MEER VAN HULLE ASSEBLIEF!

KORSIES OP DIE RUGBYVELD (57)
(Die hele pastei by: Korsies van Pastei)

In 1920 het oubaas Mark as Suid-Afrikaanse rugbykeurder na 'n wedstryd van Transvaal in Johannesburg gaan kyk op soek na moontlike kandidate vir die Springboktoer na Australië en Nieu-Seeland die volgende jaar.

Hy sien toe 'n voorspeler in die voorwedstryd wat hom baie beïndruk. "Wie is daai man?" vra hy vir die Transvaalse ondersteuners wat naby hom sit.

Hulle het net gelag en geantwoord: "Daai man is 'n skaap, vergeet maar van hom."

Hierop antwoord oubaas Mark: "As julle nog sulke skape het, stuur hulle Stellenbosch toe. Daar sal ons van hulle Springbokke maak!"

Die volgende jaar is die betrokke speler Tank van Rooyen saam met die Bokke oorsee. Tydens die kies van die toerspan het oubaas Mark aan die ander keurders gesê: "Tank van Rooyen is my eerste keuse as slot vir die Springbokspan. Hy is ook my tweede, derde en vierde keuse!"