BID DAT DOMINEE HOM BEKEER!

KORSIES OP DIE RUGBYVELD (42)
(Die hele pastei by: Korsies van Pastei)

Die vader van die oud-Springbok George Daneel (1928 – 1932), oom Marthinus Smuts Daneel, was 'n predikant en sy eerste gemeente was op Calvinia. As student het hy vir Stellenbosch se eerste span gespeel, en met sy aankoms op Calvinia is hy gekies as kaptein van die dorpspan.

Die kerkraad was egter nie baie ingenome hiermee nie, veral nie toe hy een Sondagoggend met 'n blou oog van die vorige dag se wedstryd op die kansel verskyn nie.

Heelwat later het hy te hore gekom dat daar oral in sy gemeente gesamentlike gebede opgegaan het dat die Liewe Heer hulle dominee tog van "hierdie vreeslike soort spel moet bekeer".