Gedagtes vir elke dag
Of lees almal by Gedagtes vir elke dag
Die beste wapen teen hartseer is dankbaarheid. Dankbaarheid bring blydskap. Blydskap is weer ‘n vrug van die Heilige Gees. As jy God dus wil behaag, moet jy leer om verdriet uit jou lewe te weer.
DIE ANTICHRIS SE VOETSTAPPE (8)
Lees reeks by Die Antichris se voetstappe
Ds AE vd Berg
DIE ROOMSE GEVAAR
1. ʼn Bedenklike geskiedenis
Die mensdom het al baie bloedvergieting aanskou, veral gedurende oorloë. Niks het egter soveel bloedvergieting veroorsaak soos die ydele strewe om die mensdom aan die mag van een kerk en een heerser te onderwerp nie. Hier span Rome die kroon. Geen kerk het ʼn bedenkliker geskiedenis as die Roomse Kerk (RK) nie!
Die geskiedenis leer dat geen regeerder al ooit by ʼn samewerking met die RK gebaat het nie. Talle het selfs hul mag verloor! Tydens die berugte Inkwisisie het die RK mense se vryheid onbeskaamd aan bande gelê. God het egter talle hervormers in die 16de eeu gebruik om gelowiges se oë te open en die RK as ʼn magsbehepte knoeier te ontmasker. Sy het menige oorlog geveg net om aardse mag te bekom of te behou; iets wat geensins met die Bybel rym nie: “Jesus antwoord: My koninkryk is nie van hierdie wêreld nie; as my koninkryk van hierdie wêreld was, sou my dienaars geveg het...” (Joh.18:36).
2. Die HRR herleef
Die sewe heuwels van Rome versinnebeeld die sewe herlewings van die Heilige Romeinse Ryk (HRR).
Die eerste herlewing was tydens die bewind van keiser Justinianus toe hy onder andere Rome in 554nC herbou het. Dis ryksherbou genoem. Hy het geglo dat godsdiensverdeeldheid sy regeermag geskaad het en dringend aandag daaraan gegee. Daarna het hy die sinkretisme (godsdiensvermenging) waarmee Konstantyn die Grote twee eeue tevore begin het, verder voortgesit.
Justinianus het homself as ʼn agent van God beskou wat geroepe was om kettery uit te roei. Die RK het dit verwelkom omdat dit haar die kans gegee het om ʼn vastrapplek in tradisioneel heiden gebiede te verkry. Daarna was die RK eeue lank die mag agter die skerms en die keisers marionette aan ʼn lyntjie. Niemand kon sonder RK steun regeer nie.
Die tweede herlewing van die HRR het onder Karel die Grote (800nC), die derde onder Otto die Grote (962nC) en die vierde onder Karel V met die aanvang van die Habsburg koningshuis (1530) plaasgevind.
Die vyfde herlewing was onder Napoleon wat homself in 1804 as keiser gekroon het.
Hitler en Mussolini se skrikbewind was die sesde en voorlaaste herlewing van die HRR. Mussolini wou die HRR vir Rome in al sy glorie herstel sodat sy weer die wêreld kon regeer. Nadat hy Ethiopië, Somalië, Eritrea en Libië in die aanloop tot die Tweede Wêreldoorlog verower het, het hy dit amptelik die Romeinse Ryk genoem. Die sewende en finale herlewing van die HRR is voor die deur en sal uit ‘n unie van 10 volksstate bestaan.
3. ‘n Samebindende ideologie
Die mensdom is op die vooraand van ‘n verenigde Europa onder Roomse beheer. Dit gaan tot die grootste vervolging en bloedvergieting in menseheugenis lei. Al wat tans ontbreek, is ‘n samebindende ideologie. En dit sal nie Naziïsme wees nie. Dit het Duitsland nie die mag besorg wat sy wou hê nie. Daar gaan van ‘n ander beproefde resep gebruik gemaak word; dit wat in die verlede aan heersers ongekende mag besorg het - Roomse Katolisisme!
Die RK was tot op hede vir alle herlewings van die HRR verantwoordelik. Karel die Grote het 1200 jaar gelede ‘n skrikbewind gevoer toe hy die RK met Duitse strewes verbind het. Dit gaan aan die einde van die tyd weer gebeur. Dis die ryk van die Antichris waarvan die Bybel praat!
Roomse Katolisisme wen ontstellend baie veld en is weereens besig om die Duitse nasionale gees aan die brand te steek. Daarom sal dit geen verrassing wees indien ʼn Roomsgesinde Duitser die voortou neem om die EU se masjinerie vir ʼn sewende herlewing van die HRR aan die werk kry nie!
Let gerus daarop dat almal wat Europa in die verlede staatkundig wou verenig, Roomsgesind was. Van Karel die Grote tot by die Franse Rewolusie en van Napoleon tot by Bismarck. Otto von Habsburg, ʼn vurige voorstander van Europese eenheid, het jare gelede die herlewing van die tradisionele Christendom (Roomse Katolisisme) in Europa voorsien.
Europa is slaggereed vir verandering. Menige onheilige plan is al agter die skerms van die Vatikaan bekook. Dis weer die geval. Pous Benediktus XVI is nie toevallig ʼn Duitser nie. Alle invloedryke posisies in die EU word deur Roomsgesindes beklee. Dis die grondslag vir ʼn Roomse ryk. Al wat ontbreek, is ʼn groot krisis. En daarvoor sal die Vatikaan sorg waarna miljoene mense, ook ontspoorde Protestante, die knie voor Rome gaan buig!
4. Die invloed van die pous
Die invloed van die pous op wêreldsake is enorm. Die Belgiese sosialis dr. Paul-Henri Spaak het by geleentheid gesê dat Europa net ‘n baie sterk leier kort. Hy moet so invloedryk wees, dat hy almal se steun sal geniet, ongeag of hy ‘n engel of ‘n duiwel is! Hierdie leier sal nie ‘n politieke leier wees nie, maar ‘n godsdiensleier. Pous Benediktus XVI is die aangewese persoon!
In November 2003 het pous Johannes Paulus II die EU gewaarsku en gesê dat ‘n samelewing wat sy verlede vergeet, die hede nie sinvol kan hanteer nie en ‘n slagoffer van die toekoms sal word. Hy het toe alreeds druk op die EU begin uitgeoefen om Roomse Katolisisme as die staatsgodsdiens van Europa te erken.
Die Vatikaan meng gedurig met politieke sake in ten einde haar afgodery op die mensdom af te druk. Ongelukkig besef mense nie watter bittere gevolge dit vir die ganse mensdom gaan inhou nie! Die Vatikaan maak ruimskoots van woorde soos God en Christendom gebruik. Vir leke klink dit goed op die oor. Dis egter ‘n berekende poging van die Satan om Protestantisme te vernietig!
Die RK wen baie veld in Europa. Pous Benediktus XVI het selfs sy eie TV netwerk waarmee hy Europeërs oproep om na hulle sg. oorspronklike wortels van Europese godsdiens terug te keer. Die EU het die RK nodig om die los stukke aanmekaar te werk. Daarsonder sal die EU uitmekaar val. Die pous weet dit al te goed. Daarom dring hy gedurig daarop aan dat Europa na Rome moet terugkeer om die geestelike lont aan te steek. Gelowiges sidder om te dink wat met die mensdom gaan gebeur as daardie lont aangesteek word!
5. Brittanje buig die knie
Brittanje se geskiedenis wemel van skermutselings tussen koningshuise en pouse. Desondanks het sy haar rug daarop gedraai en die knie voor Rome gebuig. In 1534 het Hendrik VIII bv. van die RK weggebreek en die Anglikaanse kerk gestig waarna die Britse monarg ampshalwe die hoof daarvan geword het. Om onduidelikheid te voorkom, het die English Bill of Rights (1689) bepaal dat ‘n Roomsgesinde nooit op die Britse troon mag sit nie en deur The Act of Settlement (1701) herbeklemtoon.
In November 2009 het die gewese Britse premier, Gordon Brown, gesê dat diè 300 jaar oue wet geskrap kan word. Die koningshuis het hom nie aangespreek nie omdat duisende Anglikane jaarliks by die RK aansluit omdat sy voorgee om kerklik konserwatief te wees. Daarbenewens het die Roomse georkestreerde ekumeniese beweging talle Protestantse kerke met ‘n slap riem gevang om Roomse kerklui as andersdenkende broeders te beskou. (Meer hieroor in my boek Die Laaste Pous).
6. Knoeiery
Italië gee voor om geen bepaalde staatsgodsdiens te hê nie. Dis ‘n leuen! Sy dans van meet af aan na die Vatikaan se pype wat die staat misbruik om die EU kerklik te beïnvloed. Daarom kom die RK se vingerafdrukke oral op die EU voor. Elke tree wat die Vatikaan gee, is vir die mensdom gevaarlik!
Die RK het ongelooflik baie mag. Dit het ‘n paar jaar gelede gesorg dat Romano Prodi weens sy liberale sienings as premier van Italië onthef word. In Frankryk het die pous mnr. Sarkozy sterk aangemoedig om van sekularisme ontslae te raak en Frankryk te ver-Rooms. In Spanje staan die RK die plaaslike regering weens sy aborsiebeleid en vrysinnigheid baie sterk teen.
Invloedryke Europese leiers word herhaaldelik opgeroep om na hul geestelike wortels van oorsprong terug te keer. Ongelukkig het die meeste van hulle hul geskiedenis vergeet en onthou skynbaar nie meer die bloedige grond waarin hierdie geestelike wortels staan nie – moord, verdrukking, marteling en onderwerping!
Die RK se oproep tot geestelike herstel klink vir baie mense goed. In werklikheid word die Satan vir die duiwel verruil! Sodra die RK wêreldmag bekom, gaan alle Protestantse kerke gedwing word om Roomse Katolisisme as staatsgodsdiens te aanvaar of die dood in die gesig te staar. Die geskiedenis herhaal homself!
Min mense besef dat die RK besig is om Europa se donker eeue te laat herleef. Die Vatikaan dwing haar wil al meer af. Daarvoor word Vatican Radio asook ‘n TV kanaal wat sedert 2008 in sewe tale uitsaai, gebruik. Die EU se EUROPARL TV wat in 20 tale uitsaai, is deurtrek van Roomse Katolisisme!
Die RK is verreweg die sterkste gerat om die mensdom se gedagtegang te beheer en die wêreld se kommunikasienetwerke te oorheers. Krisisse het al dikwels kerk en staat vir ‘n wyle laat saamwerk. Dit het egter nooit tot gelukkige verbintenisse gelei nie.