Gedagtes vir elke dag
Of lees almal by Gedagtes vir elke dag
Hoe lyk jou geloof in Christus? Is dit net 'n kennis-sisteem? Of leef jy so dat ander kan sien – en veral Christus kan sien- dat jy werklik deel aan sy Vlees en sy Bloed het?
EERBIEDIG GOD SE NAAM
Ds. A.E. van den Berg
“Só moet julle dan bid: Onse Vader wat in die hemele is, laat u Naam geheilig word”(Mt.6:9).
“Jy mag die Naam van die HERE jou God nie ydellik gebruik nie, want die HERE sal die een wat sy Naam ydellik gebruik, nie ongestraf laat bly nie” (Ex.20:7).
Die Roomse Kerk bid onbeskaamd tot Maria en noem haar Onse Dame. Een van hul katedrale is dan ook na haar vernoem nl. die Notre Dame (onse dame). Miljoene lidmate aanbid haar as die aardse moeder van Jesus. Dis die grootste misgissing in menseheugenis! Die Roomse Maria is nie die aardse moeder van Jesus nie maar kom uit die Babiloniese afgodsdiens en is niks anders nie as ʼn herlewing van die godin Semiramis. Sy het net van naam verander(Maria) en is eeue gelede in die kerk ingevoer om die Evangelie van verlossing te neutraliseer.
Gelowiges bid nie tot ʼn mens nie; alleenlik tot God en Hom alleen. Jesus hou in sy Bergrede die Onse Vader as modelgebed voor wat hemelsbreed van die Roomse Onse Moeder verskil. Onse Vader, onse moeder!
Die modelgebed begin met ʼn lofbegroeting: “ ... laat u Naam geheilig word” In die Ou Nabye Ooste is koninklikes met lofbegroetings begroet. Tydens die aanwysing van Saul as die eerste koning van Israel lees ons: “En Samuel sê aan die hele volk: Sien julle hom wat die HERE uitgekies het? Want daar is nie een onder die hele volk soos hy nie. Toe juig die hele volk en sê: Mag die koning lewe!” (1 Sam.10:24). As Daniel se drie vriende voor Nebukadneser verskyn, sê hulle: ” Mag die koning vir ewig lewe!” (Dan.3:9) - ʼn seremoniële begroeting
Paulus gebruik iets soortgelyks in talle van sy briewe: “...aan al die geliefdes van God, geroepe heiliges wat in Rome is: Genade vir julle en vrede van God onse Vader en die Here Jesus Christus!” (Rom.1:7). “Genade vir julle en vrede van God die Vader en onse Here Jesus Christus” (Gal.1:3).
Die groetbetuiging in die Onse Vader is egter anders as enige ander een. Die naaste wat daaraankom, is Dawid se woorde: “O HERE, onse Here, hoe heerlik is u Naam op die ganse aarde!” (Ps.8:2). Die lofbetuiging van Mt.6:9 bevat twee unieke elemente nl. die heiligheid asook die verlange na ʼn toenemende verheerliking van die ware God as Hemelkoning.
Die woord geheilig kom 31 keer in die Bybel voor; 29 keer in die OT en twee keer in die NT. Die Griekse woord waarvan dit afgelei word, kom wel 28 keer voor en beteken om “eenkant” te sit, skoon of suiwer te maak. Hierdie naam moet anders as ander name wees vandaar die derde gebod se waarskuwing teen die ydele gebruik daarvan. In Hebreeus beteken ydellik letterlik om leeg te wees in die sin dat dit sonder gehalte is.
In die aanloop tot die ontvangs van die Tien Gebooie op die berg Horeb het Israel baie duidelik van God se heiligheid bewus geword. Hy het met donderslae en vuur met hulle gepraat wat daarop dui dat Hy met die uiterste agting bejeën moes word. Vandag word sy Naam onnadenkend as ʼn vloekwoord of ʼn uitroep van verbasing gebruik. Die filmbedryf is vrot daarvan!
Toe Jesus sy dissipels reg leer bid het, was die eerste bede dat sy Vader se Naam eerbiedig moes word. In die OT was dit al ʼn gegewe dat die misbruik daarvan gestraf sou word, al was dit nie in hierdie lewe is nie, dan wel in die eindoordeel. “Want ons moet almal voor die regterstoel van Christus verskyn, sodat elkeen kan ontvang wat hy deur die liggaam verrig het, volgens wat hy gedoen het, of dit goed is of kwaad” (2 Kor.5:10). God verdedig sy eer: “Vreeslik is dit om te val in die hande van die lewende God” (Hebr.10:31).
Jy mag die Naam van God nie in eedswering of gesprekke sonder ʼn goeie rede gebruik nie, maar slegs in ʼn verwysing na Hom of in verwondering oor Hom. Die grootheid van God se koningskap moet altyd in gedagte gehou word. God is ook ʼn Regter en oortreders van hierdie gebod word in sy beskuldigdebank sonder vryspraak geplaas.
Let ook daarop dat die derde gebod noue verband het met die vorige twee gebooie. Alhoewel daar geen God behalwe die Almagtige is nie, mag sy Naam nie anders as met hoë agting gebruik word nie.
Die verwysing na God as Vader in die modelgebed onderskei die Christengeloof van enige afgodsdiens. Nie een van hulle gode word vader genoem nie. Deur sy Naam te heilig, erken ons God se grootheid en onmeetlike mag. Gelowiges moet dit tot sy verheffing gebruik soos wat die Psalms ʼn voorbeeld van is.
“Vir die musiekleier; op die Gittiet. 'n Psalm van Asaf. Jubel tot eer van God, ons sterkte! Juig tot eer van die God van Jakob! Hef aan 'n lied en laat die tamboeryn klink, die lieflike siter saam met die harp” (Ps.81:1-3).
“Wie mag klim op die berg van die HERE? En wie mag staan in sy heilige plek? Hy wat rein van hande en suiwer van hart is, wat sy siel nie ophef tot nietigheid en nie vals sweer nie. Hy sal seën wegdra van die HERE en geregtigheid van die God van sy heil” (Ps.24:3-5).
Gelowiges moet ook baie versigtig wees om nie God se Naam los en vas in hul gebede te gebruik soos wat die heidene met hul afgode doen nie. “En as julle bid, gebruik nie 'n ydele herhaling van woorde soos die heidene nie, want hulle dink dat hulle deur hul baie woorde verhoor sal word” (Mt.6:9). Dis duidelik dat Jesus nie wou hê dat hierdie woord soos ʼn mantra herhaal moes word nie.
Dink maar net hoe gesteld mense op hul familienaam is. Dit sê wie jy is, wie jou mense is en waarvandaan jy kom. Net so is God op sy Naam gesteld. Dis deel van Wie Hy is. Sy Naam is sy eer. Daarom dring Hy in die derde gebod daarop aan dat sy Naam nie ligtelik op lippe geneem mag word nie.
Ons dra as gelowiges die Naam van Jesus met ons saam. Wat ons doen en sê, raak nie net onsself nie, maar ook Hom wie se Naam ons dra. Luister wat word van die eerste volgelinge van Jesus gesê: “En hulle het 'n hele jaar lank in die gemeente saam vergader en aan 'n aansienlike skare onderwys gegee; en die dissipels is in Antiochië vir die eerste keer Christene genoem” (Hand.11:26).
By geleentheid was Mahatma Gandhi met ʼn Britse sendeling in gesprek en het vir hom gesê dat hy baie beïndruk was met dit wat hy van Jesus Christus verneem het. Hy het gesê dat as hy in die Bybel lees wat Jesus gesê en gedoen het, hy byna self ’n Christen kon word. Maar, het hy bygevoeg, as hy na die Christene in Indië kyk, stel hy nie in die Christendom belang nie. Die teendeel is natuurlik ook waar. As jou lewe mooi is, bevorder dit die uitbreiding van God se koninkryk, soos ons bid: ”Laat U koninkryk kom”
Petrus het dit in gedagte as hy aan die gelowiges in die verstrooiing skryf:
“...en hou julle lewenswandel onder die heidene skoon, sodat as hulle van julle kwaad spreek soos van kwaaddoeners, hulle op grond van die goeie werke wat hulle aanskou, God kan verheerlik in die dag van besoeking” (1 Pet. 2:12).
Hoe gebruik jy God se Naam? Dis jammer dat mense wat die G-woord los en vas gebruik nie daarvoor gestraf word nie. As jy egter die K-woord gebruik, is jy in groot moeilikheid. Moet dit nie eerder andersom wees nie...