Gedagtes vir elke dag
Of lees almal by Gedagtes vir elke dag
John Wesley het op sy 80ste verjaarsdag gesê: “Ek is vandag 80. Mag God gee dat ek nie sal bly leef totdat ek nutteloos is nie”.
IS SPOKE ‘N WERKLIKHEID?
Ds A.E. van den Berg
“Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug” (Ef.6:12).
Is daar so ’n iets soos spoke? Dit hang af van wat presies met spoke bedoel word. As dit geestelike wesens sonder ʼn liggaam is, ja. Indien dit die geeste van afgestorwenes is, nee. Die Bybel sê baie duidelik dat daar so ʼn iets soos geestelike wesens is, goeies en slegtes. Dit wys egter die idee van die geeste van ontslape mense wie se gees op die aarde agterbly onomwonde af.
Sodra ʼn mens sterf, volg daar ʼn voorlopige oordeel. Jesus sê vir die misdadiger aan die kruis: “…Voorwaar Ek sê vir jou, vandag sal jy saam met My in die Paradys wees” (Luk.23:43). Die paradys is die wagkamer na die hemel. Wie hul daarin bevind, ervaar groot vreugde omdat hulle ná die laaste oordeel saam met Jesus na die nuwe hemel en nuwe aarde (Nuwe Jerusalem) vertrek.
In die Gelykenis van die Talente gee die ontevrede heer opdrag: “En werp die nuttelose dienskneg uit in die buitenste duisternis; want daar sal geween wees en gekners van die tande” (Mt.25:30). Die buitenste duisternis (doderyk) is die wagkamer na die hel. Wie hulle daarin bevind, vrees vir die oordeelsdag en Jesus se finale oordeel. Daar is ná die dood geen omdraaikans nie. Daarom ween en kners die ongelowiges op die tande want hulle weet wat op hulle wag.
In hierdie lig gesien, bly geen mens na sy dood op die aarde agter nie. Beslis nie in die vorm van ’n spook nie! Wie spoke sien, kan van een ding verseker wees – dis nie die geeste van ontslape mense nie.
Die Bybel sê dat mense wel met geestelike wesens kan skakel en dat hulle in ons fisiese wêreld kan verskyn; twee soorte – engele en bose geeste. Engele is wesens wat God van hul skepping af getrou dien, regverdig, goed en sondeloos.
Engele dien God. Hy gebruik hulle om gelowiges by te staan: “...want Hy sal sy engele aangaande jou bevel gee om jou te bewaar op al jou weë” (Ps.91:11).“Is hulle nie almal dienende geeste wat vir diens uitgestuur word ter wille van die wat die saligheid sal beërwe nie? “ (Heb.1:14).
Bose geeste is gevalle engele; boos en misleidend: “Want die Satan self verander hom in ’n engel van die lig. Dit is dus niks besonders wanneer sy dienaars hulle ook voordoen as dienaars van geregtigheid nie, maar hulle einde sal wees volgens hulle werke” (2 Kor.11:14, 15). Dis binne hul vermoë om as spoke te verskyn en selfs die voorkoms van bekende ontslapenes aan te neem.
Bose geeste staan onder beheer van Satan. Hulle is bewus van sekere mense se begeerte na kennis op die gebied van die na-doodse. Spiritiste maak daarop aanspraak dat hulle sulke geeste kan oproep om verlangde inligting te verkry. Ongelowiges vertrou sulke Satansagente en besoek hulle gereeld. Dié geeste is niks anders as bose geeste (gevalle engele) nie wat selfs korrekte inligting sal verskaf om mense van die saligmakende geloof in Jesus te weerhou. Moenie vergeet dat Satan oor net ’n beperkte kennis van die toekoms beskik nie.
Daar is ’n ontstellende toename in belangstelling in bonatuurlike dinge. Mense soek antwoorde op verkeerde plekke! In plaas daarvan dat mense hul toevlug na God en sy Woord neem, laat hulle hul deur die wêreld van demone mislei.
Hoe moet gelowiges reageer wanneer hulle van spokery en ander bonatuurlike bedrywighede hoor? Die eerste ding wat ons moet weet, is dat dit nie die geeste van ontslapenes is wat op aarde agtergebly het nie.
Baie van die bonatuurlike bedrywighede is kullery. Die mensdom soek gedurig na iets nuut en glo so maklik onsin. Soms maak mense verkeerde waarnemings oor dit wat hulle gesien het terwyl daar ’n logiese verklaring daarvoor is.
Waar daar werklike bonatuurlike bedrywighede plaasvind, is bose geeste aan die werk. Gelowiges moenie ontsteld wees nie. “Net met jou oë sal jy dit aanskou en die vergelding van die goddelose sien” (Ps.91:8). Bonatuurlike bedrywighede moet gelowiges aan die geestelike stryd in hul lewe herinner. Efes.6 praat van ’n stryd wat nie teen vlees en bloed nie, maar teen bose, onsigbare magte gevoer word.
Ongelukkig kry hierdie magte al hoe meer belangstelling. Die donker wêreld van Satan prikkel baie mense se nuuskierigheid. En dis verkeerd. Jesus het juis aarde toe gekom om Satan se werke te vernietig: “Hy wat sonde doen, is uit die duiwel, want die duiwel sondig van die begin af. Vir hierdie doel het die Seun van God verskyn om die werke van die duiwel te verbreek” (1 Joh.3:8). Hoe durf dit mense se belangstelling enigsins te prikkel?!
Gelowiges moet eerder ʼn weersin in sulke dinge hê. Dit moet ons daaraan herinner dat demoniese werksaamhede tot die dood van ons Verlosser gelei het. Was die eertydse Joodse kerklui dan nie instrumente in die hande van Satan nie? Gelowiges het niks met Satan se dinge te doen nie en vermy skakeling daarmee. Die Bybel sê dat Satan jou later sal uitlos: ”Onderwerp julle dan aan God; weerstaan die duiwel en hy sal van julle wegvlug” (Jak.4:7).
Satan is ’n indringer wat selfs volkstradisies binnedring. Afrika is vrot daarvan! Bose geeste word as voorvadergeeste aanbid. Die Bybel verbied mense om met die geeste van afgestorwenes te skakel. “Begeef julle nie tot die geeste van afgestorwenes en die geeste wat waarsê nie. Soek hulle nie om julle te verontreinig nie. Ek is die Here.” (Lev.19:31).
Daar is geen skakeling tussen lewendes en dooies moontlik nie. Luister wat Abraham aan die ontslape ryk man sê: “En by dit alles is daar tussen ons en julle ’n groot kloof gevestig, sodat die wat hiervandaan wil oorgaan na julle, nie kan nie; en die wat daar is, nie na ons kan oorkom nie” (Luk.16:26).
Al lê die wêreld in die mag van Satan, is God steeds Meester daarvan. Die Bybel praat oor God se mag as Skepper: “U alleen die Here, U het die hemel, die hoogste hemel en al sy leërskare gemaak, die aarde en alles wat daarop is, die see en alles wat daarin is en U hou dit alles in die lewe en die leër van die hemel buig hulle voor U neer” (Neh.9:6).
Ongelowiges is weerloos teen die aanslae van Satan en sy bose magte. Wie volgens Satan se kode leef, word aan sy reëls gebind en word in die dinge van Satan vasgevang en kan selfs besete raak.
Waarom is mense bang vir spoke/bose geeste? Omdat vrees die teenoorgestelde van liefde is. God is liefde en Satan vrees. Daarom geniet bose geeste dit as mense bang is, want vrees verlam hul lewe en trek die aandag van God af weg.
Daarom is die saligmakende geloof in Jesus Christus genesend en bevrydend: “Daar is geen vrees in die liefde nie; maar die volmaakte liefde dryf die vrees buite…” (1 Joh.4:18). Neem opnuut kennis van ons teksvers: “Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug”, en gee aan Satan geen vastrapplek in jou lewe nie!