Gedagtes vir elke dag
Of lees almal by Gedagtes vir elke dag
Geloof is nie die gevolg of die rede vir die uitverkiesing nie, maar die BEWYS daarvan dat ons weet God het ons uitverkies tot die ewige lewe.
HOE LYK DIE GROOT VERDRUKKING?
Lees meer by Aktuele vrae
WEGRAPING EN MERK VAN DIE DIER
Ds AE vd Berg
“En baie valse profete sal opstaan en baie mense mislei” (Mt.24:11)
Waarom is daar soveel dwaling in die wêreld? Jesus antwoord diè vraag in Mt.22:29 wanneer Hy vir die kerklui van sy tyd sê: “Julle dwaal, omdat julle die Skrifte nie ken nie....” Dis een ding om ‘n klomp Bybeltekste te kan aanhaal, maar ‘n ander saak om die Skrif te ken. Wie die Skrif nie ken nie, sien die leuen maklik vir die waarheid aan.
Dwaalleer is ‘n set van die Satan. Hy wil dat mense die oog van die waarheid moet wegneem en die leuen glo. Waarom? Om die Bybel kragteloos te probeer maak. Die Bybel is ‘n kragtige instrument in God se hand: Luister wat sê Paulus daarvan: “Want ek skaam my nie oor die evangelie van Christus nie, want dit is ‘n krag van God tot redding vir elkeen wat glo....” (Rom.1:16).
Satan weet dat die Evangelie ‘n ongekende krag is. Dit beroof hom van mense as hulle tot bekering kom. En hy wil dit verhoed! Daarom doen hy alles in sy vermoë om dit van krag te ontneem. Hy maak veral van twee metodes gebruik – vervolging en dwaallering. Dwaallering is die suksesvolste, soos bv. die leer van die wegraping.
Mense wil weet wat in die toekoms en veral aan die einde van die tyd gaan gebeur.
By geleentheid het die dissipels na Jesus gekom en vir Hom gevra wat hulle aan die einde van die tyd moes verwag (Mt.24:3). Jesus het sonder ‘n omhaal van woorde gesê dat die laaste gelowiges en die Antichris terselfdertyd op die aarde sal wees. Dit as sulks trek ‘n streep deur die leer van die wegraping! Dwaalleraars verkondig al meer as ‘n eeu lank die teenoorgestelde nl. dat God sy uitverkorenes vòòr die verskyning van die Antichris na die hemel sal oppluk. Dis hoegenaamd nie wat Jesus in die Skrif vir ons sê nie!
God sal wel by geleentheid al sy uitverkorenes op aarde bymekaar maak: “En Hy sal sy engele uitstuur met harde trompetgeluid, en hulle sal sy uitverkorenes versamel uit die vier windstreke, van die een einde van die hemele af tot die ander einde daarvan” (Mt.24:31). Dis hulle wat deur die Groot Verdrukking gegaan het. Feit bly staan dat hulle terselfdertyd op die aarde as die Antichris sal wees en NIE voor die tyd weggeneem word nie. Hoe hierdie dwaling by kerkgangers aanklank kan vind, gaan ‘n mens se verstand te bowe!
Voorstanders van hierdie dwaling praat van ‘n verdrukkingperiode; ‘n tyd wat verby sal gaan en dan deur ‘n ander een opgevolg sal word. Dis Bybels nie korrek nie. Laasgenoemde praat net van die Groot Verdrukking. Dis nie ‘n sekere periode wat verbygaan nie, maar die slothoofstuk van die mensdom op aarde. Daarna volg niks verder nie. God se oordeel is afgehandel!
Wat ‘n ontnugtering wag daar nie op hulle wat hul hoop op die illusie van ‘n wegraping plaas nie! Hulle glo wel dat daar groot verdrukking gaan plaasvind, maar dat hulle dit nie sal beleef nie. God sal hulle in die hemel oppluk voordat die slegte dinge op die aarde gebeur. Dis so onskriftuurlik soos die kommunistiese Handves! Nêrens in die Bybel word gelowiges so ‘n iets belowe nie!
Die dwaling van die wegraping doen ‘n baie lelike ding – dit skep valse hoop en sus misleide mense aan die slaap. Terwyl die donker onweerswolke van die laaste dae sterk opsteek, steur dwaalgeeste hul nie veel daaraan nie want hulle gaan dit mos nie beleef nie! Dit gaan ‘n ontnugtering met droewige gevolge afgee! Jesus sê dan so duidelik in Joh.16:33: ”In die wêreld sal julle verdrukking hê...” En in Mt.24 sê Hy dat die gelowiges van die laaste dae ‘n konfrontasie met die Antichris moet verwag.
Die leer van die wegraping skep ‘n magdom van ander probleme omdat dit nie op die waarheid gegrond is nie. Dis nie Skriftuurlik verdedigbaar nie want dit staan nêrens in die Skrif nie. Dis ‘n set van die Satan, die vader van die leuen (Joh.8:44)!
Dis hartseer dat soveel goedgelowige mense in die bek van die leeu inloop maar nogtans dink dat hulle op ‘n verebed die hemel ingedra sal word. As hulle maar net Mt.24 aandagtig wil deurlees! Hierdie hoofstuk sê vir ons as gelowiges alles wat ons oor die eindtyd moet weet. Jesus sê gelowiges sal deur die groot verdrukking gaan. Dwaalgeeste sê: Hulle sal nie en verkoop miljoene boeke daaroor!
Hulle optrede weerspieël dieselfde optrede as diè van die Satan, die vader van die leuen. In Gen.3 kom Satan by Eva in die tuin van Eden en vra haar of God hulle verbied het om van sekere bome te eet. Nadat sy bevestigend geantwoord het, sê die Satan vir haar: “Julle sal gewis nie sterwe nie” (:4). Dis hoe Satan te werk gaan; hy sê presies die teenoorgestelde as wat God sê. Met die leer van die wegraping, soos met alle dwaalleer, is dit ook so.
Waarom doen die Satan dit? Om mense net soos Eva te mislei. Hoeveel miljoene mense in die wêreld word nie mislei deur op die leuen van die wegraping staat te maak nie; mense wat glo dat hulle weggeneem gaan word voordat enigeen van die slegte dinge op aarde gebeur! Dink u vir een oomblik in wat gaan gebeur as die wegraping nie plaasvind nie? Want dit gaan nie! Dink aan die ontsettende verwarring, teleurstelling en ontnugtering! Dit gaan so groot wees, dat hierdie ontnugterdes die merk van die dier gaan aanvaar! Ek kan nie help om te glo dat dit in werklikheid is wat agter die leer van die wegraping sit nie - sataniese misleiding!
In Mt.24 waarsku Jesus duidelik teen valse profete wat wondertekens sal verrig en baie mense gaan meevoer. “En dan sal baie tot struikel gebring word en mekaar verraai en mekaar haat” (:10). Dit gaan gebeur wanneer miljoene kerkgangers tot hul skok gaan besef dat die verebed uit die hemel nie neergedaal het om hulle te kom haal nie. Daar gaan ‘n geloofsafval soos nog nooit tevore wees nie!
Daarom het ons in die AP Kerk een van die grootste evangeliese geleenthede wat daar nog ooit was. Ons moet al hierdie mense wat angstig op hierdie leuen wag, waarsku dat dit ‘n leuen is. Want almal wat aan die Antichris gaan oorgee, gaan, om dit reguit te stel, hel toe. Ons het dus ‘n reuse sendingveld reg voor ons deur! Ons hoef nie China of Japan toe te gaan om mense tot bekering te lei nie, ons kan dit ‘n klipgooi van ons af doen! Noem dit maar ‘n eindtyd-sendingveld.
Eseg.33 sê dat gelowiges soos wagte op ‘n stadsmuur is en betyds alarm moet maak as gevaar dreig. Oral waar die Satan werk, is daar gevaar, want hy is ‘n mense-moordenaar van die begin af (Joh.8:44). Daarom moet ons praat en waarsku! Dis wat God wil hê. Daarom het ons Mt.24 in die Bybel met al sy eindtyd beskrywings.
Let ook daarop dat Jesus dit vir ons in volgorde gee om mense te help om hulle reg voor te berei vir die Groot Verdrukking. Die tyd net voor die wederkoms van Jesus begin met (i) oorloë en gerugte van oorloë (ii) hongersnode, pessiektes en baie aardbewings (iii) daarna volg Christenvervolging en martelaarskap (iv) daarna volg ontstellende natuurverskynsels soos die son wat donker en die maan wat rooi word en sterre wat op die aarde val (v) Dan word die laaste basuin geblaas en kom Jesus sigbaar op die wolke! Hierdie selfde orde word net so in Openb.6 herhaal.
Daar is geen wegraping nie, slegs ‘n bymekaarmaak van gelowiges reg aan die einde van die tyd, reg oor die hele wêreld om vir ewig saam met Jesus in die Nuwe Jerusalem te woon. Laat ons nie onverskillig teenoor ‘n verlore-gaande wêreld staan nie, veral nie misleide kerkgangers nie. Hulle is besig om in ‘n see van leuens te verdrink en het die reddingsboei van die waarheid nodig!