Gedagtes vir elke dag
Of lees almal by Gedagtes vir elke dag
Bekerings wat nie hou nie, was nooit bekerings nie, en is emosie en soos die saad van die saaier wat opgekom en gou verwelk het. Ware bekerings hou stand!
NET SOOS IN DIE DAE VAN NOAG
Ds A.E.vd Berg
“En net soos die dae van Noag was, so sal ook die koms van die Seun van die mens wees” (Mt.24:37).
Mt.24 is deel van Jesus se Profetiese Rede wat oor iets baie ver in die toekoms gelê het. Die boodskap was duidelik: Die aarde sal, soos in die dae van Noag, weer vergaan, maar daarna nie weer herstel word nie. Dit begin met die wederkoms van Christus, iets waaraan baie mense nie glo nie. Hulle glo dat die aarde maar net sal aangaan soos altyd. Dis die ongeloof waarvan Jesus in die Skriflesing praat.
Met die Gelykenis van die Tien Maagde, waarsku Jesus dat min mense vir sy tweede koms na die aarde gereed sal wees. Die lewe sal tot op ʼn vooraf bepaalde dag normaal verloop. Mense sal koop en verkoop, plant en oes, trou en kinders grootmaak totdat die Groot Verdrukking aanbreek.
Jesus vergelyk dit met die dae van Noag toe dinge normaal verloop het tot op die dag dat Noag die ark ingegaan, God die sluise van die hemel oopgemaak en die hele mensdom op agt na omgekom het. Noag het die mense telkens gewaarsku. Hulle het hul nie aan hom gesteur nie en hom as ʼn alarmmaker afgemaak. Hulle sou almal hul woorde saam met die vloedwater sluk!
In die tyd van Noag was die mensdom boos en korrup en het hul eertydse vertroue op God na die mens verskuif en die duisternis omarm. Hulle het die mooi van die lewe onder druk geplaas en ʼn doodswens oor hulself gebring en die prys daarvoor betaal. Juda sou later die selfde dwaasheid begaan: “Maar hulle sê: Dit is tevergeefs; want ons sal na ons gedagtes wandel, en ons sal elkeen volgens die verhardheid van sy bose hart wandel” (Jer.18:12). Hulle het ʼn swaard vir hul eie bors skerpgemaak. God het hulle gestraf deur hulle in ballingskap te laat wegvoer.
Die Bybel leer ons dat oral waar booshede seëvier, wet en orde sal verdwyn en dat dit net voor die wederkoms van Jesus skerp gaan toeneem. In 1940 is onderwysers in Amerikaanse staatskole gevra wat hul probleme met skoolkinders was. Hulle noem toe op: Kinders wat uit hul beurt praat, kougom kou, raas, indruk en mors. Toe onderwysers 50 jaar later die selfde vraag gevra is, het die probleme anders gelyk: dwelmmisbruik, drankmisbruik, tienerswangerskap, selfmoord, roof en aanranding. Dis die geweld van die laaste dae – dis ʼn doodskultuur!
Kinders wat wapens skool toe bring, is algemene nuus. ʼn Paar jaar gelede is ʼn skoolseun in Krugersdorp deur ʼn medeleerling met ʼn swaard doodgemaak. Onlangs is ʼn wiskunde-onderwyser by ʼn swart skool deur ʼn leerling met ʼn mes in die klaskamer doodgesteek.
Kinders wend hul toenemend tot geweld. Let op die konsole speletjies wat gespeel word – sommige daarvan is doodsspeletjies! En wat doen ouers daaraan? Niks nie. Solank as wat dit kinders besig hou. Sulke argeloosheid maak van bose vervaardigers multi-miljoenêrs!
Die Evangelie-skrywer Lukas gee ʼn gelykluidende beskrywing van Mt.24 en gebruik Lot as voorbeeld: “ Net soos dit ook gebeur het in die dae van Lot: Hulle het geëet en gedrink, gekoop en verkoop, hulle het geplant en gebou. Maar op die dag toe Lot van Sodom uitgaan, het vuur en swawel van die hemel af gereën en almal vernietig. Net so sal dit wees in die dag wanneer die Seun van die mens geopenbaar word” (Luk.17:28-30).
Die mense van Sodom was uitsonderlik boos en het homoseksualisme skaamteloos bedryf en daarmee God se orde vir die huwelik verag; ʼn gruwel wat deesdae in kerke met morele verskonings doodgeverf word. ʼn Meisie wat ʼn vrou word, is een van God se mooiste kunswerke. Maar ʼn man wat ʼn vrou word, is een van die Satan se lelikste skilderye!
Terug by die geweld in ons gebroke samelewing. Wat is geweld? Die fisiese vertoon van misplaaste trots. Die val van Satan is ʼn sprekende voorbeeld hiervan – misplaaste trots wat in opstand oorkook. Diktators en tiranne se regerings is gewoonlik vrot van geweld en korrupsie!
Die wêreld is ryp vir God se finale oordeel. Hy weet presies wat aangaan: “Die Here is in sy heilige paleis.... sy oë sien, sy ooglede toets die mensekinders. Die Here toets die regverdige; maar sy siel haat die goddelose en die wat geweld liefhet” (Ps.11:4,5). Die uurglas is besig om vinnig leeg te loop!
Al hoe meer volke breek bande met God: “Waarom woel die nasies en bedink die volke nietige dinge? Die konings van die aarde staan gereed, en die vorste hou saam raad ten die Here en teen sy Gesalfde en sê: Laat ons hulle bande stukkend ruk en hulle toue van ons afwerp!” (Ps.2:1-3).
Hierdie verterende blindheid van die siel maak van mense leë doppe in ʼn hol wêreld!
Jesus draai in sy Profetiese Rede nie doekies om as Hy sê dat gelowiges van die laaste dae baie swaar gaan kry nie. Dit sal so erg wees, dat as God die dae van die Groot Verdrukking nie verkort het nie, niemand gered sou word nie
Ons is nie in vir ʼn luilekker lewe nie. Daar lê vir ons groot stryd voor en ons moet voor die tyd ingeoefen raak en dit die hoof te kan bied. Ons kan nie soos die vyf dwase maagde tot op nommer 99 wag en dan wil regmaak waar ons versuim het nie. Ons moet nou in die Here sterk word.
“Eindelik, my broeders, word kragtig in die Here en in die krag van sy sterkte. Trek die volle wapenrusting van God aan, sodat julle staande kan bly teen die liste van die duiwel” (Efes.6;10.11).
Wie nie nou in die Here sterk word nie, gaan ʼn slaaf van die nare omstandighede word waarvan Christus waarsku. Die geskiedenis van die kerk gaan eindig soos wat dit begin het – met ʼn stryd teen die Satan waartydens die koring van die kaf geskei word.
Word sterk en as jy hierdie jaar vir jou geloof deur die donker moet loop, moenie ophou voordat dit lig word nie. Geen vrug smaak so lekker as die een waarvoor jy die verste geloop het nie. Moenie toelaat dat die wanhoopsdampe van die hel die helder lig van die hemel wat op ons as oorwinnaars wag verdring nie! Christus het ons ʼn wonderlike belofte gegee: “En kyk, Ek is met julle al die dae tot aan die voleinding van die wêreld” (Mt.28:20).