Gedagtes vir elke dag
Of lees almal by Gedagtes vir elke dag
Toe ek benoud was, het ek die HERE aangeroep, en ek het tot my God geroep om hulp; Hy het my stem uit sy paleis gehoor, en my hulpgeroep voor sy aangesig het in sy ore gekom – Ps 18:7
EVOLUSIE... WAT IS DIT EN KAN EK DIT GLO? (5)
Hanan Viljoen
Lees reeks by Evolusie - wat is dit en kan ek dit glo?
Wat van kristalle, lewende dinge, voortplanting en ontwikkeling?
Ons weet dat iets soos kristalle op " 'n manier" self ontstaan. 'n Voorbeeld hiervan is soutkristalle.. Wanneer 'n mens 'n soutkristal onder 'n mikroskoop plaas, kan jy die kristalvormige of hoekige struktuur daarvan sien. Dit geld ook vir sekere kristalvormige klippe wat ons in die natuur kry.
Die vraag ontstaan hoe hierdie spesifiek gevormde strukture kan gebeur? Die antwoord is dat God in die atome van die stof waaruit kristalle gemaak is, rigtinggewende en herhalende kragte geplaas het wat die kristalvorming veroorsaak. In die geval van proteïne, dws die boustof waaruit organismes gemaak is, is dit nie voortdurende en herhalende kragte wat werk nie maar hoogs gespesifiseerde en fyn beplande inligting of bou-instruksies wat die plan vir 'n nuwe organisme deeltjie vir deeltjie voorsien.
En wat van lewende dinge?
As ons dink waaroor ons tot dusver gepraat het sou iemand dalk wou sê: "Dit is wel so dat iets soos stoele, selfone en rekenaars wat 'n komplekse struktuur het, nie vanself kan ontstaan nie." Maar wat van lewende goed soos plante, insekte of diere? Sou hulle nie dalk vanself kon ontstaan nie? Jy ken die antwoord maar hier kom dit weer:
Voorplanting vereis altyd eers 'n voortplanter.
Om 'kinders' te hê, moet jy eers 'ouers' hê want lewende organismes kom alleen voort uit lewende organismes. Iewers in die geskiedenis moes die eerste 'voortplanters' geskep gewees het om te kon begin voortplant. Die hele verhaal hiervan is in besonder in Genesis 1 en 2 beskrywe. Elkeen van die verskillende soorte plante en diere wat geskep is, sou ná die Skepping "volgens hulle soorte" voortplant.
"En God het gesê: Laat die aarde lewende wesens voortbring volgens hulle soorte: vee, kruipende diere en wilde diere van die aarde volgens hulle soorte. En God het die wilde diere van die aarde gemaak volgens hulle soorte en die vee volgens hulle soorte en al die diere wat op die grond kruip, volgens hulle soorte. Toe sien God dat dit goed was."
Twee geslagte nodig: Manlik en vroulik
In die skepping van die meeste organismes wat sou voorplant lê daar 'n groot wonder wat ons soms miskyk. Dit is die wonder dat God, met uitsonderings, altyd manlike en vroulike voortplanters saam geskep het. Dit was sy bedoeling dat hierdie gesamentlike voorplanters ook saam "ouers" moes wees. Vir evolusie is hierdie 'n onoorkombare struikelblok,want sien, volgens hulle sou die twee geslagte 'per toeval' ontstaan het.
Daarná sou hulle oor miljoene jare ontwikkel het en daarna ook 'per toeval' by mekaar aangepas het. Hoe's daai vir verskiklike 'intelligente toeval!'
Ontwikkeling na ander soorte?
Ons moet nog 'n vraag vra. Wat van die ontwikkeling of verbetering van organismes soos plante en diere wat reeds geskep is? Kan hulle vanself, of deur 'n bepaalde metode, in ander soorte ontwikkel en verander word? Wat diere betref sou jy dalk wou verwys na die inteling van honde, beeste en perde, ens. Ja, sekerlik kan perde, of beeste, of watter diere ookal, verbeter of verander word deur teling. Dit word genoem spesie-verbetering. Wat egter in die genoemde gevalle gebeur is nooit oorskakelingvan byvoorbeeld 'n perd na 'n bees nie. Daar ontstaan nooit, maar nooit, 'n nuwe soort dier nie. Die bly net by die verbetering of verandering van die eienskappe van die bepaalde soort dier wat reeds bestaan. Visse word nie reptiele nie, reptiele word nie voëls nie, en voëls word nie landdiere nie. Volgens die wette van die genetika of voorplantingsleer kan dit nooit gebeur nie. As ons later oor DNS (Engels DNA) praat, gaan ons dieper in op hierdie onderwerp.
Miljoene jare se ontwikkeling?
Natuurlik het Darwin sy teorie só uitgedink dat die oorskakeling van een soort na 'n ander soort miljoene jare sou geneem het! Niemand sou dus ooit die hele proses kon waarneem nie omdat niemand miljoene jare leef om dit te sien gebeur nie. Niemand sou dus ook wetenskaplik kon kontroleer of dit wat Darwin gesê het, so is nie. (Mens kan dan seker ook vra hoe hyself dit so kon kontroleer...) Maar vandag weet ons op grond van die wetenskap van Biologie dat dit heeltemal onmoontlik is dat 'n nuwe soort dier uit 'n bestaande soort dier kan ontwikkel, al gee jy dit ook miljoene jare tyd om te gebeur.
Wat tot dusver gesê is kan ons ook anders stel. Die bewerings van "miljoene der miljoen jare" plaas die bewerings van evolusioniste buite die bereik van wetenskaplike kontrole. Dit beteken dat voorstanders van evolusie nie daarop aanspraak kan maak dat hulle idees getoets en wetenskaplik bevind is nie. Dit bly doodgewoon net hulle idees of gedagtes – die resultaat van raaiwerk (of doelbewuste misleiding...)
Voordat ons volgende keer oor die 'oue aarde' en die 'jong aarde' praat, onthou solank dit:
Die woord wat vir eenduisend miljoen jaar gebruik word, is 'n 'miljard'. As die evolusioniste dus sê dat die aarde vyf of ses 'miljard' jaar oud is, bedoel hulle dat dit vyf- of sesduisend miljoen jaar oud is.