Gedagtes vir elke dag
Of lees almal by Gedagtes vir elke dag
Die beste ding wat Jonathan vir Dawid kon doen, was om doodeenvoudig net sy vriend te wees. Dawid het geweet dat Jonathan vir hom omgee en dit was voldoende beloning. Hy wou geen verdere beloning hê nie. Dis mos wat ’n vriendskap goddelik maak.
BLINDE LOJALITEIT...
... IS GEESTELIKE DOODSAKE
Ds A.E. van den Berg
“As iemand julle 'n evangelie verkondig in stryd met die wat julle ontvang het, laat hom 'n vervloeking wees!” (Gal.1:9)
Lojaliteit is 'n wonderlike deug wat by godsdienstige sake ook 'n skadelike kant kan hê. Dit laat blind-lojale kerkgangers dwaallig vir sterre aansien. Dit het in die tyd van Jeremia gebeur. Hy waarsku volksgenote: “Vertrou nie op bedrieglike woorde nie — wat sê: Die Here se tempel, die Here se tempel, die Here se tempel is dit!” (Jer.7:4) Paulus waarsku: “Moenie dwaal nie; God laat Hom nie bespot nie....” (Gal.6:7).
Gelowiges moet prediking aan die Skrif toets of dit met die Bybel ooreenstem en soos die gelowiges van Berea wees: “En hierdie mense was edelmoediger as dié in Thessalonika; hulle het die woord met alle welwillendheid ontvang en elke dag die Skrifte ondersoek of hierdie dinge so was” (Hand 17:11).
Paulus skryf aan die Romeine: “Want wat maak dit as sommige ontrou geword het? Sal hulle ontrou miskien die getrouheid van God vernietig? Nee, stellig nie! Maar God moet waaragtig wees.....” (3:2,3). Jakobus waarsku: “Moenie baie leermeesters wees nie, broeders, omdat julle weet dat ons ’n groter oordeel sal ondergaan” (3:1).
Kerke moet toesien dat hul leraars die waarheid verkondig. Daarvoor is die amp van die ouderling onontbeerlik: “Ek vermaan die ouderlinge onder julle, ek wat ’n mede-ouderling en getuie van die lyde van Christus is, wat ook ’n deelgenoot is van die heerlikheid wat geopenbaar sal word: Hou as herders toesig oor die kudde van God wat onder julle is, nie uit dwang nie, maar gewillig; nie om vuil gewin nie, maar met bereidwilligheid; ook nie as heersers oor die erfdeel nie, maar as voorbeelde vir die kudde....” (1 Pet.5:1-4).
Omdat 'n leraar se amp aan sy persoon verbind is, moet die waarheid in hom skitter. Jesus sê: “Julle is die lig van die wêreld.... Laat julle lig só skyn voor die mense, dat hulle julle goeie werke kan sien en julle Vader wat in die hemele is, verheerlik” (Mt.5:13,16). Alhoewel dit vir alle gelowiges geld, des te meer vir leraars. Paulus skryf: “Julle is getuies, en God, hoe heilig en regverdig en onberispelik ons ons gedra het teenoor julle wat glo” (1 Thess 2:10).
Geesvervulde lojaliteit kweek 'n wonderlike eensgesindheid onder mense wat die waarheid liefhet. Blinde lojaliteit laat ongelukkig baie mense in die slagyster van dwaalleer trap, veral hulle wat die waarheid liefgehad en toe die spoor byster geraak het. Let maar net op hoeveel kerke draai vandag 'n blinde oog na gruwels en lidmate aanvaar dit gelate. Dit is die vloek van blinde lojaliteit!
Blinde lojaliteit huisves dikwels 'n element van verraad. Wanneer 'n volk hom teen vyandige aanslae moet verweer en 'n beduidende deel is blind-lojaal teenoor verraderlike instansies, maak dit bitter seer. Die Boerevolk het nare ervarings hiervan toe vooraanstaande kerklui met die vyand begin heul het.
Gelowiges durf nie lojaal teenoor kerke en/of leraars wees wat die waarheid verlaat en die leuen glo nie. Paulus was by niks wat die Evangelie geskaad het betrokke nie. “Wees my navolgers, soos ek dit ook van Christus is” (1 Kor.11:1).
Paulus het talle lojale aanhangers gehad maar sê dat gelowiges se lojaliteit eerstens aan Jesus moet wees. En as hy dwaal, moet hulle hom nie volg nie. Dis 'n groot waarheid. Lojaliteit moet Skrif-gegrond wees en nie van groep-gevoelens afhang nie.
Gelowiges moet uiters versigtig wees – die lyn tussen reg en verkeerd is soms baie fyn. Daarom moet hulle slegs lojaal teenoor diegene wees wat die waarheid verkondig. “Maar ons vra julle, broeders, erken die wat onder julle arbei en julle voorgangers in die Here is en julle vermaan; en bewys hulle in liefde die hoogste agting ter wille van hulle werk. Hou vrede onder mekaar” (1 Thess.5:12.13).
Dit wat nie met die leer van die Skrif strook nie, moet verwerp word: “As iemand julle 'n evangelie verkondig in stryd met die wat julle ontvang het, laat hom 'n vervloeking wees!” (Gal.1:9). Paulus skryf aan die Romeine:“En ek vermaan julle, broeders, hou hulle in die oog wat tweedrag en aanstoot veroorsaak teen die leer wat julle geleer het, en vermy hulle” (Rom.16:17).
Blind-lojale mense dink nooit nugter nie. Dis die vloek van groepsdruk. Mense is dikwels gemakliker met die leuen as met die waarheid en neem soms verkeerde paaie net om nie deur hul groep verwerp te word nie.
Dit gaan ook in die diereryk so – hulle doen soos die res van die groep doen. Dit laat mense geborge onder mekaar voel. Hulle is, soos in Jesus se tyd, bang om deur die groep verwerp te word: ” Tog het niemand openlik oor Hom gepraat nie, uit vrees vir die Jode” (Joh.7:13).
Blinde lojaliteit lei maklik tot breinspoeling. Dis 'n metode wat die Roomse Kerk (RK) al baie lank suksesvol gebruik. Hulle breinspoel as te ware hul lidmate om almal soos die kerk te dink. Dit gee aan die RK, net soos in die ou Babiloniese godsdiens waaruit hulle stam, mag oor mense. Die ou Babiloniese priesters het 'n vroeë vorm van breinspoeling toegepas om mense onderhorig te hou. Ja, die verstand van die kerklike publiek word maklik getiranniseer.
Ongelukkig steek blinde lojaliteit ook by sommige Protestantse kerke kop uit. Johannes skryf 'n skokkende ding wat net voor die wederkoms gaan gebeur: “Hulle het een gesindheid en sal hulle krag en mag oorgee aan die dier” (Open.17:13). Die kerk van die Antichris is besig om gestalte hier aan die suidpunt van Afrika te kry!
Hierdie bose eensgesindheid word deur kerke wat die waarheid vir die leuen verruil gehuisves. Petrus waarsku: “Want die tyd is daar dat die oordeel moet begin by die huis van God. En as dit eers by ons begin, wat sal die einde wees van die wat aan die evangelie van God ongehoorsaam is?” (1 Pet.4:17).
Laat ons nooit vergeet dat Jesus die Rots is wat vir sondaars geklief is en dat die kerk die skeur is waardeur die lewende water na almal wat dors het, vloei. Daarom het 'n kerk wat nie die waarheid verkondig nie, geen bestaansreg in die oog van God nie.
Watter soort wêreld skep ons vir ons nageslag as die waarheid so openlik verag word? Moet ontspoorde leraars maar hulle gang gaan en blind-lojale volksgenote nog verder verval? Dan kry die verhaal van die rottevanger van Hamelin 'n kerklike baadjie!
Ons moet volksgenote teen blinde lojaliteite waarsku. Die Boerevolk verval weens 'n versaking van die waarheid. Dit het ook in die tyd van Hosea gebeur. Hy kla: “My volk gaan te gronde weens gebrek aan kennis...” (Hos.4:6).
Die waarheid van God se Woord is die enigste gom wat 'n volk wat uitmekaar val gaan heg. Bid vir volksgenote wat met blinde lojaliteit geslaan is, dat hulle oë vir die waarheid sal oopgaan en na die paaie van weleer sal terugkeer. Die skrywer van die Hebreër-brief het vir hulle goeie raad:“Gedenk julle voorgangers wat die woord van God aan julle verkondig het; aanskou die uiteinde van hulle lewenswandel en volg hulle geloof na (Hebr.13:7).