Gedagtes vir elke dag
Of lees almal by Gedagtes vir elke dag
Ons sê dikwels ons kan niks aan ons haglike omstandigheid in ons land doen nie. Dit is nie waar nie: geen land se toekoms rus op die skouers van die owerheid nie. Die toekoms van politieke instellings berus op die kapasiteit van die mense om self tussen reg en verkeerd te onderskei; op ons elkeen se kapasiteit om oor onsself te heers volgens die tien gebooie van God – as ons elkeen hierdie verantwoordelikheid nakom sal ons 'n baie ander prentjie in ons land sien as tans.
NEE VIR?...
...vir Bybelgegronde teologiese opleiding!
Ds. A.E van den Berg
“Een duiwel in die kerk is meer werd is as ʼn duisend daarbuite!”
Die NG Kerk se algemene kuratorium wat oor studente se teologiese opleiding toesig hou, het onlangs gesê dat teologiese studente wat by die APKerk of Gereformeerde Kerk se teologiese akademies opgelei is nie in die NG Kerk beroepbaar sal wees nie. Die NG Kerk se opleiding gee bewustelik voorkeur aan swart teologie, bevrydingsteologie en feministiese teologie. Dit, saam met verskeie dosente se eiesinnige teologiese sienings, maak van die kerk se teologiese opleiding ʼn speelgrond vir dwaalleer.
Die NG Kerk se probleem met die APK is dat hul teologiese uitgangspunt eksklusiwiteit vir blankes is. Die Gereformeerde Kerk daarenteen laat weer nie vroue tot die amp toe nie terwyl meer as 50% van die NG Kerk se huidige teologiese studente vroue is.
Die teologiese opleiding wat tans by die NGK se drie kweekskole aangebied word, is onbeskaamd dwaalleer. Vandag se katedertaal is more se kanseltaal. Geen wonder dat duisende lidmate die kerk jaarliks vir ander kerke verlaat of kerkbywoning staak.
Die ontsporing in die NG Kerk se drie teologiese fakulteite vererger by die dag. In 2005 het Jan Grey en Hennie Stander die NG Kerk se teologiese fakulteite van dwaalleer beskuldig. Daarvan het dadels gekom. Kort hierna het Ferdie Mulder, ’n teologie-student van Pretoria, drie professore van dwaling oor Jesus se opstanding uit die dood aangekla. Ten spyte daarvan dat die fakulteit van die dwalings bewus was, is geen vinger verroer om die teoloë tot verantwoording te roep nie. Mulder is selfs lewenslank uit die fakulteit geskors!
Om aan vrysinnige teologiese dosente ʼn vrye hand te gee, is noodlottig vir enige kerk. Dit laat hulle glo dat hulle vry van inperkings is en sekere grondliggende geloofsoortuigings onder die denkmantel van byderwetse denke kan ondergrawe. En so beland die dood in die pot.
Wat in Suid-Afrika gebeur, gebeur ook in die buiteland. ʼn Paar jaar gelede skryf ʼn besorgde Amerikaanse gelowige dat sy land se theological seminaries in theological cemeteries ontaard het.
Die verwarring in die NG Kerk se teologiese opleidingsentra het met die NG Kerk se geestelike ontsporing begin toe sy aan haar volk ontrou geword en die gevolge van haar onverskilligheid nie kon vryspring nie. Sy het haar dwaalleer in die glanspapier van teologiese vernuwing toegedraai en mense aangemoedig om hul eertydse Bybelse sienings oor gruwels soos aborsie, homoseksualiteit en ontug te wysig.
Dit het stormagtige debatte in die kerk ontketen wat ʼn onoorbrugbare kloof tussen twee duidelik onderskeie groepe in die NG kerk laat ontstaan het. Aan die een kant van die kloof is die Skrifgetroues wat onverbiddelik by die Bybel as die onfeilbare Woord van God staan. Aan die ander kant van die kloof is dwaalgeeste wat die geloofwaardigheid van die Bybel telkens bevraagteken.
Alhoewel die NG kerk haar op die Bybel as die onfeilbare Woord van God beroep, weerspreek haar leer en lewe dit in alle tale. Sy bevraagteken, betwyfel en verwerp talle eeu-oue Skrifwaarhede en waar haar dwalings teelaarde vind, word aan die sondige wil van mense toegegee.
ʼn Gewese NG leraar skryf onlangs op Internet:
“Geskok, terneergedruk en mateloos verslae. Het op 25 Des. saam met familie in die Kaap 'n Kersfeesdiens bygewoon. Ek het daar gesit en ween in my hart dat duisende mense in drie agtereenvolgende dienste in 'n groot kerkgebou van Stellenberg hierdie God-onterende dwalinge moes aanhoor. (i) Die Wonderbaar, Raadsman Sterke God en Ewige Vader van Jes.9 is nie 'n voorspelling van Jesus nie, maar sommer 'n koning wat in daardie tyd hoop en verwagting vir sy mense gebring het. (ii) Die wedergeboorte van Joh. 3 is nie 'n geestelike verandering wat in elke mens moet plaasvind sodat hy gered kan word en God se ewige koninkryk beërwe nie. Dis is maar net 'n aanduiding dat ons moet weet dat net soos die geboorte van 'n baba nuwe hoop en verandering in ʼn huis bring, so moet elkeen met nuwe hoop poog om die wêreld om ons te verander (iii) Die geboorte van Jesus is soos die geboortes van Samuel en Moses en ander konings in die OT wat nuwe hoop vir hul mense gebring het. Jesus kom inspireer ons om mekaar te dien en hoop vir hierdie wêreld te bring. Daar is nie 'n ander wêreld waarheen ons gaan nie. Nie een van my familie het hieroor 'n oog geknip nie en was baie tevrede met die boodskap. Ek glo met my hele hart dat 'n wedergebore siel wat by aanhoor van hierdie humanistiese wêreldgelykvormige idees in daardie kerk gesit het in sy hart sou ween!”
NG leraars lê met hul toelating tot die bediening ʼn legitimasiebelofte af om alle leer wat in stryd met die Bybel en Gereformeerde leer is, te weerlê en bewustelik teen te staan. Die NG kerk se versuim om dit te doen, maak van haar, kragtens haar eie kerkorde en belydenisskrifte, ʼn valse kerk!