Gedagtes vir elke dag
Of lees almal by Gedagtes vir elke dag
... Ek het dit teen die profete wat my woorde steel... wat leuenagtige drome profeteer, dit rondvertel en my volk verlei met hulle leuens en grootpratery terwyl Ek hulle nie gestuur het nie... en hulle vir hierdie volk hoegenaamd geen voordeel bring nie... – Jeremia 23
OPENBARING – BOEK VAN DIE HEDE (14)
Ds Andrè van den Berg
Lees reeks by Openbaring - Boek van die hede
Laodicea, die louwarm gemeente
Openb.3:14-22
- 1. Die stad Laodicea
Laodicea was in die streek Frigië, 72 km vanaf Filadelfia (160km van Efese) op die kruising van twee sleutelroetes in Klein Asië. Daar was drie stede in hierdie streek; Kolosse, Hierapolis en Laodicea. Laodicea is in 253vC gestig en deur koning Antiochus II na sy vrou Laodike vernoem. Dit het in 133vC in Romeinse bewind gekom en was vir tekstielware van swart wol en ooghospitaal bekend. Laodicea is in 60nC deur ʼn groot aardbewing getref.
Die stad het gereeld watertekorte ondervind. Water moes met ʼn 10km pypleiding na die stad herlei word. Die Romeinse veelgodedom het in Laodicea floreer, veral die aanbidding van Zeus en Apollo. Daar was ook ʼn sterk Joodse bevolkingsgroep en vermenging van die Joodse en heidense godsdienste.
2. Die gemeente
Die gemeente is waarskynlik deur Epafras tydens Paulus se drie jaar verblyf in Efese gestig (Kol.1:7; 4:12,13). Die gemeente het in die huis van Nimfas vergader (Kol.4:15). Dit ontvang egter geen positiewe wense of lof nie, maar word wel bestraf. Die gemeente het net soos die stad in selfversekerdheid en gevolglike louheid verval, ʼn selftevredenheid weens hul stoflike rykdom.
3. Die briefboodskap
Die gemeente was selfversorgend. Nogtans sê Christus dat hulle lou asook arm, blind en naak is. Christus stel homself as die Amen voor. In die OT is dit die gebruik om met ʼn brief of gebed af te sluit. Dit staan hier eerste om gesaghebbende Goddelike uitsprake aan te dui. Voorts is Christus die betroubare getuie. In Openbaring word getuiesgereeld met martelaarskap verbind. Christus het die hoogste prys in sy getuienistaak betaal!
Dis geheel en al in teenstelling met Laodicea wat geestelik afgekoel en tot ʼn louheid oorgegaan het wat net uitgespuug kon word. Christus word ook die begin van die skepping van God genoem. Hy is in die begin van die skepping om die gemeente te herinner dat Hy saam met sy Vader in volle beheer van die wêreld is.
4. Die aanklag
Christus is ten volle vertroud met die geestelike situasie in die gemeente. Hulle is nie koud of warm nie, maar lou. Dit verwys ook na die watersituasie van die stad. Tien kilometer noord van Laodicea was die stad Hierpolis geleë en vir sy warmwaterbronne bekend. Tien kilometer noord was Kolosse wat vir sy vars kouewaterbronne bekend was. Omdat Laodicea oor geen waterbronnebeskik het nie is ʼn pypleiding van Kolosse af na die stad gebou. Dit het oor ʼn kalkkrans gestort en louwarm in Laodicea aangekom. Die kalkinhoud het die water ondrinkbaar gemaak. Die feit dat Christus op die punt gestaan het om die water uit te spuug, dui daarop dat die gemeente nog ʼn kans gekry het om hul geestelike huis in orde te kry. Hulle moes vir die saak van Christus weer kook!
In vers 17 bespreek Johannes die oorsaak van hul louheid – weens hul stoflike rykdom het hulle selfvoldaan en selftevrede geword. Hulle het niks kortgekom nie. Toe die stad in puin gelê is, het hulle sonder Rome se bystand die stad opgebou; nog beter as tevore. Net soos wat die stad Rome se hulp weggewys het, het die gemeente God se hulp weggewys – onafhanklik van God! Hulle het nie besef dat hulle geestelik ver te kort skiet nie. Ellendig is die hoogste vorm van ongelukkigheid. Bejammerenswaardig is die teenoorgestelde van welgesteldheid.
5. Die drie beskrywings
Laodicea was geestelik arm en moes goud koop wat deur vuur gelouter is. Die gemeente moet ʼn totaal nuwe premie op die geestelike warmte van die saak plaas. Goud word in die sin van geloof gebruik. Die onsuiwerhede moet weggebrand word. Dan groei die liefde vir Christus uit ʼn gesuiwerde geloof.
Laodicea is in die oog van Christus kaal. Hulle moes wit klere koop om hul naaktheid te bedek. Laodicea was bekend vir swart wolstof, beeld van hul sonde. In die Joodse kultuur is naaktheid as ʼn groot skande beskou (Jes.20:1-4). Dit het ʼn mens oneer aangedoen en was ook strafbaar. Wit klere spreek van eerbetoon en het die simboliese betekenis van geregtigheid, verlossing en oorwinning (Openb.6:11; 7:9,13-14). Die raad om wit klere te kry, dra die betekenis van bekering.
Laodicea was geestelik blind en moes oogsalf koop om te kon sien. In Laodicea was ʼn lonende aptekersbedryf waar oogsalf van verpoeierde Frigiese sandsteen gemaak is. Dit het die mense van Laodicea blind van selfvoldaanheid gemaak. Hulle het hul geestelike verval nie raakgesien nie. By Christus was die genesende salf te koop – bekering.
Al het die gemeente in louheid verval, bestraf Christus hulle omdat Hy hulle liefhet (:19). Hulle moes nie daaraan twyfel dat Hy hulle hartstogtelik liefhet nie. Dis die liefde wat hul op die regte pad moes teruglei. Christus bestraf en tug elkeen wat Hy liefhet en herinner aan Spr.3:11,12. Om te bestraf, is om iemand op ʼn probleem te wys en te oortuig om iets daaraan te doen. Tug is om iemand op die korrekte spoor te plaas (2 Tim.2:25; Hebr.12:6,7,10). As die gemeente dit ernstig opneem, sal hulle ywerig wees om hul te bekeer. Hul ywer sal in hul bekering sigbaar word. Hul geesdrif moet van eie gewin na Christus-gewin verander.
6. Die Goddelike uitnodiging
In vers 20 volg ʼn goddelike uitnodiging – Christus staan by die deur en klop. Hy dwing niemand om oop te maak nie. Hy stel Hom slegs beskikbaar. Tafelgemeenskap by ʼn fees was teken van hartlike deelname en teken van versoenende deelname in mekaar se lewe (Mt.11:16-19). Dink ook hier aan die finale Messiaanse feesmaal (Openb.19:6-9). Om met Christus by ʼn feesmaal aan te sit, is die hoogste vorm van beloning denkbaar! Wie oorwin, sal saam met Christus op sy troon sit. Die oproep om te luister na die Gees dui op ʼn ontdaning van die louheid en ten doelstelling van geesdriftige diens aan Christus. Laodicea moes tot inkeer kom en haar van die basiese dinge in die koninkryk vergewis en opnuut haar liefde vir Christus in die regte dade bewys.
7. Die latere lot van die sewe gemeentes
Van die sewe gemeentes bestaan drie vandag nog – Smirna, Thiatire en Filadelfia. Dis groot stede met nuwe name. Van die res is slegs ruïnes oor. Laodicea het die langste bestaan. Dit was die geldhoofstad van Klein-Asië. In 361 nC is ʼn groot sinode ook daar gehou. Dis egter in die Middeleeue tydens die Moslem oorloë vernietig.