Gedagtes vir elke dag
Of lees almal by Gedagtes vir elke dag
Meestal roem ons op onsself wanneer ons groot hoogtes bereik het. Eintlik weet ons dat die Here daardie talente en vermoëns aan ons geskenk het maar ons dink nie veel daaraan nie en word graag voor ander mense vereer. God sê in Exodus 28 aan Moses om met die kunsvaardige mense te reël om vir Aäron heilige klere te maak waarin hy die Priesteramp sal beklee; en dan maak God dit duidelik wie daardie kunsvaardige mense is: ...wat Ék met die gees van wysheid vervul het..." Laat ons deurentyd die eer aan God gee vir al ons prestasies, dit kom Hom toe.
GELOOF HET NIE PLEK VIR PESSIMISME
Ds A.E. van den Berg
“Pas dan op dat julle nougeset wandel, nie as onwyse nie, maar as wyse; en koop die tyd uit, omdat die dae boos is. Daarom moet julle nie onverstandig wees nie, maar verstaan wat die wil van die Here is” (Efes.5:15-17)
Die oorvloed van booshede wat ons volk die afgelope tyd tref, maak mense opreg bekommerd oor die toekoms. Dit lyk asof alles omgekeer het en die goeie ou dae vir altyd verby is. Dit alles skep dikwels ʼn gees van wanhoop by ons mense. Wanhoop is ʼn lelike ding. Dit krap nie net lewens om nie, maar belemmer ook die gees en maak dat sommige mense uitdagend en onnadenkend optree en op die ou einde met die gereg gebots.
Politici en kerklui het onbeskaamd vir hul mense gelieg en is derhalwe aan die land se verval aandadig. As so ʼn gevoel jou beetpak, volg pessimisme en verdwyn hoop vir die toekoms. Jy gaan maar net dag vir dag aan en hoop dat iets positief sal gebeur.
Niemand van ons weet wat hierdie jaar vir ons gaan inhou nie. Gelowiges is egter van een ding seker – die toekoms is in God se hande. Wat ʼn troos om ʼn onbekende toekoms aan ʼn bekende God toe te vertrou!
Wat ook al dié jaar met my mag gebeur, is ek nie alleen nie. God is met my:“ ... Wees nie bevrees nie, want Ek het jou verlos; Ek het jou by jou naam geroep; jy is myne! As jy deur die water gaan, is Ek by jou; en deur die riviere — hulle sal jou nie oorstroom nie; as jy deur vuur gaan, sal jy jou nie skroei nie, en die vlam sal jou nie brand nie. Want Ek is die Here, jou God...” (Jes.43:1-3).
Daar is egter ʼn ononderhandelbare voorwaarde aan verbonde – jy moet deur die bekering in ʼn persoonlike verhouding met Jesus staan want dan leef jy reg, soos ʼn Henog van ouds, ongeag ʼn bose wêreld.
Die vraag is: Wat moet ons doen om so te leef? Die teksverse gee ons al die raad – drie daarvan. Wie dit toepas, leef reg.
Die eerste een is: “Pas dan op dat julle nougeset wandel, nie as onwyse nie, maar as wyse”. Hierdie ‘nougeset wandel’ verwys na iemand wat op ʼn smal paadjie teen ʼn styl berg bitter versigtig moet loop. Een verkeerde tree kan hom na sy dood laat val. En die les? Moenie oorhaastig op die lewenspad wees nie.
Ons leef dikwels baie oorhaastig, maak vinnige besluite, praat te vinnig, beweeg te vinnig, reageer te vinnig en antwoord te vinnig. Ons trap die versneller van die lewe al hoe dieper in, soms met tragies gevolge!
Peter Marshall, eertydse kapelaan van die Amerikaanse senaat, bid een oggend tydens die dagopening van die Senaat: “Here, as ons te vinnig na U wens beweeg, steek asseblief ʼn gaatjie in ons bande dat ons moet stilhou!”
Oorhaastige mense maak maklik foute. Hulle jaag teen so ʼn spoed na sekere dinge in die lewe, dat hulle by God verby hardloop. Die Psalmdigter skryf in Ps.46: “Laat staan en weet dat Ek God is...” Om spoed te verminder en God meer in jou lewe in te laat, kry jy meer gedoen as op jou eie. Paulus se eerste raad is om nie te vinnig te beweeg nie.
Sy tweede raad is: “...en koop die tyd uit, omdat die dae boos is”. Hierdie ‘uitkoop’ verwys na die ou Oosterse markte waar iemand iets kosbaars gesien het wat hy vir hom wil koop. Paulus gee ʼn spesifieke rede waarom die tyd uitgekoop moet word – omdat die dae boos is. Dit kan ook vertaal word met omdat die dae wanhopig is. Paulus skryf dié woorde in die gevangenis nadat keiser Nero hom laat vang het. Nero was ʼn jammerlike verskoning vir ʼn keiser, het Christene gehaat en gevolglik onheilswolke op die horison teen hulle laat saampak.
Soos wat die Evangelie versprei het, is dit as ʼn staatsbedreiging beskou en het dit baie gelowiges wanhopig gemaak en hoop vir die toekoms laat opgee. Baie mense het ʼn ent saam met die gemeenskap van die gelowiges geloop en toe weggeval. Paulus skryf aan Timoteus dat ʼn sekere Demas hul verlaat het omdat hy die teenswoordige wêreld liefgekry het.
Dit gebeur soms dat mense mismoedig met hul lewensomstandighede word en geestelik boedel oorgee. Dis nie wat God wil hê nie. Dis juis in harde tye dat die gehalte van geloof duidelik moet word. Harde tye hou dikwels verborge seëninge vir gelowiges in. ʼn Bergklimmer wat bo-op die berg staan, het nie daarheen geval nie, maar met die nodige deursettingskrag bo uitgekom.
As alles verlore lyk en niks vir jou meer sin maak nie, kan dit wees dat God se plan vir die lewe pas met jou begin het. Toe Elia dink dat dit sy einde was, was dit juis God se nuwe begin met hom! As die wêreld om jou uitmekaar val, is dit juis die geleentheid om deur jou vaste vertroue in Jesus met ʼn wonderlike getuienis dit na buite te dra.
Gelowiges wat in die donker loop, hou nie op alvorens dit lig word nie. Moet nooit na ʼn 100 redes kyk om op te hou nie, maar eerder na ʼn 1000 redes om aan te hou. Die geloofslewe is ʼn reis met ʼn bordjie langs die pad: Stilhou verbode!
Paulus se derde raad is: “Daarom moet julle nie onverstandig wees nie, maar verstaan wat die wil van die Here is”. Daar is vir gelowiges in moeilike tye niks beter as om te weet dat God in beheer van alles is nie.
“By die Here skuil ek. Hoe kan julle dan vir my sê: Vlug na die berg soos 'n voël. Want kyk, die goddelose span die boog; hulle het hul pyl op die snaar reggesit om in die donker te skiet na die opregtes van hart. As die fondamente omgegooi word, wat kan die regverdige doen? Die Here is in sy heilige paleis; die troon van die Here is in die hemel; sy oë sien, sy ooglede toets die mensekinders. Die Here toets die regverdige; maar sy siel haat die goddelose en die wat geweld liefhet. Hy sal op die goddelose vangnette, vuur en swawel laat reën; en 'n gloeiende wind sal die deel van hulle beker wees. Want die Here is regverdig; Hy het geregtighede lief; die opregtes sal sy aangesig sien” (Ps.11).
God weet presies wat in die wêreld aangaan. Dit maak nie saak wat gebeur nie, sy beloftes van gister en vandag is more presies dieselfde. Ons moet met innige toewyding aan sy beloftes bly vaskleef:
“Daarom, my geliefde broeders, wees standvastig, onbeweeglik, altyd oorvloedig in die werk van die Here, omdat julle weet dat julle arbeid in die Here nie tevergeefs is nie” (1 Kor.15:58).
Kom ons som die drie raadgewings vir 2024 op:
- Wees moedig en laat jou hart nie ontsteld word nie;
- Let op jou voetstap, maak die beste van jou tyd;
- En spits jou daarop toe om God elke dag jou reisgenoot te maak.