Gedagtes vir elke dag
Of lees almal by Gedagtes vir elke dag
Die afgelope 24 uur het God alweer vir jou die geskenk van 86 000 sekondes gegee. Het jy een van hulle gebruik om vir Hom dankie te sê?
VERWOESTENDE AARDBEWINGS HIERDIE EEU
In die lig van die verskriklike aardbewing wat gister groot verwoesting in Turkye en Sirië aangerig het, kyk ons in hierdie artikel kortliks na die kragtigste aardbewings die afgelope jare.
Die aardbewing wat Turkye gister, Maandag 6 Februarie 2023 getref het, het sover ‘n duisend sterftes en meer as 5 000 beseerdes gelaat. Dis is verreweg die mees vernietigende aardbewing wat die land in dekades gesien het. Die ramp was egter nie tot Turkye beperk nie, aangesien Sirië bevestig het dat honderde daar dood en baie beseer is. Net jammer dat berigte sover nie die Richterskaalsyfer insluit nie.
Kom ons kyk na die mees tragiese aardbewings wat tot dusver hierdie eeu gesien is:
2004: Indiese Oseaan-gruwels
In Desember 2004 het 'n aardbewing met 'n sterkte van 9,3, die derde kragtigste een wat nog aangeteken is, getref met 'n episentrum net langs die weskus van Indonesië. Die krag daarvan het ’n reuse-tsoenami van 30 meter hoog tot gevolg gehad wat gemeenskappe langs die kus van die Indiese Oseaan verwoes het en altesaam 227 898 mense in 14 lande doodgemaak het, wat dit dus die dodelikste natuurramp in die geskiedenis maak. Benewens die massiewe dodetal, is infrastrukture vernietig en ekonomiese aktiwiteit is dwarsdeur kusstreke soos Indonesië se Aceh en Indië se Tamil Nadu-provinsies ontwrig. Die aardbewing was so kragtig dat dit selfs kleiner seismiese gebeure so ver as Alaska veroorsaak het.
2010: Katastrofe in die Karibiese Eilande
In Januarie 2010 het 'n aardbewing van 7.0 die Karibiese eilandnasie Haïti getref. Die episentrum was naby die dorp Leogane, net 25 km van die hoofstad van Port-au-Prince af. Naskokke wat deur die aardbewing veroorsaak is, het vir byna twee weke voortgeduur en het minstens 52 kleiner skuddings van 4,5 en meer ingesluit. Die ramp het sowat 3 miljoen mense geraak. Die Haïtiaanse regering het ook gesê dat die ramp ongeveer 220 000 lewens geëis het. Sowat 250 000 wonings en 30 000 kommersiële geboue is vernietig, terwyl groot skade aan Port-au-Prince en verskeie ander stede aangerig is.
2011: Die ergste ramp sedert Tsjernobil
In Maart 2011 het 'n ondersese megasterkte aardbewing met die episentrum in die Stille Oseaan, sowat 72 km oos van Japan, getref. Met 'n sterkte van 9.1, was dit die tweede kragtigste aardbewing van die 21ste eeu en die vierde grootste wat nog ooit aangeteken is sedert moderne rekordhoudingspraktyke in 1900 gevestig is. Die aardbewing het die lewens van meer as 19 700 mense geëis en honderdduisende is dakloos gelaat. 'n Tsoenami wat deur die aardbewing veroorsaak is, het gelei tot die Fukushima-kernkragsentrale ramp, wat beskryf is as die ergste kernramp sedert Tsjernobil in 1986. Drie van die Japannese reaktors het gesmelt, wat gelei het tot 'n afvoer van radioaktiewe water in die gebied rondom die sentrale. Inwoners binne 'n radius van 20 km van die Fukushima-aanleg is ontruim. Die geraamde ekonomiese skade van die gebeurtenis het volgens die Wêreldbank $235 miljard beloop, wat dit die duurste ramp in die geskiedenis maak.
2008: 'Groot Sichuan-aardbewing'
In Mei 2008 het 'n kragtige aardbewing die provinsie Sichuan in die suidweste van Sjina getref. Met 'n sterkte van 8.0, het die aardbewing die grootste aantal geo-gevare wat nog ooit aangeteken is, veroorsaak, insluitend sowat 200 000 grondverskuiwings. Dit is so ver as Beijing en Sjanghai gevoel, sowel as in Thailand en Viëtnam. Die ramp het meer as 80 000 lewens geëis en byna 5 miljoen mense dakloos gelaat, wat dit die dodelikste aardbewing in Sjina sedert 1976 maak.
2005: Kasjmir-aardbewing
In Oktober 2005 het 'n aardbewing van 7.6 die westelike deel van die Kasjmir-streek getref wat deur Pakistan geadministreer word, sowel as sommige gebiede van die Indiese-geadministreerde Jammu- en Kasjmir-gebiede. Die ramp het die lewens van 86 000 mense geëis en net soveel beseer gelaat, terwyl miljoene verplaas moes word. Dié ramp word as die dodelikste in Suid-Asië beskou.
SUID-AFRIKA KRY OOK SY BEURT
Op 23 April 2010 het die Oos-Kaap Burger berig dat 'n ligte aardbewing van 2,8 op die Richterskaal die vorige aand die suidweste en westelike gedeelte van Johannesburg vir vier sekondes lank geskud het. Enkele personeellede van Beeld in die Mediapark-gebou in Auckland Park het die skudding duidelik gevoel. Maar dit was ‘n baie ligte skudding.
Volgens Beyers van Niekerk, 'n omgewingswetenskaplike in Suid-Afrika, is die Wes-Kaap die land se bekendste aardskuddingsgebied waarvan die grootste skudding, 6,3 op die Richterskaal, op 29 September 1969 by Ceres plaasgevind het. Ons moet in gedagte hou dat die Hirosjimabom maar 'n lesing van 6 op die Richterskaal gemeet het, dus was die aardbewing in Ceres nog kragtiger.
Oor die breuk wat deur die Kaapse vlakte verby Valsbaai in die see loop sê Van Niekerk, dat dit 'n seismiese vloedgolf kan aktiveer wat honderde kilometers per uur kan beweeg, 'n tsoenami in eie reg, wat 'n groot probleem vir uitgestrekte gebiede in die Kaapse vlakte kan veroorsaak. Ook die lughawe wat op 'n riskante blootgestelde area geleë is kan volgens Van Niekerk in die slag bly.
Dr Chris Hartnady, 'n internasionale kundige in geotegtonika beweer as 'n aardskudding een maal in 'n spesifieke gebied plaasgevind het, dit baie waarskynlik weer kan gebeur.
Interessant dat Koeberg destyds ontwerp is met die moontlikheid ingedagte dat daar 'n aardbewing van 7 mag plaasvind. Die breuk is dus toe reeds in ag geneem. Maar niemand kan presies voorsien wat sal gebeur as daar 'n aardskudding plaasvind en Koeberg die dag ontplof nie behalwe dat daar vir minstens in 'n radius van 50 km niks sal oorbly nie as gevolg van die radio-aktiewe waterdamp wat sal ontsnap. En dit is maar een van die gevolge van 'n groot aardbewing in daardie omgewing, wat niks met mynbedrywighede te make het nie.
Moet dus nie te seker wees dat Suid-Afrika nie sy beurt gaan kry vir 'n aardskuddende ramp nie. Die talle verskeie rampe die afgelope tyd dwarsdeur die wêreld kan nie aan een soort oorsaak gebind word nie, en daar is heeltemal niks wat ons vrywaar van so 'n ramp nie. Inteendeel, dit mag dalk net God se metode wees om te help orde bring in 'n land en sy mense wat Hom so gruwelik tart en verag.