Gedagtes vir elke dag
Of lees almal by Gedagtes vir elke dag
Dis jammer dat die samelewing pyn en lyding as ‘n ergernis beskou. Dis ‘n wanopvatting waarvan ons ontslae sal moet raak. Die Woord van God sê dat ons deur lyding heen geestelik groei.
STUDIE VAN DIE OU TESTAMENT (44)
DIE AFRIKAANSE PROTESTANTSE BYBELSKOOL
Studieleier: ds. Andrè van den Berg (Sr)
Lees reeks by Studie van die Ou Testament
LES 4
DIE RYK SKEUR
1 Kon 11:26-40; 12:1-25
1. Ontevredenheid met die koningshuis
Ná die dood van Salomo het sy enigste wettige seun, Rehabeam, koning geword. In Juda was dit vanselfsprekend dat hy koning sou word, maar nie in die res van die land nie. Israel het bv. nie aan sy kroningsfees in Sigem deelgeneem nie. Israel was nie onwillig om onder hom te dien nie. Hulle besware moes egter eers uit die weg geruim word.
Hulle was beswaard oor die swaar belastings wat Salomo hulle opgelê het. Hy was wel baie ryk, maar het sy volk nie daarin laat deel nie. Die onderhoud van sy vroue het die staatskas behoorlik gedreineer! Daarbenewens het hy hom nie aan die soberheid in geldbesteding gesteur wat deur die koningswet voorgeskryf was nie (Deut.17:16,17).
Die werk en uitgawes aan die bou van die tempel was astronomiese bedrae. Daarbenewens het die handel- en garnisoenstede in die onderworpe lande die staatsfondse verder uitgeput. Hiervoor is slawe (1 Kon.9:20,21) en Israeliete gebruik (1 Kon.5:13; 9:15).
Die volk se ontevredenheid, veral t.o.v. die uitgawe aan die vreemde vroue, kan goed begryp word. God het egter ook ʼn plan met hierdie volksontevredenheid gehad. Die ryk moes skeur omdat Salomo nie na God geluister het nie (1 Kon.11:11).
2. Jerobeam se optrede
Die volk het na Jerobeam opgesien. Hy was ʼn dapper Efraimiet en ʼn gewese amptenaar van Salomo. Daarbenewens was hy ook ʼn goeie organiseerder. Salomo het sy leierseienskappe raakgesien en hom tydens herstelwerk aan Millo hoof van die dwangarbeiders gemaak. Daar het hy die profeet Ahia ontmoet wat hom ingelig het dat God die koninkryk van Salomo gaan afskeur. Jerobeam sou 10 stamme en Rehabeam twee stamme kry.
Ahia het die boodskap van God met ʼn voorbeeld opgevolg. Hy het ʼn nuwe mantel in 12 stukke geskeur waarna Jerobeam 10 stukke moes kies. Daarna het God hom die vertroosting gegee dat sy koningshuis en nageslag bestendig sou wees indien hulle in God se weë sou wandel.
Jerobeam het nie aan die verwagtinge voldoen nie en op die ou einde ʼn opstand teen Salomo gelei. Hy het nie soos ʼn Dawid van ouds geduldig op die Here gewag nie. Hy wou die troon met geweld gryp. Toe Salomo hom wou doodmaak, het hy na Egipte gevlug. Na Salomo se dood het die volk hom laat terugroep om vanuit Sigem die leiding te neem. Dit het ʼn kraak in die volksgeheel gebring.
3. Rehabeam tree soos ʼn diktator op
Rehabeam het die raad van die oudstes om bedagsaam met die volk te praat in die wind geslaan. Hy het vertrouelinge om hom versamel om in sy mag en weelde te deel en die volk nog swaarder belas. Sy woorde: “My pinkie is dikker as my vader se lendene” spreek van dwaasheid. Salomo het sy volk met finansiële swepe gekasty; Rehabeam het dit met gesels gedoen!
Die probleme wat dit veroorsaak het, het die volk uitmekaar laat spat. Tien van die stamme het Jerobeam koning gemaak. Rehabeam het dit nie verwag nie en onmiddellik ʼn poging aangewend om die volk van sienswyse te laat verander. Hy het ʼn sekere Adoram na hulle gestuur, ‘n man wat tydens Dawid se regering hoof van die dwangarbeid was. Rehabeam het gehoop dat hulle na hom sou luister. Hulle het hom egter gestenig. Rehabeam wat dit op ‘n afstand aanskou het, moes vinnig met sy wa wegjaag om aan die woedende skare te ontkom!
4. Vyandskap tussen Juda en Israel
Daar was van meet af aan vyandskap tussen Israel en Juda. Rehabeam wou nie aanvaar dat die skeuring van die ryk God se straf was nie en het ʼn groot leër uit die stam van Juda en Benjamin op die been gebring om die volkseenheid te probeer herwin. Aanvanklik is slegs die stam van Juda aan hom toegeken. Benjamin het egter teenaan Juda gelê sodat dit onprakties was om Benjamin by die ander stamme te voeg. Gevolglik het Benjamin by Juda aangesluit.
God het ʼn sekere Semaja aangesê om met Rehabeam te gaan praat om nie teen sy broers (Israeliete) te veg nie. Hy moes elke soldaat huis toe stuur omdat dit die saak van God was. Rehabeam het geluister en sy soldate teruggestuur. Dit het egter nie vrede tussen die twee ryke gebring nie. Israel en Juda sou vir eeue lank vyande bly.
Vervolg...