Gedagtes vir elke dag
Of lees almal by Gedagtes vir elke dag
Waarom is ons bang vir die dood as ons weet dat ons geliefdes op ons wag? Om met hierdie wete te sterf, is in werklikheid ʼn wonderlike avontuur!
AARD-VERWARMING
’N SET VAN SATAN!
Ds AE van den Berg
Lees reeks by Artikels: Ds Andrè vd Berg
" 'Science has spoken: Global warming is a myth' Twee Amerikaanse chemici het bevind dat die aarde ten spyte van hoë koolstof vlakke nie warmer word nie, maar eerder kouer en dat dit vir plante en diere voordelig is. Meer as 17,000 wetenskaplikes (ook weerkundiges) het hierdie verklaring onderskryf. Die VN het hom nie hieraan gesteur nie. Sedertdien het 32,000 wetenskaplikes ’n soortgelyke verklaring onderteken."
Job.38
Daar word deesdae baie oor aardverwarming gepraat. Baie tyd en geld word aan navorsing, konferensies en bewaringsprojekte spandeer omdat geleerdes vreesaanjaende natuurrampe vir die toekoms voorspel; droogtes en hongersnode wat miljoene mense en diere kan laat sterf. Gevolglik word die bekamping van aardverwarming as ’n wêreldwye uitdaging gesien, omdat net die mens iets daaraan kan doen. Altans so word verkondig
Die mensdom het tot onlangs nog geglo dat God die natuur beheer. Nie meer vandag nie. Ongelowiges glo dat die natuur die mens se verantwoordelikheid is. Ja, die mensdom moet inderdaad reg met God se skepping omgaan. Hy het immers aan hulle ’n kulturele mandaat gegee om namens Hom daaroor te heers. Desondanks is dit God se eiendom: “Die aarde behoort aan die Here en die volheid daarvan, die wêreld en die wat daarop woon” (Ps.24:1).
Waar kom die vrees vir aardverwarming dan vandaan? Dit kom van die VN wat etlike konferensies daaroor geloods het. In 1988 het die VN ’n organisasie die Interstaatlike Paneel vir Klimaatverandering gestig. Dit het in 1992 op ’n spitskonferensie (Earth Summit) in Brasilië uitgeloop en in1997 is een in Japan gehou. Daarna ook een in Denemarke (2009).
Die VN maak daarop aanspraak dat alle toonaangewende wetenskaplikes die gevaar van aardverwarming besef en die uitdaging om dit te bekamp aanvaar. Dis nie waar nie. Duisende wetenskaplikes stem glad nie met die VN saam nie!
In Desember 1997 het die Wall Street Journal ’n gewraakte artikel geplaas: “Science has spoken: Global warming is a myth” Twee Amerikaanse chemici het bevind dat die aarde ten spyte van hoë koolstof vlakke nie warmer word nie, maar eerder kouer en dat dit vir plante en diere voordelig is. Meer as 17,000 wetenskaplikes (ook weerkundiges) het hierdie verklaring onderskryf. Die VN het hom nie hieraan gesteur nie. Sedertdien het 32,000 wetenskaplikes ’n soortgelyke verklaring onderteken. Meer as 9000 van hulle het doktorsgrade.
Kort voor die konferensie in Denemarke (2009), het kuberkrakers op een van die VN se navorsingsorganisasies se rekenaars ingebreek en van die vertrouelike leêrs op Internet bekend gemaak. Die VN het wetenskaplike feite verander om hul siening te pas! Kort hierna het ’n ongekende snerpende koue die Noordelike halfrond oorval. Baie gelowiges glo dat dit ’n vingerwysing van God was!
Die aardverwarmingsdebat het ook in sekere kerklike kringe ’n opskudding veroorsaak. Talle leraars preek graag oor die geestelike gevolge van ekologiese rampe. Sommige afgodspriesters verkwalik selfs die Christelike geloof vir aandadigheid aan aardverwarming!
Geoff Davies is ’n Anglikaanse biskop en die stigter van ’n plaaslike omgewingsbeskermingsorganisasie. Hy word Suid-Afrika se groen biskop genoem en werk geesdriftig saam met ongelowiges aan verskeie ekologiese projekte. Hy het in 2009 selfs ’n toekenning as Omgewingsbewaarder van die jaar ontvang.
Wat sit eintlik agter hierdie aardverwarming vrees? Die Nuwe Era godsdiens wat ’n ou heiden-godsdiens laat herleef. Dit wil mense laat glo dat die aarde ’n lewende wese en godheid is. Hulle aanbid die skepping en nie die Skepper nie! Die doel is om mense se oë van God af weg te neem en op die aarde te fokus.
Die herlewing van hierdie natuur-godsdiens vergoddelik die aarde en praat van moeder natuur . Moeder natuur is in werklikheid ’n godin (Earth Spirit) wat as Gaia bekend staan. Die voorstanders van die herlewing van die ou heidense aanbidding van die son, maan, water en grond glo dat die skepper en die skepping nie verskil nie. God en die natuur is een. God en die mens is een. Alles is God en God is alles. Dis pure heidendom!
In April 1970 is Die Omgewingshandboek uitgegee. Dis geskryf deur mense wat glo dat die wetenskap of tegnologie die mensdom nie uit ’n ekologiese krisis gaan help nie. Daar moet eerder ’n nuwe godsdiens gevind word wat mense met die aarde gaan help. Die Christelike leer is ’n struikelblok wat uit die weggeruim sal moet word.
Luister wat sê hulle : indien ons nie die Christelike leer en lewe verwerp nie, gaan al die voorsiene rampe ons tref! Geloof in Jesus is dus nadelig vir die mensdom. Hulle word aangemoedig om ’n Nuwe Era sienswyse van natuur-aanbidding, sosialistiese politieke denke en gesinsbeplanning te huldig.
In 1992 is die Handves van die Aarde as ’n Nuwe Tien Gebooie uitgegee. Dis op die op die idees van twee Sataniste gegrond. Toe die VN se wêreldkonfe-rensie oor volhoubare ontwikkeling in 2002 in Johannesburg gehou is, is hierdie handves in ’n ark geplaas en plegtig-eerbiedig die vergadering ingedra!
Baie van die mense wat so met aardverwarming behep is, gee voor om armes en lydendes te help om fondse te verkry ten einde die skade wat ontwikkelende lande die natuur aangedoen het te probeer herstel. In werklikheid poog hulle om ’n wêreld beheerliggaam daar te stel wat op die ou einde sal besluit hoeveel energie ’n land mag gebruik. Dis niks anders as wêreld-sosialisme nie; ’n een wêreld regering!
Die mensdom word aangemoedig om die verlore Eden in eie krag terug te vat en sy gevalle aard om te keer. Die mite van aardverwarming maak mense wys dat hulle kinders van ’n goddelike aarde en derhalwe self goddelik is.
Waarsku gelowiges dringend! “Wees nugter en waaksaam, want julle teen-stander, die duiwel, loop rond soos ’n brullende leeu en soek wie hy kan verslind” (1 Pet.5:8). Laat ons opnuut aan die ou Bybelse waarhede vashou. “...die Here weet om die godsaliges uit versoeking te verlos en die onregverdiges te bewaar vir die dag van oordeel om gestraf te word” (2 Pet.2:9).
Die wêreld is baie na aan sy einde en die ryk van die Antichris voor die deur. Laat dit gelowige harte nie ontstel nie. Hulle weet dat die aarde aan God behoort. ’n Engelse liedjie sê: “He has the whole wide world in His hands”
Laat die Woord van God ons opnuut bemoedig: “Die Here het sy troon in die hemel gevestig en sy koninkryk heers oor alles. Loof die Here, al sy engele, kragtige helde wat sy woord volbring, in gehoorsaamheid aan die stem van sy Woord! Loof die Here, al sy leërskare, sy dienaars wat sy welbehae doen! Loof die Here, al sy werke, op al die plekke van sy heerskappy! Loof die Here, o my siel!” (Ps.103:19-22).
Die wêreld is in opstand. Mense wil God onttroon. “Waarom woel die nasies en bedink die volke nietige dinge? Die konings van die aarde staan gereed en die vorste hou saam raad teen die Here en teen sy Gesalfde en sê: Laat ons hulle bande stukkend ruk en hulle toue van ons afwerp! Hy wat in die hemel woon, lag: die Here spot met hulle” (Ps.2:1-4).
Dis alles tevergeefs! Hy laat nooit die werke van sy Hande vaar nie. Ja, “He has the whole wide world in His hands” En dit maak my bly. “Dit moet julle veral weet, dat daar aan die einde van die dae spotters sal kom wat volgens hulle eie begeerlikhede wandel….Daarom geliefdes, terwyl julle hierdie dinge verwag, beywer julle dat julle vlekkeloos en onberispelik voor Hom bevind mag word in vrede” (2 Pet.3:3,14).