Gedagtes vir elke dag
Of lees almal by Gedagtes vir elke dag
En Ek sal hulle 'n hart gee om My te ken, dat Ek die HERE is; en hulle sal vir My 'n volk wees, en Ek sal vir hulle 'n God wees, want hulle sal na My terugkeer met hul hele hart – Jeremia 24:7
ONDERWERPING AAN GESAG
Hannes Ollewagen
Rom. 13:1-7
“LAAT elke mens hom onderwerp aan die magte wat oor hom gestel is, want daar is geen mag behalwe van God nie, en die wat daar is, is deur God ingestel,sodat hy wat hom teen die mag versit, die instelling van God weerstaan; en die wat dit weerstaan, sal hulle oordeel ontvang.” (:1&2).
Die chaos wat in die Westerse samelewings heers, is duiselingwekkend. Dit is nie alleen in Suid-Afrika waar betogings, geweldpleging, beskadiging van eiendom, minagting van wet en orde en algehele wetteloosheid die botoon voer nie – hierdie is ook al ’n algemene verskynsel in talle Westerse lande in Europa. Daar is dan ook inderdaad sommige van hierdie opstande wat plaasvind wat vanuit ’n Christelike wêreldbeskouing heeltemal geregverdig is. Dit is egter in die huidige wêreldklimaat baie belangrik dat ons met nugterheid en insig na hierdie saak kyk.
Waar sal ons begin? As gelowiges is ons vertrekpunt altyd veronderstel om dieselfde te wees – by God en sy Woord. Ons leer uit die Woord van die HERE dat God ’n God van orde is. “...want God is nie 'n God van wanorde nie, maar van vrede, soos in al die gemeentes van die heiliges.” (1 Kor. 14:33).
En dit is natuurlik waarom God dit só bepaal het dat daar verskillende gesagstrukture in die Skepping sal wees, omdat dit noodsaaklik vir goeie orde in ’n samelewing is. Dit is dan ook duidelik in ’n samelewing dat daar waar die nodige gesagstrukture ontbreek, onsekerheid en chaos nie uitgesluit is nie. En wanneer ek sê dat gesagstrukture ontbreek, bedoel ek dat hulle hetsy glad nie bestaan nie óf dat diegene wat die posisies binne hierdie gesagstrukture beklee nie die verantwoordelikheid daarvan met erns opneem en nakom nie. In laasgenoemde geval kan dit ook maar beskou word asof die nodige struktuur ontbreek, want dit bestaan maar net in naam, maar ontbreek in wese. Laasgenoemde veroorsaak dat ’n voorbeeld van gehoorsaamheid aan gesag by kinders ontbreek en wanneer hulle dan boonop in skole beland waar daar ook nie behoorlike gesag en dissipline toegepas (kan) word nie (omdat die owerheid dit soms met wetgewing bemoeilik) sal hierdie belangrike instelling van God nie behoorlik by hulle vasgelê word nie.
Wanneer ons oor die afgelope ongeveer ses dekades terug kyk, is die aanslag van Satan op gesagstrukture duidelik. Satan het met welslae sy dienaars ingespan om die gesagstruktuur van ’n gesonde regering te vernietig. Ja, hierdie struktuur wat uit Godvresende, verantwoordelike mense saamgestel moet word, is vervang met ’n misgeboorte van ’n sisteem waarin die mees geslepe, skaamtelose mense met die dikste velle hulself in die “gesagsposisies” kan inverneuk. Watter behoorlike mens kan hiervoor respek hê? En deur so ’n verwronge idee van die gesagstruktuur te skep, maak jy so ’n nodige instelling irrelevant. Verstaan u waarom ek dit onomwonde stel dat die mense wat hieraan meewerk dienaars van Satan is – omdat hulle tot die verwoesting van ’n gesonde instelling van God meewerk.
Satan was natuurlik nie tevrede met die blote vernietiging hiervan nie. Nee, hy wil so veel as moontlik skade aan God se Skepping aanrig. En daarom het hy sy dienaars ingespan om die gesagstruktuur van die kerke ook te vernietig en dan is huwelike met die afsondelike rol van man en vrou hierin natuurlik ook ’n groot fokuspunt. Die emansipasie van vrouens wat eerder mans se gelyke wou word as om te wees dit waartoe God hulle verordineer het, het ’n groot bydrae in die verwoesting van huwelike gespeel. En so is die baie, baie belangrike gesagstruktuur van die huwelik ook behoorlik verwoes. Maar hierdie sterk struktuur moet met mening aangeval word, daarom dat die ammunisie van onsedelikhede soos saamblyery buite die huwelik, verhoudings tussen mense van dieselfde geslag en selfs meer skandelinge dinge as hierdie ook hierteen ingespan is. Hierdie struktuur wat orde, sekerheid en vastigheid binne God se Skepping gee, moet deur die vyand vernietig word. Daarsonder sal kinders leer om hul ouers nie te eerbiedig en te gehoorsaam nie. Omdat die Godgeskape instelling en gesagstruktuur hiervoor ondermyn en vernietig is, is kinders nou in opstand teen alle gesag.
Die Woord van God leer ons om ontsag vir gesagsposisies te hê. “HERINNER hulle daaraan om onderdanig te wees aan owerhede en magte, om gehoorsaam te wees, bereid tot elke goeie werk;” (Titus 3:1). En dit word aan ons duidelik gestel dat ons posisies van gesag moet respekteer omdat dit uit God is. Ja, onse Here Jesus Christus self was vir ons ’n voorbeeld in die onderwerping aan gesag. Ons behoort daarom nooit die belangrikheid van gesag, as ’n instelling van God, te onderskat of te vergeet nie.
Die respekbetoning van gesag beteken egter nie dat ons alle menslike instellings klakkeloos moet navolg nie. Onthou, Satan het met welslae sy dienaars in gesagsposisies vasgenestel en daarom sal ons toenemend sien hoedat daar wetgewing ingestel word wat die gesag van God verder ondermyn. Ons moenie in sulke situasies onsself probeer troos dat ons hierdie verkeerde wetgewing moet aanvaar omdat die regering van die dag dit voorskryf nie en omdat alle gesag uit God is en daarom gehoorsaam moet word nie. Ja, die instelling van gesag is uit God, maar alle mense wat in gesagsposisies beland, is nie dienaars van God nie! Daar is vir ons as gelowige kinders van God geen, maar géén gebod groter as dié van God nie. Die Woord is hieroor baie duidelik. “En Petrus en die apostels antwoord en sê: Ons moet aan God meer gehoorsaam wees as aan die mense.” (Hand. 5:29). Hierdie manne het lynreg teen ’n bevel van die gesag oor hulle gehandel, maar net omdat hierdie bevel lynreg teen God se opdrag aan hulle was en hulle Hom wou gehoorsaam.
Dit is in die huidige klimaat baie belangrik dat ons deeglik oor sake moet besin. Wêreldwyd is daar soveel opstande, betogings en wanorde omdat mense geen respek meer vir die instelling van gesag van God het nie. En alhoewel sommige van hierdie opstande moreel geregverdig kan wees, is die meeste hiervan gewoon net ’n verdere vernietiging van die instelling van gesag. En by so iets behoort ons as gelowiges nie vir een oomblik betrokke te wees nie, geliefdes. Ons behoort die tyd veel eerder uit te koop om te probeer om mee te werk om die stukkende gesagstrukture binne ons volkshuishouding te herstel. Maar hoe doen ons dit? Natuurlik deur te bid en te werk, geliefdes. Ons moet die HERE bid om ons volk se hart weer na Hom te wend en ons te herstel. Ons moet ook bid dat Hy binne ons volk, mense in die regte posisie sal stel wat vir ons volk met ware Godsvrees, opregte liefde en in ootmoed leiding sal gee eerder as om dag na dag kosbare tyd en geld in ’n mishoop van ’n regeringstelsel waar daar vir God geen ontsag en ruimte is nie, te gaan verkwis. En dan moet ons werk. Daar waar ons in gesagsposisies is, soos ouers, onderwysers, leraars, bestuurders en so meer, behoort ons mee te werk om gesag te beskerm, op te bou en vir ander ’n voorbeeld te wees in die respekbetoning hiervan.
Kortom – mag ons altyd vir God as die hoogste vorm as gesag die nodige respek toon. Dit sal ons help in hierdie saak om gesagsinstellings wat teen sy Woord, en derhalwe teen sy gesag indruis, teë te gaan en gesagsinstellings wat in lyn met sy Woord is, te gehoorsaam.
“Want in Hom woon al die volheid van die Godheid liggaamlik;en julle het die volheid in Hom wat die Hoof is van alle owerheid en mag;” (Kol. 2:9&10).