KRAGTIGE DENKE, GROOT DADE EN DIEPE GELOOF
Ps.68 staan daar geskrywe: In God sal ons kragtige dade doen en Hy self sal ons vyande vertrap.
Frikkie Strauss
Baie van die ja-stemmers van 1992 sal vandag sekerlik wens dat hulle die horlosie kon terugdraai na 17 Maart 1992. Dis egter nie moontlik nie. Ons moet nou vorentoe beweeg. In die proses is daar 'n aantal werklikhede wat ons in die oë moet kyk.
Die belangrikste daarvan is dat daar vir ons en ons kinders geen toekoms is binne die politieke bedeling wat in Maart 1992 geskep is nie. Enige pogings om ons lewens en ons belange binne hierdie bedeling te beskerm kan net van korte duur en weinig waarde wees. Ons moet onsself daaruit ontworstel en weer ‘n vrye volk in ons eie land onder ons eie regering word. Dit sal kragtige denke, groot dade en diepe geloof verg.
Daar sal 'n fundamentele herskikking en herstrukturering van ons denke moet kom. Ons het ons in hierdie gemors ingedink; ons moet onsself weer hier uitdink. Ons moet deur skeppende en positiewe denke 'n nuwe langtermynvisie vir ons toekoms vorm en dit moet gebaseer wees op die werklikhede en waarhede van ons geskiedenis. Verder sal ons bereid moet wees om die persoonlike offers te bring wat die skepping van 'n toekoms vir ons kinders verg. Dit wat nou vir ons belangrik is, moet daaraan ondergeskik gestel word. Laastens, en die belangrikste van alles, ons moet ons toevlug soek daar waar ons voorouers dit gesoek het. Die God wat hulle beskerm het by Vegkop, Bloedrivier en Majuba en aan hulle oorwinnings geskenk het toe hulle sy aangesig gesoek het, is vandag nog dieselfde God en Hy sal dieselfde vir ons doen as ons sy aangesig in verootmoediging soek. In Ps.68 staan daar geskrywe: In God sal ons kragtige dade doen en Hy self sal ons vyande vertrap.