem het. Die steen wat die bouers verwerp het, word dikwels ’n hoeksteen. Die herders van weleer het agter in die ry gestaan en in die vergetelheid van veragting versink. God het hulle agter uit die ry gaan haal en na vore gebring om eerste getuies van Jesus se koms te wees. Wat eerste is, sal laaste wees en wat laaste is, eerste!
God gebruik tot vandag toe dikwels mense wat nie geleerdheid, geld, aansien of wat ook al het, om kragtige getuies te wees. Koningskinders hoef geen akademiese sertifikate, aansien of stoflike welvaart te hê nie; slegs een kwalifikasie – hulle harte moet in die bloed van Christus gewas wees sodat hulle vry en nie meer gevangenes van Satan is nie.
Dek hierdie Kersfees opnuut vir Jesus plek in jou hart en laat Hom jou belangrikste gas wees! Onthou ook dat Hy die enigste Gas in jou liggaam kan wees, Hy deel nie ‘n huis met Satan of sy demone nie!!!