Gedagtes vir elke dag
Of lees almal by Gedagtes vir elke dag
Ons wil tog so graag God en sy dade verstaan. Wees dankbaar jy kan nie, want as Hy klein genoeg was vir óns om te verstaan, sou Hy nie groot genoeg wees om te aanbid nie.
LAAT ONS ONSSELF REINING
Hannes Ollewagen
1 Joh. 3:1-24
“En elkeen wat hierdie hoop op Hom het, reinig homself soos Hy rein is.” (:3).
Ons word in hierdie gelese gedeelte weer tot die besef gebring van die groot voorreg wat ons het om kinders van God te wees – ’n voorreg wat ons te beurt geval het sonder enige verdienste van ons kant. In God se liefde het Hy Hom oor ons ontferm en ons losgekoop uit die mag van sonde om ons as sy kinders aan te neem.
Dit is belangrik dat ons daarop let dat die genadegawe van God se redding – ons aanneming tot kinders – sonder verdienste was, maar nie sonder verantwoordelikheid nie. Ons sien dit duidelik in 2 Kor. 6:17&18 – 7:1. “Daarom, gaan onder hulle uit en sonder julle af, spreek die Here; en raak nie aan wat onrein is nie, en Ek sal julle aanneem; en Ek sal vir julle ’n Vader wees, en julle sal vir My seuns en dogters wees, spreek die Here, die Almagtige. TERWYL ons dan hierdie beloftes het, laat ons ons van alle besoedeling van die vlees en die gees reinig, en laat ons die heiligmaking in die vrees van God volbring. Hy het ons in ons ellendige toestand van slawerny onder die sonde aangesien en Hom oor ons ontferm."
As ’n liefdevolle Vader het Hy ons uit liefde aangeneem. Maar dan stel Hy ook aan ons duidelik dat daar ’n verantwoordelikheid op sy kinders rus. Sy kinders kan nie voortleef in die smet van sonde nie, maar word die verantwoordelikheid opgelê om hulself van alle sonde en ongeregtigheid te reinig. “Ewenwel, die fondament van God staan vas met hierdie seël: Die Here ken die wat syne is; en: Laat elkeen wat die Naam van Christus noem, afstand doen van die ongeregtigheid. As iemand hom dus hiervan deeglik reinig, sal hy ’n voorwerp tot eer wees, geheilig en bruikbaar vir die Here,...” (2 Tim. 2:19,21). En in 2 Tim. 5:22 word hierdie verantwoordelikheid tot die handhawing van ’n reine lewenswandel weer vir ons duidelik gestel. “Moenie haastig iemand die hande oplê nie, en moet ook nie met die sondes van ander gemeenskap hê nie. Hou jou rein.”
Het ons self ook ’n rol te speel in hierdie saak? Word ons dan nie volkome deur die bloed van Christus gereinig nie? Is ons redding dan nie uit die genade van God nie? “Want uit genade is julle gered, deur die geloof, en dit nie uit julleself nie: dit is die gawe van God; nie uit die werke nie, sodat niemand mag roem nie.” (Efés. 2:8&9). Dit is tog hieruit duidelik dat ons redding nie uit onsself is nie. Maar ons lewe van reinheid is die gevolg, dit is die verantwoordelikheid wat ons opneem nadat ons hierdie genadegawe van God ontvang het eerder as wat dit iets is wat ons moet doen om die genadegawe te probeer verdien. Die feit dat God ons sonder verdienste hierdie genadegawe geskenk het, beteken nie dat ons onverantwoordelik of ongeërg hiermee kan omgaan nie. Tewens, ons moet besef dat daar saam met hierdie genadegawe wat ons van God ontvang ’n verantwoordelikheid kom om hierdie gawe te koester. “Want as ons opsetlik sondig, nadat ons die kennis van die waarheid ontvang het, bly daar geen offer vir die sondes meer oor nie, maar ’n verskriklike verwagting van oordeel en ’n vuurgloed wat die teëstanders sal verteer. As iemand die wet van Moses verwerp het, sterf hy sonder ontferming op die getuienis van twee of drie; hoeveel swaarder straf, dink julle, sal hy verdien wat die Seun van God vertrap het en die bloed van die testament waardeur hy geheilig is, onrein geag en die Gees van genade gesmaad het?” (Heb. 10:26-29).
Dit is ’n onverskillige en valse godsdiens om te dink dat ons op ons louere kan rus omdat Christus mos iewers in die verlede die prys vir my sonde met sy bloed betaal het en daarmee die saak afgehandel het. Sy bloed was inderdaad die volmaakte offer tot vergifnis van my sonde. Dit het inderdaad die sonde van die ware gelowige weggeneem, maar nie ons geloofsverantwoordelikheid uitgewis nie. Dit is duidelik uit die vele voorbeelde in God se Woord wat ons tot ’n lewe van reinheid oproep. Dit word ook vir ons onderstreep in die woorde van Christus uit Joh. 5:14 sowel as Joh. 8:10 & 11. “En toe Jesus Hom oprig en niemand sien behalwe die vrou nie, sê Hy vir haar: Vrou, waar is daardie beskuldigers van jou? Het niemand jou veroordeel nie? En sy antwoord: Niemand nie, Here. En Jesus sê vir haar: Ek veroordeel jou ook nie. Gaan heen en sondig nie meer nie.” Sy kon nie hier weggaan en hierdie barmhartigheid van Hom vertrap en haar sondige lewe voortsit nie. Nee, sy word weggestuur met die genadegawe van vergifnis, maar ook met die geloofsverantwoordelikheid wat daarmee saamgaan – die koestering van hierdie genadegawe en stryd om ’n rein lewe voor God. Luister ook na die woorde uit Jakobus 1:27. “Reine en onbesmette godsdiens voor God en die Vader is dít: om wese en weduwees in hulle verdrukking te besoek en jou vlekkeloos te bewaar van die wêreld.”
Mag ons vandag opnuut tot die besef kom van ons eie verantwoordelikheid tot ’n rein lewe voor God – nie ’n verantwoordelikheid om ons eie redding voor Hom te probeer bewerk nie, maar ons verantwoordelikheid wat op ons rus as gevolg van die redding wat ons uit genade geskenk is. En mag dit ons opnuut versterk om met ywer en krag die sonde in ons lewe te bestry en die kleed wat met sonde bevlek is van ons weg te werp en ons met daardie kleed van rein en fyn linne te beklee – daardie kleed wat in sy bloed skoon gewas is.
“En aan haar is gegee om bekleed te wees met rein en blink en fyn linne, want die fyn linne is die regverdige dade van die heiliges.” (Open. 19:8).