Gedagtes vir elke dag
Of lees almal by Gedagtes vir elke dag
Jare laat wel plooie op ons gesig, maar die mens wat sy geesdrif vir die lewe verloor, kry plooie op sy gees!
MERK VAN DIE DIER
Ds A.E. vd Berg
“En hy maak dat almal, klein en groot, en die rykes en die armes, en die vrymense en die slawe ʼn merk op hulle regterhand en op hulle voorhoofde gegee word” (Openb.13:16).
God openbaar Hom in die Bybel as ʼn heilige Drie-eenheid. Satan boots dit met ʼn onheilige drie-eenheid na; hyself (die Satan), die Antichris (eerste dier) en die valse profeet (tweede dier). Soos wat Jesus na die mens uit ʼn vrou gebore is en na die aarde gekom het, sal die Antichris ook uit ʼn vrou gebore word en vir ʼn bepaalde tyd lank heerskappy op die aarde voer.
Die valse profeet is die hoof beliggaming van die valse kerk wat aan die einde van die tyd die wêreldgodsdiens word. Sy optrede sal deur ʼn magdom van wondertekens gekenmerk word en, soos ʼn Elia van ouds, selfs vuur uit die hemel laat neerdaal. Mense sal in verwondering die Antichris aanbid:
“Laat niemand julle op enige manier mislei nie, want eers moet die afval kom en die mens van sonde geopenbaar word, die seun van die verderf, die teëstander wat hom verhef bo al wat God genoem word of voorwerp van aanbidding is, sodat hy in die tempel van God as God sal sit en voorgee dat hy God is” (2 Thess.2:3,4).
Almal wat aan die Antichris onderdanig word, ontvang ʼn merk op die voorkop en regterhand waarsonder niemand sal kan koop of verkoop nie. Hierdie veelbesproke 666-teken is die seël van die Antichris nadat die valse profeet sy verderflike werk gedoen het en vir hom kerkmense op ʼn bondel ingejaag het.
Oor wat hierdie teken gaan wees, word daar lank bespiegel. Die tegnologiese deurbraak van mediese skyf-inplantings het baie mense op hol. Is dit moontlik die begin-stappe van dit wat uiteindelik op die merk van die dier gaan uitloop?
Dwaalleraars jaag graag spoke rondom hierdie merk op en verkondig dat mense binnekort mikroskyfies onder hul velle sal ontvang waarmee die Antichris die wêreldhandel sal beheer. Skrywers in Charismatiese kringe maak veral roekeloos van foutiewe eindtyd-spekulasies gebruik en maak geld daarmee.
Dis moontlik dat ʼn wêreldleier mensemassas d.m.v. elektronika kan beheer. Dis egter nie waaroor Openb.13 gaan nie want van watter belang sou dit vir die eerste lesers van Openbaring hê om te weet dat mense 2000 jaar later mikro-skyfies op hulle voorkoppe en regterhande sou hê? Dit maak mos nie sin nie!
Hierdie merk moet reg verstaan word. Let daarop dat die woord op ook in kan beteken. Die Antichris sal aan die einde van die tyd die mensdom se denk- en werksvermoë so aantas asof hulle op die voorkop en regterhand gemerk is. Die uitverkorenes van God sal dit nie hê nie. En baie van hulle gaan hul lewens weens hul getuienis vir Christus verloor.
“Wie sy lewe vind, sal dit verloor; en wie sy lewe verloor om My ontwil, sal dit vind” (Mt.10:39).“Toe sê Jesus... As iemand agter My aan wil kom, moet hy homself verloën en sy kruis opneem en My volg. Want elkeen wat sy lewe wil red, sal dit verloor; maar elkeen wat sy lewe om My ontwil verloor, sal dit vind” (Mt.16:24,25).
Martelaarskap is ʼn onmisbare deel van die eindtyd se geloofslewe en deel van die aftel van die dae na die einde se kant toe. Die merk van die dier staan in direkte verhouding met martelaarskap. Praat jy van die een, kom die ander een ook ter sprake. Ons eie swaarkry en opofferings is niks is in vergelyking met die vervolging en wreedheid wat die apostels en evangeliste ná Jesus se Hemelvaart moes deurmaak nie. Ek wys u op ʼn paar van hulle:
Matteus was ʼn belastinggaarder wat ʼn evangelis geword en in Ethiopië ʼn martelaarsdood gesterf het toe hy met ʼn byl doodgekap is.
Petrus is onderstebo gekruisig. Volgens oorlewering het hy dit só versoek aangesien hy homself onwaardig beskou het om op dieselfde wyse as sy Meester te sterf.
Filippus is in die Griekse stad, Hiërapolis onderstebo aan ysterhakke opgehang totdat hy gesterf het.
Johannes is in olie gekook maar het wonderbaarlik aan die dood ontkom en in vrede op die eiland Patmos gesterf nadat hy Openbaring geskryf het.
Jakobus, Jesus se broer, is by die tempelmuur afgegooi en daarna met ʼn knuppel doodgeslaan.
Judas(Taddeus) is in Persië deur godsdienstige Oosterse leiers met ʼn byl doodgekap.
Andreas is in Griekeland gekruisig.
Bartolomeus (Nataniël) is in Armenië doodgegesel.
Tomas is in Indië met spiese doodgesteek.
Paulus is in 67nC deur keiser Nero in Rome onthoof.
Lukas was ʼn mediese dokter en is in Griekeland gehang omdat hy die Evangelie verkondig het.
Markus was die stigter van die kerk in Alexandrië (Egipte) en het daar gesterf nadat hy met perde deur die strate gesleep is.
Die 666 merk het alles met die wêreld waarin die kerk vandag sowel as 2000 jaar gelede geleef het te doen. Satan se twee handlangers sorg dat ongelowiges dit ontvang en vervolg diegene wat dit weier. Hulle is die ware gelowiges. Die 666 merk is simbolies en nie letterlik nie. Dis die eindtyd-vorm van mense se vereenselwiging met die bose. Om ʼn mediese of finansiële mikroskyfie in die regterhand of voorkop te laat insit, is nie die merk van die dier nie.
Die merk van die dier kom slegs op mense wat bewustelik aan die Antichris onderdanig word. Of dit ʼn inplanting-skyf, vereenselwiging-dokument of ʼn strepieskode is wat getatoeëer gaan word, kan met geen sekerheid gesê word nie. Enige van hierdie dinge is moontlik. Desondanks bly alles net spekulasie. Gelowiges moenie tyd met wilde spekulasies verspil nie. As die tyd aanbreek, sal die Heilige Gees hul van reg en verkeerd oortuig: “en as Hy kom, sal Hy die wêreld oortuig van sonde en van geregtigheid en van oordeel” (Joh.16:8).
Die getal 666 wat met hierdie seël verbind word, lok al baie jare bespiegeling uit. Bybelverklaarders probeer al eeue lank om sekere mense met hierdie 666 getal te verbind sonder afdoende bewys. Miskien plaas hulle die klem verkeerdelik op wie hierdie persoon is in plaas van sy dade.
Sommige van die oud kerkvaders het verkeerdelik geglo dat dit die woord lateinos uitspel en na Rome verwys. Hierdie getal is nie bedoel om soos ʼn raaisel uitgewerk en aan ʼn spesifieke persoon verbind te word nie. Dit dui eerder op die Antichris se handelsmag wat gelowiges gaan raak en uitsluit.
Die 666 getal gaan nie oor werklike merktekens nie, maar oor baie dieper dinge soos die ontsettende houvas wat Satan op die mensdom van die eindtyd gaan verkry. Daarom sê Openb. 13:18 dat wysheid benodig word. Wanneer die Antichris openbaar word, sal dit duidelik wees wie hy is.
Al wat werklik saak maak, is dat gelowiges die geloof moet behou totdat Jesus kom om die boek van die lewe (burgerskapregister) te open. Diegene sonder die 666-merk gaan hemel toe. Wie dit het, gaan hel toe: “En as dit bevind is dat iemand nie opgeskryf was in die lewe nie, is hy in die poel van vuur gewerp” (Openb.20:15).
Intussen verwag Christus van gelowiges om in die geloof te volhard, die laaste swaarkry te aanvaar en Jesus getrou te bly volg. God sal aan die einde teen Satan en sy magte oorlog voer en oorwin. Dis nie die gelowiges se taak nie!