GEBEDEBOEK VIR DIE BOEREVOLK (1)

Lees reeks by GEBEDEBOEK VIR DIE BOEREVOLK  

Ds.Andrè van den Berg

Die Boerevolk verkeer tans in die grootste nood sedert sy volkstigting. Alles om ons het donker geword. Magte van die duisternis voer oor ons die botoon en dompel ons land toenemend in chaos en ellende. Geen mens kan ons uit hierdie ellende bevry nie; slegs God!

Ons moet egter nie teen heidense getalle vaskyk nie. Niks is by die Here onmoontlik nie. As Hy  werk, kan niks Hom keer nie. Daarbenewens laat Hy nooit die werk van sy Hande vaar nie, maar bevestig dit eerder van geslag tot geslag.

God het menigmaal verlossing deur ‘n handjievol weerbares bewerk. Let maar op die verlossing van Israel in die tyd van Gideon (Rigters 7) toe God deur 300 weerbares aan Israel die oorwinning oor 135,000 van die vyand gegee het. Dis deur gebed en smeking voorafgegaan.

Ons eie volksgeskiedenis getuig ook van God se wonderbare ingrype toe 400 weerbare Voortrekkers op 16 Desember 1838 meer as 20,000 barbare by Bloedrivier verslaan het. Dis ook deur gebed en smeking asook ‘n gelofte voorafgegaan.

Die Boerevolk se grootste weerbaarheid is ‘n geestelike weerbaarheid. Dit veronderstel uiteraard ‘n gebedslewe waarop gebedsverhoring volg. Gevolglik is daar vir ons niks so belangrik soos gebed nie. Dis die kommunikasiemiddel tussen God en gelowige mense en die asemhaling van ons volksiel.

Hierdie gebedeboekie is uitsluitlik vir my volk geskryf. Mag dit tot elke Boer se gebedsverryking en geestelike weerbaarheid bydra.

 

GEBED BY DIE AANBIDDING VAN GOD

Here, U grootheid en almag verbyster my elke dag! Geen mens kan met U meeding en geen hemelse wese met U wedywer nie. Wie is daar wat u Weg kan versper of  watter hemelse wese so magtig dat hy u ewige Raadsplanne kan verydel? Sal die mens nie eerder daarin slaag om die son van sy lig of die see van sy sout te ontneem as om U te troef nie?

Al is u omtrek nêrens nie, is u Middelpunt orals. Daarom is kennis van U die grootste van alle wetenskappe en insig in u Werke die beginsel van wysheid. U is die begin van alle heerlikheid en die somtotaal van alle goedheid. Daarom is my lewe sonder U leeg, ja, soos die hemelruim sonder sterre, die see sonder water en die aarde sonder plante. ‘n Dag sonder U is soos ‘n dag sonder son en ‘n nag sonder maan of sterre.

U genade is groot en val soos reën in barre woestyne sowel as op vrugbare landerye. Dit val op rotse wat die water nie kan benut nie, maar ook op droeë grond wat dit dankbaar inneem. Dit val op strate waar niks groei nie en mense soms vies raak as dit hulle nat maak. U genadereën val egter ook op blomtuine wat aan die skepping besondere kleur gee en oor weidings wat mildelik kos aan diere voorsien.

Dankie dat ek u Genade nie hoef te verdien nie, maar dat dit gratis en genoegsaam is. As hemelse Vader gee U vir my milddadig omdat U weet dat ek nie daarsonder sal kan lewe nie. Daarom is u Genade manna vir my siel. Dit bring rus in my onstuimige gemoed.

Dankie dat U ‘n liefdevolle Vader is wat altyd na die stem van u kinders luister. Daar is geen geheim in my hart wat ek nie in u oor kan  fluister of geen lewensideaal so dwaas dat ek dit nie met U kan  deel nie. U het altyd tyd vir my.
Al is my lofprysing ook hoe swak en my gebede hoe stamelend, is dit vir U aanvaarbaar omdat ek deur Jesus kind van U is. U Woord sê vir my dat my sonde, al is dit ook hoe groot, nooit groter as u Liefde vir my kan word nie. Ek besef dat ek maar net ‘n vonkie van liefde in vergelyking met u hoogoond van liefde vir my het.

Dankie dat U my alles gee wat ek nodig het om sinvol te bestaan. Laat ek altyd daarna streef om tot u eer leef en nooit in my toewyding en liefde vir U en u Kerk op aarde te verslap nie.

Help my om altyd u Grootheid in u Goedheid en u Goedheid in u Grootheid raak te sien en U tot in ewigheid te eer en te verheerlik.

Amen.