Gedagtes vir elke dag
Of lees almal by Gedagtes vir elke dag
Dwaalleraars is soos ʼn heuningby met heuning in die bek, maar ʼn angel aan die stert!
ONS SAL ANDERS MOET BEGIN DINK
Dit wat met ons land gebeur het, is die vrug van ʼn volk wat moeg geword het om vir eerbare dinge te stry en toe met volksvyande instellings begin heul het. Geen vlag is groot genoeg om die verwoesting wat hierdie verraad ons volk aangedoen het mee te bedek nie!
Die aandadiges probeer om hul met die tragiese gevolge van hul dwaasheid te versoen en maak hul soos vlermuise in ʼn onderstebo wêreld tuis. Sommige het selfs eerbied vir hul laksmanne. Nee, kragtie! Net ʼn dom bees geniet die rit na die slagpale of sien na ʼn ontmoeting met sy slagter uit!
Solank as wat die onreg in ons land voortduur, sal alle pogings tot versoening misluk. Moet dus nie aan ʼn deur klop wat nooit oopgemaak sal word nie. ʼn Mens staan mos nie op ʼn lughawe om vir ʼn skip te wag nie!
Maak eerder jou nageslag van hul trotse volksgeskiedenis bewus. Geskiedenis is die bewaarder van die groot dinge van die verlede soos bv. die Slag van Bloedrivier. Geskiedenis is ʼn voorbeeld en leermeester vir die hede maar ook ʼn tydige waarskuwing vir die toekoms. Wees eerder ʼn lewende donkie as ʼn dooie stoetbul!
Ons sal baie anders moet begin dink. As die wêreld om ons uitmekaar val, moet ons nie saam uitmekaarval nie. Daar kom tye dat dit voel asof jy magteloos teen die onregpleging staan. Moet egter nie jou ontnugtering met jou lot verwar nie. Laat die sirene van jou geloof in Jesus Christus en jou gebede vir jou volk altyd harder as jou omstandighede loei. Dis altyd beter om ʼn lig aan te skakel as om die donker te verwens.
Die oud-Italiaanse veggeneraal Garibaldi het gesê: “Ek kan jou nie vergoed of kos gee nie. Al wat ek jou kan bied, is honger, dors, stryd en die dood. Volg my net as jy jou volk met jou hart en nie met jou eie lewe liefhet nie!”
Laat mense nooit wonder waar jy met God en jou volk staan nie. Laat jou gees net te edel wees om booswigte te bevoordeel en jou volksliefde te groot om jou volk te verraai. Hou aan die beproefde waardes van die verlede vas en bid God vir ’n nuwe bedeling aan die suidpunt van Afrika waar misdaad nie lonend sal wees nie, maar eerbaarheid wel. Ons kan slegs oorleef as die vuur binne ons sterker as die vuur van die vyand rondom ons brand.
Ons volk is nie deur ʼn militêre mag verslaan nie, maar deur die enorme masjien van politieke en kerklike verraad verpletter. Desondanks glo ek met my hele hart dat sake binnekort gaan verander. Die doodsgeroggel van ʼn sterwende ANC regime word by die dag al hoe harder.
Talle van die volksverraaiers is alreeds besig om hul met versigtige voetwerk van die oorblyfsels van ʼn Christelike beskawing aan die suidpunt van Afrika te verskoon. Waarom? Omdat die lont wat hulle aangesteek het, kort duskant die kruitvat brand. Ek het nuus vir hulle; wie die mynveld help opstel het, gaan die verfoeilike gevolge daarvan nie vryspring nie. Die haan van berou gaan hul nog wakker kraai!
Neem die woorde van Nehemia vir sy verslae volk ter harte: ”… Julle moenie bang wees vir hulle nie; dink aan die grote en gedugte Here en veg vir julle broers, julle seuns en julle dogters, julle vroue en julle huise” (Neh.4:14).
Ek sluit met die vraag waarmee ek begin het af: Moet ons versoen of nie? Die antwoord is baie duidelik: Nee! Duisend maal nee! Waarom nie? Omdat daar niks is om mee te versoen nie. Ons kan ons nooit met geweld, moord, onreg, korrupsie of minderwaardige etniese sensitiwiteit versoen nie.
Laat sak eerder jou anker van hoop in die geloofsdieptes van die almagtige God, Hy het Hom in die verlede by Bloedrivier laat ken en gaan Hom weer op opspraakwekkende wyse aan ons Boerevolk vertoon soos wat Siener van Rensburg in een van sy gesigte gesien het.
Ek sluit my Gelofterede met die woorde van Ges.298:1 af:
“Soek in God jou sterkte, kry by Hom jou krag, met sy wapenrusting klee Hy ons met mag. Nie teen medemense is ons worstelstryd, maar ons veg teen Satan en sy sluwe listigheid. Hy stuur bose magte in die wêreld in, maar met God se wapens kan ons hul oorwin”.