WIE SE BAL ANDERS?

KORSIES OP DIE RUGBYVELD (61)
(Die hele pastei by: Korsies van Pastei)

Die oud-Bloubulvleuel Jock Seeliger vertel toe hy nog in die laerskool in die Kaap skoolgegaan het, sy spannetjie een oggend in Kuilsrivier teen die plaaslike spannetjie moes gaan speel.

Een van die vlagmanne, of lynregters soos dit deesdae genoem word, was sommer een van die tuisskool se seuntjies. Hy hol toe op en af saam met die spel en steek sy vlag hier op en daar op wanneer dit lynstaantyd is.

In een stadium woel die mannetjies naby die kantlyn en die bal spat oor die lyn, maar Jock is nie seker of hý die bal moet ingooi of die ander spannetjie se vleuel nie.

"Wie se bal is dit?" vra hy die vlagmannetjie.

"Dis die skool s'n!" antwoord hy ewe onskuldig.