Gedagtes vir elke dag
Of lees almal by Gedagtes vir elke dag
Die volk in 1 Kor 10:6 se ondankbaarheid vir God se genadegawes het dit laat verander in oordeel. Dit verskil nie van ons volk vandag nie – in plaas van gehoorsaam te lewe uit dankbaarheid sondig ons volk steeds voort met dobbel, huweliksontrou, aborsie en alles wat die godlose owerheid aan ons voorhou as veroorloof.
WÊRELDHEERSERS VAN DIE DUISTERNIS
Ds A.E. van den Berg
“Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug”(Efes.6:12).
Ons kyk almal teen die wêreld rondom ons vas omdat dit al is wat ons sien. Dis egter nie die enigste wêreld nie. Die Bybel sê dat daar nog een is; onsigbaar en die plek vanwaar Satan van meet af aan met ʼn leër van bose geeste ʼn geestelike oorlog teen gelowiges voer.
Dis ʼn uitgerekte oorlog maar waarvan die finale uitslag reeds bekend is –Jesus gaan oorwin. Satan en sy bose geeste weet dit en vrees die dag van afrekening.“En die duiwel wat hulle verlei het, is in die poel van vuur en swawel gewerp waar die dier en die valse profeet is; en hulle sal dag en nag gepynig word tot in alle ewigheid” (Openb.20:10).
Omdat Satan weet wat op hom en sy geeste wag, wil hy soveel mense as moontlik saam met hom hel toe te neem. Vandaar die oorlogvoering teen gelowiges. God gee egter aan gelowiges die nodige wapenrusting om suksesvol te veg (Efes.6:10-18).
Satan se magte bevind hulle in die ruimte tussen die hemel en die aarde en kan met die behulp van sy agente met hulle in verbinding kom. God verbied dit! “Begeef julle nie tot die geeste van afgestorwenes en die geeste wat waarsê nie. Soek hulle nie om julle te verontreinig nie. Ek is die Here.” (Lev.19:31).
Omdat hulle die Bybel nie ken nie, vereer Afrika se inheemse mense hierdie geeste as voorvadergeeste. Hul ingeburgerde verknogtheid aan dinge van die duisternis hou hulle in ʼn geestelike duisternis gevange en strook dus nie met die Bybel nie. Die Bybel sê dat die liggaam na die dood op die aarde agterbly en die siel na God terugkeer:“en die stof na die aarde terugkeer soos dit gewees het, en die gees na God terugkeer wat dit gegee het” (Pred.12:7).
Siele sweef nie na die dood iewers tussen hemel en aarde rond nie. Al wat in hierdie ruimte tuis is, is bose geeste wat mense van die lig van Jesus af weghou. Daarom skyn die lig van die Evangelie baie flou in Afrika.
Toe die Evangelie van verlossing in Afrika begin verkondig is, het twee sterk geesteswêrelde met mekaar gebots; dié van die lig teen die duisternis. Die Afrika-mens glo bv. dat ʼn mens se lewe deur wispelturige voorvadergeeste beheer word. Sulke geeste moet met offers en rituele gepaai moet word om die kwade van hul af te weer en voorspoed te ervaar. Gevolglik oorheers hul vrees vir bose geeste, voorbodes en onsigbare duistere magte hul ganse lewe.
Met gelowiges is dit anders gesteld: “Want God het ons nie ’n gees van vreesagtigheid gegee nie, maar van krag, liefde en selfbeheersing” (2 Tim.1:7).
In Mt.10 gee Jesus aan die dissipels mag om bose geeste uit te dryf. Geeste moenie geskakel word nie, maar in die Naam van Jesus uitgedryf word!
Die Afrika-mens se godsbegrip is onbybels. Hy glo dat daar ’n God is, maar dat Hy baie ver en nie by die mens se leed betrokke is nie. Die mens se lewe word eerder wel deur wispelturige voorvadergeeste bepaal. Die Bybel praat anders. God is in beheer van sy ganse skepping:“U alleen die Here, U het die hemel, die hoogste hemel en al sy leërskare gemaak, die aarde en alles wat daarop is, die see en alles wat daarin is en U hou dit alles in die lewe en die leër van die hemel buig hulle voor U neer” (Neh.9:6).
Toordokters word weens hul geheime magte waarmee hulle voorvadergeeste kan paai en selfs manipuleer baie hoog in Afrika geag. Hulle mag is egter nietig in vergelyking met God s’n wat getygolwe kan veroorsaak en vulkane kan laat uitbars. Niemand kan Hom dit nadoen nie!
Daarbenewens is God ʼn beskermer van sy kinders:“ Jy hoef nie te vrees vir die skrik van die nag, vir die pyl wat bedags vlieg nie, vir die pes wat in die donker wandel, vir die siekte wat op die middag verwoes nie! Al val daar duisend aan jou sy en tienduisend aan jou regterhand — na jou sal dit nie aankom nie. Net met jou oë sal jy dit aanskou en die vergelding van die goddelose sien. Want U, HERE, is my toevlug. Die Allerhoogste het jy jou beskutting gemaak. Geen onheil sal jou tref en geen plaag naby jou tent kom nie; want Hy sal sy engele aangaande jou bevel gee om jou te bewaar op al jou weë” (Ps.91:7-11).
Satan en sy voorvadergeeste het geen mag oor gelowiges nie. Gelowiges het nie rituele of geheime medisyne (mutie) nodig om bose geeste af te weer nie. Ons bid net tot God om bewaring van die bose soos die Onse Vader ons leer. Ons volksgeskiedenis getuig daarvan. Bloedrivier was so ʼn bewaring. Ongelowiges daarenteen, is weerloos teen die aanslae van Satan en sy magte.
Benewens Afrika se kulturele verknogtheid aan die geesteswêreld, neem die belangstelling in die werksaamhede van Satan en sy magte wêreldwyd toe. Dis ʼn teken dat die gees van die Antichris al meer sigbaar word. Gelowiges het net een verweer teen bose aanslae – gebed en getrouheid aan die Bybelse waarheid.
Dis hartseer om te sien hoe die gees van die Antichris kerke binnedring, kerklui ongehoorsaam aan die Bybelse waarheid word en gruwels vergoeilik. Daar is net een verweer teen Satan se aanslag – gelowiges moet die Bybel diepgaande bestudeer. Dis ons sterkste geesteswapen: “Die hele Skrif is deur God ingegee en is nuttig tot lering, tot weerlegging, tot teregwysing, tot onderwysing in die geregtigheid” (2 Tim.3:16).
Toe Jesus in die woestyn deur Satan versoek is, het Hy die Skrif as verdediging gebruik. Paulus vermaan gelowiges in Efes.6:10-18 om Satan met die Skrif teen te staan. Petrus vermaan sy lesers om op die uitkyk vir Satan te wees: “Wees nugter en waaksaam, want julle teëstander, die duiwel, loop rond soos ’n brullende leeu, en soek wie hy kan verslind” (1 Pet.5:8).
Ongelukkig vind Satan maklike prooi in Suid-Afrika, nie net in die Afrika-mens se verknogtheid aan die wêreld van bose geeste nie, maar ook al hoe meer in ontspoorde kerke wat leuens verkondig. Satan is die vader van die leuen. Hy buikspreek deur leraars wat in vrysinnige teologiese instansies opgelei is, Bybelse waarhede bevraagteken en leuens vestig.
Suid-Afrika is besig om met iets anders as die nag donker te word. Dis die invloed van “wêreldheersers van die duisternis” waarvan Paulus praat. Word sterk in die Woord van God en bid Hom om ons land van die bose te bewaar.
“ As my volk, oor wie my Naam uitgeroep is, hulle verootmoedig en bid en my aangesig soek en hulle bekeer van hul verkeerde weë, dan sal Ék uit die hemel hoor en hulle sonde vergewe en hulle land genees” (2 Kron.7:14).