KORSIES VAN PASTEI

(Die hele pastei by: Korsies van Pastei)

Gerhard Griesel se nuwejaarswense

Mag jou goeie gesondheid bevestig word deur jou tandarts, jou gastro-endokrinoloog, jou uroloog, jou psigiater, jou ginekoloog en jou oogkundige.
Mag jou proktoloog, jou fisioterapeut, die chiropraktisyn, die sielkundige en die verslankingskliniek sê jy hoef nie weer te gaan nie.
Mag jou dokter weet waar om te begin en jou masseuse waar om op te hou.
Mag jou inkomste, jou behuisingsubsidie, jou huis se waarde en jou aandele styg; en mag jou bloeddruk, gewig, huislening, erfbelasting en cholesterol daal.
Mag ou vriende jou onthou en die belastinggaarder van jou vergeet.
Mag skakers, motordiewe en verkragters jou miskyk en die bevorderingskomitee jou raaksien.
Mag jou heining te hoog wees vir jou buurt se inbrekers, maar laag genoeg vir jou as jou outomatiese hek nie wil oopgaan nie.
Mag jou nuwe werkgewer dink jy is 'n swart vrou en mag die bure se hond dink jy is 'n wit man.
Mag jou baas of jou sekretaresse of jou assistente of jou kollega nie vir jou sê dat hulle jou liefhet nie, en mag jou wederhelf en jou kinders dit wel doen.
Mag jy 'n eerlike regering kry en 'n oneerlike skoonheidsdeskundige.
Mag jy 'n dom balju kry en (so ongelooflik as wat dit mag klink) 'n intelligente staatspresident.